ასპინძაში ბრუცელოზი გავრცელდა. ქუთაისში დაუსრულებელი სკვერი გახსნეს. რა ხდება რეგიონებში
რა ხდება რეგიონებში
წყალტუბოში 13 წლის გოგოს ცემის ბრალდებით მამა და ბიძა დააკავეს
წყალტუბოში, მოზარდის ჩვენების საფუძველზე, ორი პირი დააკავეს. 13 წლის გოგონა ამბობს, რომ მას მამა და ბიძა სცემდა. საქმეზე დაწყებულია გამოძიება, დაკავებულებისთვის ბრალი ჯერ არ წარუდგენიათ.
ვრცლად: kutaisipost.ge
გურჯაანში 32 წლის კაცი გარდაცვლილი ნახეს
გურჯაანში, სოფელ ვაზისუბანში, მინდორში 32 წლის კაცი ნახეს გარდაცვლილი. წინასწარი ინფორმაციით, გარდაცვლილს სანადირო თოფით აქვს ჭრილობები მიყენებული. სავარაუდოდ, კაცი მოკლულია. შინაგან საქმეთა სამინისტრომ მომხდარის გამოძიება დაიწყო.
ვრცლად: speqtri.ge
წალკაში მატარებელი რელსებიდან გადავიდა. არის მსხვერპლი
სარეაბილიტაციო სამუშაოების დროს წალკაში ე.წ. ტექნიკური მატარებელი რელსებიდან გადავიდა. შემთხვევის შედეგად დაიღუპა ერთი და დაშავდა სამი ადამიანი.
“საქართველოს რკინიგზაში” აცხადებენ, რომ სამუშაოებს ატარებდა აზერბაიჯანული კომპანია – დაშავებულებიც და გარდაცვლილიც ამ ქვეყნის მოქალაქეები არიან.
ვრცლად: marneulifm.ge
ასპინძაში ბრუცელოზი გავრცელდა, დაავადება ცხოველიდან 12 ადამიანს გადაედო
ასპინძაში, სოფელ საყუდაბელში, ცხოველის დაავადება ბრუცელოზი გავრცელდა. უკვე დაფიქსირდა დაავადების ადამიანზე გადადების შემთხვევებიც. საზოგადოებრივი ჯანდაცვის ცენტრმა 80 ადამიანი შეამოწმა და მათგან 12-ს დაავადება დაუდასტურდა. მათი ნაწილი ამ დრომდე კლინიკაშია, ნაწილი კი სახლში აგრძელებს მკურნალობს.
ვრცლად: sknews.ge
ლაგოდეხში დამზადებული საწრუპ ჩხირებს კვიპროსსა და ესპანეთში გაყიდიან
ლაგოდეხში არსებული კომპანია „ბიობამბი“ ქართული ლერწმისგან დამზადებული ბიოდეგრადირებადი საწრუპი ჩხირების ექსპორტს წელს კვიპროსსა და ესპანეთში გეგმავს. კომპანია გასული წლის ბოლოს გაიხსნა და უკვე წელიწადში 200 მლნ ბიოდეგრადირებადი საწრუპი ჩხირის დამზადებას გეგმავს.
ვრცლად: knews.ge
სამი ქალი მარნეულიდან საკუთარ ბიზნესს დაიწყებს
სამმა მარნეულელმა ქალმა პროექტის „ახალგაზრდული მეწარმეობა სოფლის განვითარებისათვის“ (RDYE) ფარგლებში დაფინანსება მოიპოვა. გულჯახან აჯალოვა, აიშენ გიზბასოვა და გულგუნ მამედხანოვა საკუთარ ბიზნესს დაიწყებენ.
აიშენის და გულგუნის პროექტები განათლებას ეხება, ხოლო გულჯახანის პროექტი სამკერვალო ატელიეს.
ვრცლად: marneulifm.ge
ქუთაისში საზეიმოდ გახსნეს დაუსრულებელი სკვერი
ქუთაისში მერმა საზეიმოდ გახსნა სკვერი, რომელიც ჯერ მხოლოდ სანახევროდ არის გაკეთებული. გახსნის ცერემონიისთვის მერი მხოლოდ სკვერის გაკეთებულ ნაწილში მივიდა და მერიის ოფიციალურ გვერდზეც მხოლოდ ის ფოტოები გამოაქვეყნეს, სადაც სკვერის მოწესრიგებული ნაწილი ჩანს. გამოცემა “ქუთაისიპოსტის” ცნობით, ამ სკვერის რეაბილიტაცია ქუთაისის მერიას თითქმის ერთი მილიონი ლარი უჯდება.
ვრცლად: kutaisipost.ge
ნინოწმინდაში სკვერის გაკეთება ჯერ არ დაუსრულებიათ და ინვენტარი უკვე დაამტვრიეს
ერთი წელია ნინოწმინდაში, “ჰაოსისა და ქართლოსის” სკვერი კეთდება. მიუხედავად იმისა, რომ სკვერის კეთილმოწყობა ჯერ არ დასრულებულა, ის ინვენტარი, რაც სკვერში შეიტანეს, უკვე დამტვრეულია. მათ შორის, სკამები, ნაგვის ურნები. რადიო “ნორი” წერს, რომ სკვერში ადგილობრივები ხშირად იკრიბებიან ლუდის დასალევად და შემდეგ იქაურობას ნაგვითა და ნარჩენებით სავსეს ტოვებენ.
ვრცლად: nor.ge
ხაშურში ხალხი ქალაქის რვა სოფელთან დამაკავშირებელი, ავარიული ხიდის შეკეთებას ითხოვს
ხაშურში მცხოვრებლებმა საპროტესტო აქცია გამართეს ავარიული ხიდის შეკეთება მოიხოვეს. ეს ხიდი ხაშურს რვა სოფელთან აკავშირებს. როგორც რადიო “მოზაიკა” წერს, ხიდის დაზიანება მდინარიდან ქვიშა-ხრეშის უნებართვო მოპოვებამ გამოიწვია, რადგან მდინარემ კალაპოტი შეიცვალა. რადიოს ცნობით, ადგილობრივი ხელისუფლება ხიდის შეკეთებას არ აპირებს.
ვრცლად: mozaikanews.ge
გორში კომპანიამ შუაზე მიატოვა რვა სოფელში დაწყებული სამუშაოები
კომპანია ,,ხაჩამ” გორის რვა სოფელში სასაფლაოს შემოღობვის სამუშაოები არ დაასრულა. კომპანია შავ სიაში შეიყვანეს. გამოცემა Qartli.ge წერს, რომ კომპანიამ 130 ათას ლარიან ტენდერში გაიმარჯვა და მას თანხის თითქმის ნახევარი (48%) უკვე მიღებული აქვს.
ვრცლად: qartli.ge
რა ხდება რეგიონებში
