პრეზიდენტი: რა "რუსული კანონი“?! ვის რაში აინტერესებს "რუსული კანონის“ შეცვლა? ევროსაბჭოს გენერალური მდივანი ცოტა გაუგებრობაშია
პრეზიდენტი ალენ ბერსეს ვიზიტზე
ნათლად ავუხსენი [ევროსაბჭოს გენერალურ მდივანს] და მის დელეგაციას, რომ მათი არც მანდატი, არც მოვალეობა, არც უფლება არ არის, რომ რაღაც კომისია დანიშნონ ჯერ არავისგან აღიარებულ ხელისუფლებასთან, მით უმეტეს, განიხილონ „რუსული კანონი“, – ამის შესახებ საქართველოს პრეზიდენტმა სალომე ზურაბიშვილმა ბრიფინგზე განაცხადა.
როგორც პრეზიდენტმა განაცხადა, ევროსაბჭოს, როგორც ყველაზე ძველი ევროპული ორგანიზაციის პასუხისმგებლობა და მოვალეობაა, ხმა ამოიღოს „ხალხის მიმართ ძალადობის, მისი ყველა უფლებების შეზღუდვის მიმართ“.
რას ამბობს სალომე ზურაბიშვილი
“ახლახან შევხვდი ევროსაბჭოს გენერალურ მდივანს და მის დელეგაციას, რომლებიც ცოტა გაუგებრობაში არიან. კარგად არ ესმით აქაური სიტუაცია და მე ავუხსენი ის, რომ არ შეიძლება ამ ქვეყანაში მოსვლა, როცა შენ წარმოადგენ ყველაზე ძველ ევროპულ ორგანიზაციას და იმ ორგანიზაციას, რომელიც უშუალოდ პასუხისმგებელია ერთ რამეზე და მხოლოდ ერთ რამეზე, რომ დაიცვას დემოკრატიული პრინციპები, დაიცვას ადამიანის უფლებები, დაიცვას ადამიანის თავისუფლება.
ამ ორგანიზაციას აქვს ერთი პასუხისმგებლობა და მოვალეობა, რომ ხმა ამოიღოს, როცა მის წევრ რომელიმე ქვეყანაში ხდება ის, რაც ხდება საქართველოში ანუ ძალადობა ხალხის მიმართ, მისი ყველა უფლებების შეზღუდვა და ამის გაპროტესტება, ამის დაგმობა არის, ალბათ, პირველი მოვალეობა ასეთი ორგანიზაციის.
სამაგიეროდ, მე ნათლად ავუხსენი გენერალურ მდივანს და მის დელეგაციას, რომ მათი არც მანდატი, არც მოვალეობა, არც უფლება არ არის, რომ რაღაც კომისია დანიშნონ ჯერ არავისგან აღიარებულ ხელისუფლებასთან, მით უმეტეს, განიხილონ „რუსული კანონი“. რა „რუსული კანონი“?! ვის რაში აინტერესებს „რუსული კანონის“ შეცვლა თუ არ შეცვლა.
ეს არის ყველაზე კარგი მაგალითი, თუ როგორ იტყუება ეს ხელისუფლება. ხან უკან მიაქვს, ხან წინ და ხან ისევ უკან, ახლა რაღაცას ფორმალურად შევცლითო. ამით ჰგონიათ, რომ ვიღაცას მოხიბლავენ, შეიძლება ვიღაც მოხიბლონ, მაგრამ ვერ მოხიბლავენ ვერც ქართველ ხალხს, ვერც პარტნიორებს, რომლებსაც ძალიან კარგად ესმით დღევანდელი საქართველოს მდგომარეობა. შეიძლება ვიღაცას ნაკლებად ესმის და აქ ჩამოსვლის მერე უფრო გაერკვევა იმ ტყუილებში, რომელიც დღეს ხელისუფლებას ახასიათებს.“ – განაცხადა სალომე ზურაბიშვილმა.
საქართველოში ვიზიტად მყოფი ევროპის საბჭოს გენერალური მდივნის, ალენ ბერსეს თქმით, ის ქვეყანაში არჩევნების ლეგიტიმაციისთვის არ ჩამოსულა. მისივე განმარტებით, უწყებებთან შეხვედრაზე, საპროტესტო აქციებზე ადმინისტრაციული წესით დაკავებული ყველა დემონსტრანტის გათავისუფლება მოითხოვა.
ევროსაბჭოს გენერალურმა მდივანმა, დღეს გამართულ პრესკონფერენციაზე ასევე განაცხადა, რომ მთავრობამ გასცა დაპირება, რომ შეცვლის “უცხოური გავლენის გამჭვირვალობის შესახებ“ კანონის შინაარსს. მისივე თქმით, კანონის ცვლილებისთვის სამუშაო ჯგუფი შეიქმნება.
გარდა ამისა, ევროპის საბჭოს გენერალურმა მდივანმა განაცხადა, რომ შეშფოთებულია ანტი-ლგბტ დისკრიმინაციული კანონით და აღნიშნა, რომ ის შეუთავსებელია სტრასბურგის სასამართლოს პრეცედენტულ საქმეებთან და ევროპულ სტანდარტებთან.
ბერსემ ხაზი გაუსვა, რომ საქართველოში იმყოფებოდა წამების საწინააღმდეგო კომიტეტი [CPT], რომელმაც შეისწავლა დემონსტრანტების მდგომარეობა დაკავების შემდეგ და მათდამი მოპყრობის პირობები და წინასწარ შეფასებას მომდევნო კვირაში წარმოადგენს.
ევროსაბჭოს გენერალური მდივანი ასევე განმარტავს, რის შესახებ ისაუბრა “ქართული ოცნების“ დამფუძნებელთან, ბიძინა ივანიშვილთან შეხვედრაზე, რომელიც 18 დეკემბერს გაიმართა.
“ეს შეხვედრა იყო იმავე ელემენტებზე, რაც ყველა სხვა შეხვედრაზე – ვითარება საქართველოში, მოვლენების განვითარება ბოლო კვირებსა და თვეებში. [ვისაუბრეთ] საქართველოს ევროპულ ოჯახში ყოლის მნიშვნელობაზე, აღებულ ვალდებულებებზე – ეს მხოლოდ სიტყვებია თუ ფაქტებიც, რაც რეალობას შეესაბამება“?.. ხაზი გავუსვი ჩვენი მხრიდან შესაძლებლობას, რომ ვიმუშაოთ ყველა წევრთან, მათ შორის საქართველოსთან, რომ მოვახდინოთ ევროპული გზის იმპლემენტირება.“ – განაცხადა ალან ბერსემ.
