პრემიერი: სხვა კანდიდატი რომც გავიდეს, ჩვენ გარეშე ნაბიჯს ვერ გადადგამს

საქართველოს პრემიერი, ირაკლი ღარიბაშვილი ამბობს, რომ იმ შემთხვევაშიც კი, თუ მეორე ტურში, რომელიმე მუნიციპალიტეტში ოპოზიციონერი კანდიდატი გაიმარჯვებს, ცენტრალური მთავრობის გარეშე ნაბიჯს ვერ გადადგამს – ამის შესახებ მან სენაკში, მოსახლეობასთან გამართულ შეხვედრაზე განაცხადა, სადაც მეორე ტურში ოპოზიციიდან “ნაციონალური მოძრაობის” წევრი, კობა ნაყოფია იღებს მონაწილეობას.

“მინდა სენაკელებს მივმართო, რა პერსპექტივა აქვს კობა ნაყოფიას, რა უნდა გააკეთოს კობა ნაყოფიამ? მითუმეტეს, ხელისუფლება ჩვენია, ცენტრალური მთავრობა ჩვენია, ჩვენ გარეშე ნაბიჯს ვერ გადადგამს.

თეორიულადაც ვიძახი და ჰიპოთეტურადაც ვამბობ, რომ ნებისმიერ მუნიციპალიტეტში სხვა კანდიდატი რომ გავიდეს, ცენტრალური მთავრობის გარეშე, უბრალოდ, პერსპექტივა არ აქვს. ეს არის თავის მოტყუება, თავის დაჩაგვრა და დასჯა გამოდის”, – თქვა ღარიბაშვილმა.

● ხაზარაძე, ჯაფარიძე, ხოშტარია, აბესაძე – ოპოზიციამ ჩრდილოვანი კაბინეტი დაასახელა
● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?
● შიმშილობენ თუ არა ბავშვები საქართველოში და სჭირდებათ თუ არა მათ უფასო კვება სკოლაში

მის ამ განცხადებას საბოტაჟად აფასებს ოპოზიცია. “ნაციონალური მოძრაობის” ერთ-ერთი ლიდერის, ხატია დეკანოიძის თქმით, ის რაც დღეს საქართველოს პრემიერმა თქვა, არის საკუთარი მოსახლეობის მიმართ მიზანმიმართული დანაშაულის განაცხადი.

“ღარიბაშვილის დღევანდელი განცხადება, გარდა სიძულვილის ენისა, არის პირდაპირი დასტური, რომ ხელისუფლება მზად არის საბოტაჟი მოუწყოს საკუთარ მოსახლეობას. პირდაპირ აანონსებს, რომ ოპოზიციური კანდიდატების გამარჯვების შემთხვევაში ხალხი “დაიჩაგრება”. კონტროლი აქვს დაკარგული ეს გასაგებია”, – თქვა დეკანოიძემ.

ხოლო “ნაციონალური მოძრაობის” თავმჯდომარე და თბილისის მერობის კანდიდატი ნიკა მელია ამბობს, რომ რაც უფრო ხშირად ისაუბრებს ღარიბაშვილი, უფრო დიდი სხვაობით გამარჯვებაში შეეხიდება ოპოზიციას:

“მე არ ვაპირებ ქართული ოცნების დამარცხებას, ჩვენ ვაპირებთ გამარჯვებას. ბევრ რამეს ცდილობენ, მაგრამ ვინ დაუჯერებს ქართულ ოცნებას?! მათ რისი თქმა უნდათ, რომ არჩევითობას აზრი არ აქვს? არსად არასოდეს არ შეიძლება, ოპოზიციამ გაიმარჯვოს? სულ ჩვენ უნდა ვიყოთო? მე მირჩევნია, საზოგადოებას ვესაუბრო, რომელიც კარგად არის საქმის კურსში და იცის, რომ ცვლილებებს გამარჯვება სჭირდება. 

ბატონი ღარიბაშვილი იმასაც ამბობს, დღეს სენაკში ჩავიდა – კობა ნაყოფიას გამარჯვება როგორ შეიძლება, მას სენაკში სახლი არ აქვსო. რაც უფრო მეტად გამოჩნდება ბატონი ღარიბაშვილი, რაც უფრო ხშირად ისაუბრებს ისე, როგორც საუბრობს, ჩვენ უფრო დიდი სხვაობით გამარჯვებაში გაგვიწევს დახმარებას და შეგვეხიდება.”

● რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი
● ხუთი ნიშანი, რომელიც მიუთითებს, რომ საქართველოში თვითმმართველობა არ არის

2 ოქტომბერს, საქართველოში ადგილობრივი თვითმმართველობის არჩევნები გაიმართა. მოსახლეობას უნდა აერჩია 64 მერი და საკრებულოს 2044 დეპუტატი. ძირითად თვითმმართველ ქალაქებში მეორე ტურები ჩაინიშნა (მათ შორის თბილისში, ქუთაისში, რუსთავში, ზუგდიდში და თელავში), სწორედ მეორე ტურებისთვის ემზადება ოპოზიცია 30 ოქტომბერს.

მერის არჩევნებში ის კანდიდატი გაიმარჯვებს, რომელიც არჩევნებში ამომრჩეველთა ხმების 50%-ზე მეტს მიიღებს. ამასთან, საარჩევნო რეფორმის შედეგად, 40%-იანი ბარიერი მოქმედებს საკრებულოების მაჟორიტარი წევრების ასარჩევად.

ეს რიგით მერვე თვითმმართველობის არჩევნებია, რომელიც დამოუკიდებელ საქართველოში ჩატარდა.

ეს არჩევნები, თავისი მნიშვნელობით, ოპოზიციამ და არამხოლოდ ოპოზიციამ, მისი დანიშვნის დღიდანვე შეაფასა რეფერენდუმის ტოლფასად.