საქართველოს პრეზიდენტმა სალომე ზურაბიშვილმა რუსულ კანონს ვეტო დაადო. როგორც ზურაბიშვილმა დღეს გამართულ ბრიფინგზე განაცხადა, მოტივირებული შენიშვნები პარლამენტს უკან დღესვე გადაეგზავნება.
“დღეს დავადე ვეტო რუსულ კანონს. ეს კანონი არის თავისი არსით, თავისი სულისკვეთებით რუსული კანონი, რომელიც ეწინააღმდეგება ჩვენს კონსტიტუციას, ეწინააღმდეგება ყველა ევროპულ სტანდარტს და ამდენად, წარმოადგენს შეფერხებას ჩვენს ევროპულ გზაზე.
ეს ვეტო არის სრულიად გამართული იურიდიულად და დღესვე გადაეცემა პარლამენტს. ეს კანონი არ ექვემდებარება არავითარ ცვლილებას, არავითარ გაუმჯობესებას და ამდენად არის ძალიან მარტივი ვეტო. ეს კანონი უნდა გაუქმდეს.” – თქვა ზურაბიშვილმა.
14 მაისს, საქართველოს პარლამენტმა რუსული კანონი III მოსმენით მიიღო. კანონპროექტს მხარი 84-მა დეპუტატმა დაუჭირა, წინააღმდეგი იყო 30 დეპუტატი.
პრეზიდენტმა სალომე ზურაბიშვილმა მაშინვე თქვა, რომ კანონს ვეტოს დაადებდა, თუმცა “ქართულ ოცნებას” პარლამენტში ჰყავს დეპუტატების საკმარისი რაოდენობა, რომ ეს ვეტო დაძლიონ.
პრეზიდენტის ვეტოს შესახებ დეტალური განმარტებები წაიკითხეთ აქ.
