პრემიერი: ჩვენ უნდა დავლაგდეთ ყველასთან, მათ შორის გლობალური ომის პარტიასთანაც
პრემიერი გლობალურ ომის პარტიაზე
პრემიერმინისტრი ირაკლი კობახიძე აშშ-ში მიწვევის გაუქმებაში ე.წ. გლობალური ომის პარტიის კვალს ხედავს. მისი თქმით, საქართველო უნდა დალაგდეს ყველასთან, მათ შორის გლობალური ომის პარტიასთანაც. ამის შესახებ ირაკლი კობახიძემ სპეციალურ ბრიფინგზე ისაუბრა.
ამასთან, კობახიძე ტყუილს უწოდებს გავრცელებულ ინფორმაციას იმაზე, რომ მას აშშ-ში ყოფნის დროს, პრეზიდენტობის კანდიდატ დონალდ ტრამპთან ან რესპუბლიკელების სხვა წარმომადგენლებთან შეხვედრის მცდელობა ჰქონდა.
25 სექტემბერს აშშ-ს საელჩომ საქართველოში დაადასტურა გავრცელებული ინფორმაცია, რომ მსოფლიო ლიდერებისა და გაეროს მაღალჩინოსნების ტრადიციულ მიღებაზე ბაიდენის ადმინისტრაციამ საქართველოს პრემიერმინისტრს, ირაკლი კობახიძეს მიწვევა გაუუქმა, ხოლო საქართველოს დელეგაციასთან ყველა შეხვედრაზე უარი თქვა.
რა თქვა პრემიერმა
● რაც შეეხება ვახშამს, თუ ხელის ჩამორთმევას, იქ მონაწილეობას. იყო მიწვეული ყველა დელეგაცია, 200 ქვეყანა. ამ ორასი ქვეყნიდან რამდენია ავტორიტარული? დაახლოებით ნახევარი არის თვითაღიარებული, ან სხვებისგან აღიარებული ავტოკრატია […] და ისინი იყვნენ მიწვეული. სად არის აქ ლოგიკა? ლოგიკა არის ერთადერთ რამეში, ამ შემთხვევაშიც ყველაფერში ურევია გლობალური ომის პარტიის ხელი.
●ჩვენ უნდა დავლაგდეთ ყველასთან, მათ შორის გლობალურ ომის პარტიასთანაც, მას შემდეგ რაც შეიცვლება ინტერესები, ინტერესები არის დროებითი, ინტერესები იცვლება ვითარების ცვლილებასთან ერთად.
მას შემდეგ, რაც დასრულდება ორი არჩევნები, მას შემდეგ რაც დასრულდება ომი უკრაინაში, ჩვენ ვართ დარწმუნებული, რომ თვისებრივად შეიცვლება ინტერესები ჩვენი ქვეყნის მიმართ და შესაბამისად გვექნება ურთიერთობების გადატვირთვის საშუალება ყველასთან და ყველაფერთან
● [ტრამპთან შეხვედრის შესახებ] ეს არის აბსოლუტური სიცრუე. ჩვეულებრივი ტყუილია. ლელოს ერთ-ერთი ექსპერტის მხრიდან მოდიოდა ის ინფორმაციას, რომ თითქოს ჩვენ ისრაელის ხელისუფლების დახმარების ვცდილობდით გარკვეული შეხვედრების ორგანიზებას. ზუსტად იგივე ტყუილია.
● მინდა შეგახსენოთ, რომ ეს [სალომე ზურაბიშვილის] ვიზიტი [ევროპაში] არის არაკონსტიტუციური, რაც არის მკაფიო სამართლებრივი მოცემულობა და ასეთ დროს, როდესაც კონკრეტული პოლიტიკური ლიდერები ევროპაში ხვდებიან სალომე ზურაბიშვილს, ამით ისინი გამოხატავენ უხეშ უპატივცემულობას საქართველოს კონსტიტუციური წესრიგის მიმართ.
● საქართველოს კონსტიტუციის უზენაესობა არის ის პრინციპი, რომელიც უნდა დაიცვან არა მხოლოდ საქართველოს მოქალაქეებმა, არამედ უცხოელმა პარტნიორებმაც, რაც სამწუხაროდ არ ხდება. ეს მეტყველებს გარკვეულ ღირებულებით პრობლემებზე, რომელიც სხვადასხვა მიმართულებით შეიმჩნევა კონკრეტულ ქვეყნებში. როდესაც პატივს არ სცემ კანდიდატი ქვეყნის კონსტიტუციას, ეს არის, რა თქმა უნდა, ამ ქვეყნის კონსტიტუციის უზენაესობის მიმართ უპატივცემულობის გამოხატულება.
“ქართული ოცნების” საპატიო თავმჯდომარემ, ბიძინა ივანიშვილმა პირველ ოქტომბერს განცხადება გაავრცელა, რომელშიც ამბობს, რომ “ფინანსურ შანტაჟში” არც აშშ-სა და არც ევროკავშირს არ ადანაშაულებს, არამედ ამაში დამნაშავე ე.წ. გლობალურ ომის პარტიაა.
როგორც ივანიშვილი ამბობს, ე.წ. გლობალური ომის პარტიას, რომლის არსებობას მხოლოდ ქართული ოცნება და მისი ლიდერები ამტკიცებენ და დღემდე უცნობია, რას წარმოადგენს ის, გავლენა აქვს პოლიტიკოსებსა და ბიუროკრატებზე როგორც აშშ-ში, ისე ევროკავშირში.
ივანიშვილის თქმით, თავისი პოზიცია მან ამერიკელ კოლეგებს წერილობითაც აცნობა და საელჩოს მოწოდების შემთხვევაში, მზად არის წერილის შინაარსზე საჯაროდაც ისაუბროს.
