"აგენტების კანონის" მოწინააღმდეგეებს ტელეფონზე ურეკავენ, აგინებენ და ემუქრებიან
ზარები და გინება აგენტების კანონის მოწინააღმდეგეებთან
სოციალური ქსელები გაივსო პოსტებით, სადაც სამოქალაქო აქტივისტები, ჟურნალისტები, ოპოზიციონერი პოლიტიკოსები და არასამთავრობო ორგანიზაციების წარმომადგენლები წერენ, რომ მათ ტელეფონის ნომრებზე რეკავენ უცნობი ადამიანები და აგინებენ.
ინფორმაცია ზარების შესახებ პირველად 7 მაისს გავრცელდა. “აგენტების კანონის” მოწინააღმდეგეები აღნიშნავდნენ, რომ მათ უცხო ქვეყნის ნომრებიდან ურეკავდნენ.
ზარების სამიზნე ის ადამიანები გახდნენ, რომლებიც ღიად და საჯაროდ გამოხატავენ პროტესტს ხელისუფლების მიერ ინიციირებული “აგენტების კანონის” წინააღმდეგ, რომელიც ორი მოსმენით პარლამენტმა უკვე მიიღო და რომლის გამოც უკვე სამი კვირაა საპროტესტო გამოსვლები არ წყდება.
8 მაისს ზარები გაგრძელდა კიდევ უფრო ინტენსიურად, თუმცა ამჯერად უმეტესად ქართული ოპერატორების ნომრებიდან.
რამდენიმე ადამიანმა ზარი ჩაიწერა და ფეისბუკზეც გააზიარა.
სცენარი ყველა შემთხვევაში თითქმის ერთი და იგივეა – კითხულობენ ვინაობას და შემდეგი კითხვაა, წაკითხული აქვთ თუ არა კანონპროექტი. ამის შემდეგ ისმის გინება, შეურაცხყოფა და მუქარა.
ნინო ზურიაშვილი გამომძიებელი ჟურნალისტია სტუდია “მონიტორიდან”. ის ფეისბუკზე წერს, რომ ორი დღეა უცნობი ნომრებიდან პერმანენტულად ურეკავენ.
![](https://jam-news.net/app/uploads/2024/05/Screenshot-2024-05-08-at-19.44.48.png)
“გუშინ მლანძღეს. მე ვუსმენდი და ვეკითხებოდი რა გინდათ მეთქი. მიპასუხა, რატომ ეძახი გამჭვირვალობის ევროპულ კანონს რუსულსო. დღეს აღარ ვპასუხობ. ჯერ ვაიბერზე მირეკავენ და მერე ჩვეულებრივ ზარზე. ერთხელ გადავურეკე უკან და ეს ნომერი რეგისტრირებული არ არისო,” – უთხრა ზურაშვილმა JAMnews.
● “ვიწყებთ ბაზის შექმნას, სადაც თავს მოიყრის ინფორმაცია შანტაჟში ჩართულ პირებზე” – შალვა პაპუაშვილი
● აღდგომის ღამე თბილისში. პროტესტი სანთლებით ხელში
● ანალიტიკოსის კომენტარი: ოცნების ბოლო პერიოდის რიტორიკა გზის ბოლოს გულისხმობს უარს ნატოსა და ევროკავშირზე
მისი თქმით, ნომრების ბაზა, სავარაუდოდ შსს-ს მიერ არის გაცემული:
“დიდი ალბათობით, ეს ბაზა აღებული აქვთ შსს-დან, რადგან რამდენიმე ზარიდან გამოიკვეთა, რომ იციან მოქალაქეების პირადი მონაცემები,” – ამბობს ზურიაშვილი.
მუქარის ზარები მიიღო „რეგიონულ მაუწყებელთა ალიანსის“ დირექტორმა, ნათია კუპრაშვილმაც, რომელმაც ამის შესახებ ფეისბუკზე აწერა.
კუპრაშვილი JAMnews-ს უყვება, რომ ოთხჯერ დაურეკეს:
“პირველად უკრაინული ნომრით, რატომ ეძახი გამჭვირვალობის კანონს რუსულ კანონსო. ვულგარულად მელაპარაკებოდნენ. შემდეგ ღამის სამ საათზე ჩადის ნომრით შემოვიდა ზარი. დღეს დილით გერმანული ნომრიდან. და ბოლოს, 8 მაისს, საღამოს დამირეკეს ქართული ნომრით უკვე მუქარით – შენს სახლთან ვდგავართ და ჩამოდიო. მისამართი იცოდნენ, თან დედაჩემის მისამართი. ამ ყველაფრის ფონზე, პარლამენტის თავმჯდომარე გვპირდება კრიტიკოსთა სიის გაკეთებას. ეს ყველაფერი არ არის კარგის ნიშანი. პერსონალურად არ ვაპირებ შსს-ს მივმართო. აზრს ვერ ვხედავ, რომ ეს გავაკეთო. ისედაც ყველაფერი საჯაროა, ყველამ საჯაროდ დავწერეთ და მოვყევით, რომ გვირეკავენ და გვემუქრებიათ. თუ უნდათ, შეუძლიათ გამოიძიონ,” – ამბობს „რეგიონულ მაუწყებელთა ალიანსის“ დირექტორი, ნათია კუპრაშვილი.
მუქარის და გინების ზარის ჩანაწერს აქვეყნებს პოპულარულ ქართველი იუთუბერი გიორგი მახარაშვილი, იგივე საჭირო კაცი. მახარაშვილმა საჯაროდ დაგმო აგენტების კანონი და საპროტესტო აქციებშიც აქტიურად მონაწილეობს.
ჩანაწერში ისმის, როგორ აგინებს და ლანძღავს უცნობი მახარაშვილს და ეკითხება, თუ რატომ ეძახის ის გამჭვირვალობის კანონს რუსულს.
„უცხოური აგენტების შესახებ“ კანონპროექტი მმართველმა პარტიამ, “ქართულმა ოცნებამ” პირველად ერთი წლის წინ, 2023 წლის მარტში დააინიცირა. პარლამენტმა ის პირველი მოსმენით მიიღო, მაგრამ მოქალაქეების მასობრივი პროტესტისა და დასავლეთის მწვავე კრიტიკის შედეგად, ხელისუფლებამ კანონი გაიწვია.
2024 წლის 3 აპრილს ცნობილი გახდა, რომ მმართველმა პარტიამ გადაწყვიტა კვლავ დაებრუნებინა კანონპროექტი პარლამენტში. შინაარსი იგივე დატოვეს, ოღონდ ამჯერად დაარქვეს „უცხური გავლენის გამჭვირვალობის შესახებ“ კანონი.
წელს კანონპროექტის დაბრუნებას კიდევ უფრო მასშტაბური პროტესტი მოჰყვა, ვიდრე შარშან. ათი ათასობით ადამიანი გამოვიდა ქუჩებში საპროტესტო აქციაზე. საქართველოს დასავლელი პარტნიორები მკვეთრად აკრიტიკებენ კანონპროექტს და ღიად აფრთხილებენ ხელისუფლებას, რომ ამ კანონის მიღება დიდ პრობლემებს შეუქმნის საქართველოს ევროპასთან ინტეგრაციის გზაზე. კანონი ორი მოსმენით უკვე მიიღეს. 17 მაისს პარლამენტი აპირებს იგი მესამე მოსმენით მიიღოს.