აეროპორტი ვაზიანში, დამატებითი ფრენები გერმანიაში, რუსული კანონი და ჩამოწერილი ვალები. პრემიერის ახალი ინიციატივები
პრემიერის ახალი ინიციატივები
არჩევნებამდე რამდენიმე თვით ადრე, საქართველოს მთავრობა აპირებს 145 ათას ფიზიკურ პირს სრულად ჩამოეწეროს 590 მლნ ლარის საგადასახადო დავალიანება, ასევე, EURO 2024-ზე გერმანიაში დამატებითი რეისებისთვის მუშაობა დაიწყება. პრემიერმინისტრ ირაკლი კობახიძის თქმით, ვაზიანში აშენდება ახალი აეროპორტი. პრემიერმა ისაუბრა ე.წ. რუსულ კანონზეც და განაცხადა, რომ “შარშან მოახერხეს, თავდაყირა დააყენეს ღირებულებები”, ახლა კი ამ კანონს აუცილებლად მიიღებენ.
რა თქვა საქართველოს პრემიერმა:
- ირაკლი კობახიძე – საქართველოს ახალი პრემიერ-მინისტრი. მოკლედ მისი პოლიტიკური ცხოვრების მთავარი დეტალები
- პაატა ზაქარეიშვილის კომენტარი: “ქართული ოცნება“ ევროპაში ერთადერთი ევროფარისევლური პარტიაა, ამბობს ერთს, აკეთებს – მეორეს
- ნოდარ ხარშილაძის კომენტარი: დღეს “ქართულ ოცნებაში” შიდა სამოქალაქო ომია
რუსულ კანონზე
“დემოკრატიულ საზოგადოებაში გამჭვირვალობას არ აქვს ბუნებრივია, ალტერნატივა. ვერავინ ვერ ასაბუთებს – რატომ შეიძლება იყოს გამჭვირვალობა ცუდი…
შინაარსში არის ყველაფერი გამართული, კანონპროექტი არის თავიდან ბოლომდე გამართული, ერთადერთი, რასაც ითვალისწინებს ეს კანონი, არის წლიური დეკლარირება იმ ფინანსებისა, რომელიც აქვს არასამთავრობო ორგანიზაციებს, შესაბამის მედიასაშუალებებს და გვიმტკიცებენ, რომ გამჭვირვალობა არის რუსული და გაუმჭვირვალობა – ევროპული.
შარშან მოახერხეს და საზოგადოების მნიშვნელოვანი ნაწილი შეიყვანეს შეცდომაში, თავდაყირა დააყენეს ღირებულებები, თუმცა, ამას მეორედ, დარწმუნებული ვარ, ვეღარ შეძლებენ.” – განაცხადა კობახიძემ.
“EURO 2024-ზე გერმანიაში დამატებითი რეისებისთვის მუშაობა დაიწყება”
ირაკლი კობახიძის თქმით, ევროპის საფეხბურთო ჩემპიონატისთვის, გერმანიაში დამატებითი პირდაპირი რეისების განსახორციელებლად მთავრობა მუშაობას დაიწყებს.
“როგორც მოგეხსენებათ, 18 ივნისიდან საქართველოს ეროვნული საფეხბურთო ნაკრები ევროპის ჩემპიონატზე მატჩებს გამართავს. თვითმფრინავის ბილეთებზე ძალიან დიდი მოთხოვნაა, რითაც ავიაკომპანიებმა უკვე ისარგებლეს. ეკონომიკის კანონია, მოთხოვნა განსაზღვრავს მიწოდებას. შესაბამისად, ავიაბილეთებზე ფასები გაიზარდა – რიგ შემთხვევებში, რამდენჯერმეც კი.
მინდა, ეკონომიკის სამინისტროს ვთხოვო, რომ გერმანიაში, დიუსელდორფისა და ჰამბურგის მიმართულებით დამატებითი პირდაპირი რეისების უზრუნველსაყოფად მუშაობა დავიწყოთ. მნიშვნელოვანია, რომ ჩვენს თანამოქალაქეებს ბილეთები ფიქსირებული, დაბალი ტარიფით შევთავაზოთ”. – თქვა კობახიძემ მთავრობის სხდომაზე.
“145 ათას ფიზიკურ პირს სრულად ჩამოეწერება 590 მლნ ლარის საგადასახადო დავალიანება”
“საქართველოში საკმაოდ დიდი რაოდენობით არიან ფიზიკური პირები, რომლებსაც ერიცხებათ საგადასახადო დავალიანება და ამის გამო ისინი მოკლებული არიან შესაძლებლობას, რომ აწარმოონ ეკონომიკური საქმიანობა, ამიტომ გადავწყვიტეთ, რომ ჩამოვწეროთ შესაბამისი დავალიანებები.
კერძოდ, ყველა ფიზიკურ პირს, მათ შორის ინდივიდუალურ მეწარმეებს, სრულად ჩამოეწერებათ 2021 წლის 1 იანვრამდე წარმოშობილი და გადაუხდელი აღიარებული საგადასახადო დავალიანება, მათზე დარიცხული საურავების ჩათვლით.
როგორც კი მივიღებთ ამ კანონპროექტს 145 ათას ფიზიკურ პირს სრულად ჩამოეწერება ჯამში 590 მილიონი ლარის ოდენობის საგადასახადო დავალიანება. შესაბამისად, 145 ათას ჩვენს თანამოქალაქეს ექნება საშუალება, რომ აქტიურად ჩაერთოს ჩვენ ეკონომიკურ ცხოვრებაში, რაც ეკონომიკის განვითარებასაც, ბუნებრივია, წაადგება.” – თქვა კობახიძემ.
არჩევნების წინ ვალების ჩამოწერა პირველი შემთხვევა არ არის. 2018 წელს, საპრეზიდენტო არჩევნების წინ, საქართველოს მაშინდელმა პრემიერმინისტრმა მამუკა ბახტაძემ მთავრობის ახალ ინიციატივაზე ისაუბრა და თქვა, რომ ე.წ საბანკო „შავ სიაში“ მყოფ 600 ათას ადამიანს სესხები ჩამოეწერება. პროექტის მიხედვით, მაშინ ჯამურად 1,5 მილიარდი ლარის ღირებულების სესხი ჩამოიწერა.
“ვაზიანში აეროპორტი აშენდება, რამდენიმე წელში გვექნება ულტრათანამედროვე აეროპორტი”
“გუშინ გაიმართა ეკონომიკური საბჭოს სხდომა, სადაც მივიღეთ უმნიშვნელოვანესი გადაწყვეტილება ახალი მეგაპროექტის განხორციელების შესახებ. კერძოდ, თბილისში აშენდება ახალი საერთაშორისო აეროპორტი.
დღევანდელი აეროპორტის გამტარუნარიანობა არის დაახლოებით 4-4.5 მილიონი მგზავრი, იცით, რომ ჩვენ გვაქვს ძალიან დადებითი დინამიკა ტურიზმის სფეროში, მოსალოდნელია მომავალშიც ვიზიტორების რაოდენობის სწრაფი და თანმიმდევრული ზრდა, რასაც ფეხი უნდა აუწყოს ბუნებრივია, ინფრასტრუქტურამ.
ჩვენ განვიხილეთ ორი ალტერნატიული ვარიანტი, ერთი გულისხმობდა არსებული აეროპორტის გაფართოებას, მეორე – ახალი აეროპორტის მშენებლობას ვაზიანში.
გაფართოების ფასი იყო დაახლოებით 900 მილიონი დოლარი, ახლის აშენების – დაახლოებით მილიარდ ორას სამოცი მილიონი დოლარი.
გაფართოება იძლეოდა საშუალებას, მგზავრთა ნაკადი გაგვეზარდა მაქსიმუმ 15 მილიონ მგზავრამდე და შემდეგი განვითარების პერსპექტივა აღარ იყოს. რაც შეეხება ახალი აეროპორტის მშენებლობას, ახლის მშენებლობა გვაძლევს 19 მილიონამდე მგზავრების რაოდენობის გაზრდის საშუალებას შემდგომი გაფართოების პერსპექტივით. ახალი აეროპორტი იქნება სრულ შესაბამისობაში უმაღლეს თანამედროვე სტანდარტებთან.
არაერთი ფაქტორის გათვალისწინებით, საბოლოო ჯამში, მივიღეთ გადაწყვეტილება სწორედ ახალი აეროპორტის მშენებლობის თაობაზე.
მომავალ წელს დასრულდება პროექტირება, ტენდერის პროცედურები და ამის შემდეგ, რამდენიმე წელიწადში თბილისს ექნება, ქვეყანას ექნება სრულიად ახალი, ულტრათანამედროვე აეროპორტი, ეს არის უმნიშვნელოვანესი გადაწყვეტილება.”
ვაზიანის აეროპორტის მშენებლობა ერთი წლის წინ მაშინდელმა პრემიერმინისტრმა, ირაკლი ღარიბაშვილმა დააანონსა. ირაკლი ღარიბაშვილის თქმით, მთავრობას სურს, რომ ქვეყანა “რეგიონში საავიაციო ჰაბი” გახდეს და სწორედ ამ მიზნით ახალი აეროპორტის მშენებლობისთვის ვაზიანის სამხედრო აეროდრომის ტერიტორია შეირჩა. მისივე განმარტებით, ამჟამად პროექტის შესწავლა მიმდინარეობს.
