პოლიციამ ბლოგერი უჩა აბაშიძე დააკავა. რა ვიცით ამ დროისთვის

პოლიციამ სამხედრო ბლოგერი უჩა აბაშიძე დააკავა

პოლიციამ თბილისში ბლოგერი და სამხედრო ექსპერტი უჩა აბაშიძე დააკავა, რომელიც რუსული კანონის წინააღმდეგ აქციებში აქტიურად მონაწილეობს. ადვოკატის, გიორგი მახარაძის თქმით, უჩა აბაშიძეს იარაღისა და საბრძოლო მასალის მართლსაწინააღმდეგო უკანონო შეძენა-შენახვას ედავებიან. მისივე განმარტებით, აბაშიძესთან მხოლოდ სამი წუთით გასაუბრების საშუალება ჰქონდა.

“უკვე დაკავებული ადამიანი ჩამოჰყავდათ სახლიდან, მაშინ აგვიშვეს ჩვენ. დაცვის უფლება უჩა აბაშიძეს უკვე დარღვეული აქვს

“მას ყველანაირი იარაღი, რამდენადაც ჩვენთვის ცნობილია და რამდენადაც ჩვენ განგვიცხადა, აქვს კანონიერად რეგისტრირებული, თუმცა, მან ასევე განაცხადა ისიც, რომ რაღაც ნივთები გაიტანეს მისი სახლიდან, სხვა ოთახიდან, სადაც ის არ იმყოფებოდა, რაც მას თვალით არ უნახავს. ჩვენ, ადვოკატებს შესაძლებლობა არ გვქონია, რომ პროცესში სრულყოფილად ჩავრთულიყავით…

ეკითხებოდნენ, რატომ აქვს სკუტერი, რატომ აქვს აირწინაღი, პირბადეები.” – ამბობს ადვოკატი.

უჩა აბაშიძის დაკავებას მისი ძმა გამოეხმაურა. მისი თქმით, უჩა სტრაიკბოლის ფედერაციის ხელმძღვანელია, ამიტომ ბევრი სათამაშო იარაღი აქვს და პოლიციამ მისი ბინიდან სათამაშო იარაღები გამოიტანა. 

“უჩა მოლაშქრეა, ყველამ იცის, მილიტარისტია… სტრაიკბოლის ფედერაციის ხელმძღვანელია, სათამაშო იარაღები გამოიტანეს.” – განაცხადა უჩა აბაშიძის ძმამ.

სტრაიკბოლი – სპორტის ან ჰობის სახეობა, სადაც მოთამაშეები ებრძვიან ერთმანეთს სპეციალური იარაღით. სტრაიკბოლის იარაღი ისვრის პლასტმასის 6 მმ–იან ბურთულებს, რომელთა წონა შეიძლება იყოს 0.12 დან 0.88 გრ მდე. სასროლი მექანიზმი შეიძლება იყოს გაზის, ზამბარიანი ხელის დატენვით ან ზამბარიანი ავტომატური დატენვით. სპორტის ეს სახეობა დაფუძნებულია Fair play-ს პრინციპზე, რაც გულისხმობს იმას, რომ ყოველი მოთამაშე თავად აღიარებს მოწინააღმდეგის “ტყვიის” მოხვედრას და ეთიშება თამაშს. 

ამ დროისთვის აბაშიძის სახლთან მის მხარდასაჭერად მოქალაქეები არიან შეკრებილნი.

მუქარა, გინება, ცემა. რა ფაზაში შევიდა "ქართული ოცნება". ექსპერტების კომენტარები

“ჩვენ ახლა ვუყურებთ სრული სვლით სვლას ავტორიტარიზმისკენ”

პოლიცია ბლოგერის სახლში დაახლოებით 22:00 საათზე შევიდა. აბაშიძეს, მისი ძმის თქმით, ამ დროის განმავლობაში, ტელეფონის გამოყენება და ადვოკატთან დაკავშირების საშუალება არ ეძლეოდა. 

ბლოგერის ასევე ძმა ამბობს, რომ დაკავება რუსული კანონის საწინააღმდეგო აქციებზე უჩა აბაშიძის აქტიურობას უკავშირდება.

“მგონი, ყველამ იცის რას შეიძლება უკავშირდებოდეს [დაკავება]. ეს არის იმ დაშინების მცდელობების გაგრძელებაა, რაც აქამდე იყო. ახლა გვეშინია, სახლში რომ არ გვიშვებენ რამე არ ჩაუდონ, ან რამე სისულელე არ მოუგონონ.” – თქვა მან. 

● ევროკავშირის სპეციალური წარმომადგენელი სამხრეთ კავკასიაში: საით მიდიხარ, საქართველო?
● “ვიწყებთ ბაზის შექმნას, სადაც თავს მოიყრის ინფორმაცია შანტაჟში ჩართულ პირებზე” – შალვა პაპუაშვილი

იმ ადამიანების წინააღმდეგ, ვინც აქტიურად აპროტესტებს “აგენტების კანონს”, ფართომასშტაბიანი სიძულვილის კამპანია დაიწყო.

ადამიანებს თავს ესხმიან და სასტიკად უსწორდებიან დაუდგენელი ჯგუფები. აქტივისტების სახლებსა და ოფისებთან აკრავენ შეურაცხმყოფელ პლაკატებს. უტოვებენ შეურაცხმყოფელ წარწერებს მანქანებზე.

ადამიანებს უშლიან საზოგადოებრივი თავშეყრის ადგილებში გადაადგილებას, თუ მათ სამოსზე წარწერა “არა რუსულ კანონს”, ან მსგავსი შინაარსია.

გარდა ფიზიკური ძალადობისა, “აგენტების კანონის” მოწინააღმდეების მიმართ ხორციელდება ფსიქოლოგიური ძალადობა და მუქარა. მათ ტელეფონზე ურეკავენ, აგინებენ და ემუქრებიან.

აღსანიშნავია, რომ პოლიციელზე ძალადობაში ბრალდებული კიდევ 4 მოქალაქეს – ანდრეი რაუტბერგს, გიორგი შანიძეს, ვაჟა დურგლიშვილსა და ფრიდონ ბუბუტეიშვილს – სასამართლომ პატიმრობა შეუფარდა. ისინი აპრილის აქციებზე დააკავეს.

მანამდე პატიმრობა შეუფარდეს გიორგი კუჭუაშვილსა და დავით კოლდარს. კოლდარმა პროცესზე “ბრალი აღიარა”.