"არც ერთი ომის პარტია არ არსებობს ევროპაში – ომის პარტიაა რუსული იმპერიალიზმი" - პრეზიდენტის სიტყვა 26 მაისს
პრეზიდენტის სიტყვა 26 მაისს
საქართველოს პრეზიდენტმა სალომე ზურაბიშვილმა დამოუკიდებლობის დღისადმი მიძღვნილ ღონისძიებაზე განაცხადა, რომ არც ერთი ომის პარტია არ არსებობს ევროპაში და ომის პარტიაა რუსული იმპერიალიზმი. მისი თქმით, არჩევნები ამ ქვეყნისთვის იმავე მნიშვნელობის იქნება, როგორიც 1918 წელს. სალომე ზურაბიშვილმა მოუწოდა საქართველოს მოსახლეობას არ მიეცენ უიმედობას, რადგან “დამოუკიდებლობა აქამდე თქვენი მოყვანილია.”
პრემიერმინისტრმა ირაკლი კობახიძემ დამოუკიდებლობის დღის ღონისძიებაზე სალომე ზურაბიშვილს მოღალატე უწოდა და აღნიშნა, რომ “პრეზიდენტის ღალატის მიუხედავად”, საქართველოს მთავრობამ დამოუკიდებლობა შეინარჩუნა.
რა თქვა საქართველოს პრეზიდენტმა:
“არცერთი ომის პარტია არ არსებობს ევროპაში – ომის პარტიაა რუსული იმპერიალიზმი”
“მჯერა და მინდა თქვენც დაგარწმუნოთ, რომ არც ჩიხში ვართ შესული, არც ჩაკეტილ წრეზე ვტრიალებთ, არც უიმედობას და ნიჰილიზმს აქვს ადგილი ჩვენში, ჩვენი ქვეყნის ბედი ჩვენ ხელშია და გამოსავალიც ჩვენვე უნდა მოვნახოთ.
[…] ევროპული კავშირი თავისი არსით შექმნილია მშვიდობისთვის. არცერთი ომის პარტია არ არსებობს ევროპაში, არც ერთი ომი არ დაწყებულა ევროპის კავშირის ქვეყნის მიერ მისი დაარსებიდან. სამაგიეროდ, რეალური ომის პარტია ერთია, და მხოლოდ ერთი, რომელსაც დღეს ჩვენს ოკუპირებულ ტერიტორიებშიც ვხედავთ – რუსული იმპერიალიზმი. ევროკავშირი კი გვევლინება, როგორც თავისუფალი ერების გაერთიანება, რომლის წიაღში ჩვენს ქვეყანას ეძლევა შესაძლებლობა მშვიდ და დაცულ გარემოში შეძლოს დამოუკიდებლობის შენარჩუნება.”დღეს, როცა რუსეთის აჩრდილი თავს გვადგას, ევროპასთან და ამერიკასთან ურთიერთობის შენარჩუნება ჩვენი დამოუკიდებლობის ჭეშმარიტი გზაა. ვინც ამ გზას საბოტაჟს უწყობს და აზიანებს, ფეხქვეშ თელავს ქვეყნის უსაფრთხო მომავალს, თავისუფალი და დემოკრატიული სამყაროს სრულყოფილ წევრად ქცევის გზას.
“ნუ მიეცემით უიმედობას, დამოუკიდებლობა აქამდე თქვენი მოყვანილია”
“ვიცი რამდენად გტკივათ ჩვენი ქვეყნის დღევანდელობა, ვიცი დღეს რა განცდებითაც მისმენთ. მაშინ, როცა ქვეყნის დამოუკიდებლობა და ევროპული მომავალი საფრთხის ქვეშ გესახებათ. ნუ მიეცემით უიმედობას, ეს ქვეყანა და მისი დამოუკიდებლობა თქვენი, ამ ქვეყნის მოქალაქეების მოყვანილია. დღეს ჩვენვე უნდა გავაძლიეროთ და განვამტკიცოთ.
არაა შემთხვევითი, რომ საქართველოსთვის გადამწყვეტ დროს, ქვეყნის პრეზიდენტი იმ ემიგრაციის შვილია, რომელიც იბრძოდა და ამზადებდა საქართველოს დამოუკიდებლობას, რომელიც გამოცხადდა 1918 წლის 26 მაისს. შეიძლება ისიც არ იყოს შემთხვევითი, რომ დღეს ქვეყნის პრეზიდენტი ის ადამიანია, რომელმაც მშვიდობიანად გაიყვანა შემოსული რუსის ჯარები.”
“მაოცებს, რომ დღეს ვიღაცების დარწმუნება მიწევს, ვინაა მტერი და ვინ მეგობარი”
“ჩვენ 33 წლის წინ შევუდექით ამ გზას და ამ გზაზე ჩვენი ევროპელი და ამერიკელი მეგობრები ყოველთვის ჩვენს გვერდით იდგნენ და მხარს უჭერდნენ ჩვენი სახელმწიფოს მშენებლობასა და განვითარებას. მხარს გვიჭერდნენ მორალურად, პოლიტიკურად, ფინანსურად და ინსტიტუციურად. დღეს მაოცებს ის ფაქტი, რომ მიწევს ვიღაცები დავარწმუნო იმ ფაქტში, ვინაა მტერი და ვინაა მეგობარი.
ხომ ვიცით ვინ წაგვართვა ტერიტორიები, ვინ დაარღვია ჩვენი ტერიტორიული მთლიანობადა ვინ იცავს ჩვენს სუვერენიტეტს და არაღიარების პოლიტიკას; ხომ ვიცით ვინ აკრძალა ქართული ენის სწავლა და ვინ აღიარა და დაიცვა ქართული ანბანი; ხომ ვიცით ვინ დაგვინგრია და ვინ აგვიშენა სკოლები; ხომ ვიცით ვინ გვიჭედავს ეკლესიის კარს და ვინ გვეხმარება ჩვენი ეკლესია-მონასტრების აღდგენასა და გადარჩენაში;
ხომ ვიცით ვინ დაგვიწუნა და გამოდევნა ქართული ღვინო და ვინ დააფასა და აღიარა საქართველო ღვინის სამშობლოდ; ხომ ვიცით ვისი დახმარებით გახდა ჩვენი ჯარი თანამედროვე, საერთაშორისო სტანდარტებით აღჭურვილი; ვისი დახმარებით გაძლიერდა სოფლის მეურნეობა და კიდევ, ვინ მოთვლის და რა დათვლის, რა დაგვიშავა მტერმა და რა გაგვიკეთა მეგობარმა. ამიტომ არის, რომ ჩვენს კონსტიტუციაში ასახული საგარეო კურსი ჩვენი უალტერნატივო მომავალია.
“არჩევნები ამ ქვეყნისთვის იმავე მნიშვნელობის იქნება, როგორიც 1918 წელს”
“ამ რეგიონში და ამ გეოპოლიტიკურ ვითარებაში, ჩვენთვის მშვიდობიანი პროცესების გარდა, გამოსავალი არაა. არ არის და ვერ იქნება გამოსავალი რევოლუციების, სახელმწიფო გადატრიალების, დესტრუქციის, ანუ დესტაბილიზაციის გზა.
ჩვენ კარგად ვიცით, რომ გარეთ ეს ხელს აძლევს მხოლოდ და მხოლოდ ჩვენს მტერს და შიგნით – ხელს უწყობს მშვიდობიანი პროცესის დივერსიად წარმოჩენას, დაშინებას, რეპრესიებს და საბოლოოდ, ავტორიტარული რეჟიმის გაძლიერებას. სტაბილურობის შენარჩუნების გზა კი მხოლოდ და მხოლოდ არჩევნებზე გადის.
არჩევნები დემოკრატიულობის ერთადერთი გზა და ერთადერთი საზომია, არჩევნები დემოკრატიულობის მთავარი ტესტი, რითაც ასევე უნდა შეფასდეს ჩვენი მზადყოფნა ევროკავშირში გაწევრიანებისთვის.
ამ არჩევნებით ჩვენ მთავარი არჩევანი უნდა გავაკეთოთ: ან ევროპული, დემოკრატიული, დამოუკიდებელი საქართველო, ან რუსული ყაიდის, ავტორიტარული და იზოლაციაში მყოფი საქართველო!
ასეთ არჩევანს კი სახალხო რეფერენდუმი ჰქვია. სწორედ ამიტომ, მომავალი არჩევნები ამ ქვეყნისთვის იმავე მნიშვნელობის იქნება, როგორიც 1918 წლის არჩევნები, ან 1991 წლის რეფერენდუმი იყო – ანუ ქვეყნის ისტორიული გადაწყვეტილება! ხალხის ხმამ და ხალხის ნებამ ქართველი ერი ხელახლა უნდა დაბადოს და მას საკუთარი თავისა და შესაძლებლობების რწმენა დაუბრუნოს.”
“არავინ არასოდეს არ უნდა ჩართოს სპორტსმენი პოლიტიკის მორევში”
“არავინ აღარ და არასოდეს არ უნდა ჩართოს თავისუფალი სპორტსმენი პოლიტიკის მორევში. ტოტალიტარული რეჟიმების მახასიათებელია, მიითვისონ სპორტსმენების გამარჯვებები, მიისაკუთრონ მათი მედლები და წარმატებები და ეს ყველაფერი ვითომც და მმართველი გუნდის დამსახურება იყოს. ეს მათი გამარჯვება კი არა, სპორტსმენებისა და მათთან ერთად მთლიანად ქვეყნის გამარჯვებაა, ამიტომ ვიზიარებთ ყველა სიხარულსა და სიამაყეს, როცა ისინი საქართველოდ დროშასა და ჰიმნს წარადგენენ მთელი მსოფლიოს წინაშე.”
