ოპოზიციურმა პარტიებმა ერთობლივ დოკუმენტს მოაწერეს ხელი. ისინი პარლამენტში არ შევლენ
არჩევნებში მონაწილე ოპოზიციურმა პოლიტიკურმა პარტიებმა ერთობლივ განცხადებას მოაწერეს ხელი იმის შესახებ, რომ ახალი მოწვევის პარლამენტში არ შევლენ.
განცხადებას ხელს აწერენ როგორც ის პარტიები, რომელთაც გადალახეს პარლამენტში მოსახვედრი ზღვარი, ასევე ისინიც, რომელთა შედეგიც 1 პროცენზე დაბალია.
დოკუმენტს ხელს აწერენ:
“ერთიანი ნაციონალური მოძრაობა”
“ევროპული საქართველო”
“ლელო”
“სტრატეგია აღმაშენებელი”
“პატრიოტთა ალიანსი”
“მოქალაქეები”
“ლეიბორისტული პარტია”
“რესპუბლიკური პარტია”
“კანონი და სამართალი”
“ევროპელი დემოკრატები”
“ერთიანი საქართველო”
“ტრიბუნა”
“გამარჯვებული საქართველო”
“სამართლიანობისთვის”
“თავისუფალი დემოკრატები”
“თავისუფლება”
“თავისუფალი საქართველო”
“გირჩი”
“ქრისტიან დემოკრატიული მოძრაობა”
რას ითხოვს ოპოზიცია
ოპოზიციის ლიდერები მოითხოვენ:
1) არჩევნების შედეგების გაუქმებას და ხელახალ არჩევნებს
2) იმ სისტემური საარჩევნო დარღვევების აღმოფხვრას, რამაც მასობრივი გაყალბება გამოიწვია. მათ შორის, ითხოვენ ცენტრალური საარჩევნო კომისიის დაკომპლექტების წესის შეცვლას.
ცესკომ ბიულეტენების 100 პროცენტი დაითვალა. ოფიციალური შედეგები ასეთია:
1. მმართველი პარტია “ქართული ოცნება” – 48,24%
2.”ნაციონალური მოძრაობა -გაერთიანებული ოპოზიცია” – 27.15%
3. “ევროპული საქართველო – 3,79%
4. “პატრიოტთა ალიანსი” – 3.14%
5. “ლელო” – 3.16%
6. “სტატეგია აღმაშენებელი” – 3.15%
7. “გირჩი” – 2.89%
8. მოქალაქეები – ალეკო ელისაშვილი – 1.33%
„ჩვენ, ოპოზიციური პარტიები, რომელთაც გაგვიყალბეს არჩევნები, უარს ვამბობთ საპარლამენტო მანდატებზე და გადავდგამთ ყველა პოლიტიკურ და სამართლებრივ ნაბიჯს, რომ დე იურე და დე ფაქტო არ შევიდეთ ამ ეგრეთწოდებულ პარლამენტში. ჩვენ არ მივიჩნევთ ამ პარლამენტს ლეგიტიმურად, რადგან ეს არის უკანონო ქმედებების შედეგად არჩეული და არ გამოხატავს ხალხის ნებას“, – წერია დოკუმენტში.
● რას ურჩევენ ოპოზიციას ექსპერტები და პოლიტიკოსები
● ოპოზიცია: არ მივიღებთ გადმოგდებულ მანდატებს
● ოპოზიცია ვადამდელ არჩევნებს ითხოვს
ლიდერების კომენტარები:
“ასეთი ერთიანობა ოპოზიციისა საქართველოში აქამდე არასდროს არ ყოფილა და ეს კიდევ ერთხელ ადასტურებს იმას, რომ ამ გაყალბებული არჩევნების ფონზე „ქართული ოცნება“ არის სრულიად მარტო და მას უპირისპირდება მთელი ოპოზიციური სპექტრი და ქართული საზოგადოების ძალიან დიდი ნაწილი, რომელსაც საკუთარი ნების წინააღმდეგ – გადაკეთებული ოქმებით, ზეწოლით, გაყალბებით მიაცემინეს ხმა“, – განაცხადა “ევროპული საქართველოს” ერთ-ერთმა ლიდერმა დავით ბაქრაძემ.
“ეს ერთიანობა, რაც დღეს აქ ჩანს, არის მართლაც უპრეცედენტო. ჩემი აზრით, ეს გახდება იმ გამარჯვების საფუძველი, რომელიც ძალიან მალე გველოდება. გამარჯვება იქნება არა კონკრეტული პარტიის, არამედ ეს იქნება სიმართლის, სამართლიანობის გამარჯვება და ეს იქნება ქართველი ხალხის გამარჯვება”, – ამბობს “ნაციონალური მოძრაობის” წევრი თინა ბოკუჩავა.
„პირადად ჩემთან მიმართებით ამოცანა იყო, რომ ნებისმიერ ფასად პარლამენტს გარეთ დავრჩენილიყავი იმიტომ, რომ ივანიშვილმა ვერ გათვალა, რომ ეს სოლიდარობა ერთმანეთის მიმართ იქნებოდა იმ პარტიების მხრიდანაც, რომლებმა აიღეს 20, 25, 27 მანდატი, იმ პარტიების მხრიდან, რომლებმაც აიღეს 3, 5 მანდატი და იმ პარტიების მხრიდანაც, რომლებსაც მანდატი ამ გაყალბებული არჩევნების შედეგად არ მიეცა. ყველა ვართ ერთმანეთის სოლიდარულები”, – განაცხადა “ერთანი საქართველოს” ლიდერმა ნინო ბურჯანაძემ.
მემორანდუმის ტექსტი
2020 წლის 31 ოქტომბრის საპარლამენტო არჩევნები ჩატარდა ამომრჩეველზე ძალადობის და დაშინების, სუს-ის და კრიმინალური სამყაროს კოორდინირებული ზეწოლის, მასშტაბური მოსყიდვის, ადმინისტრაციული რესურსის გამოყენების და ამომრჩევლის ნებაზე ძალადობით გავლენის მოხდენის პირობებში. ამას თან დაერთო საარჩევნო ოქმებით მანიპულაცია და „კარუსელი“, რამაც მნიშვნელოვნად დაამახინჯა არჩევნების შედეგები.
ცესკოს მიერ გამოქვეყნებულმა საბოლოო შედეგებმა არ ასახა საქართველოს მოქალაქეების ნება. ჩვენთვის, ოპოზიციური პარტიებისთვის სრულიად ნათელია, რომ ჩვენმა თანამოქალაქეებმა უარი უთხრეს ივანიშვილის მმართველობას და არ მისცეს მას მესამე ვადით ქვეყნის მართვის მანდატი. შესაბამისად, ეს პარლამენტი არ ასახავს ამომრჩევლის ნებას. ამიტომ, ჩვენ ოპოზიციური პარტიები, რომელთაც გაგვიყალბეს არჩევნები, უარს ვამბობთ საპარლამენტო მანდატებზე და გადავდგამთ ყველა პოლიტიკურ და სამართლებრივ ნაბიჯს, რომ “დე იურე” და “დე ფაქტო” არ შევიდეთ ამ ე.წ. პარლამენტში.
ჩვენ არ მივიჩნევთ ამ პარლამენტს ლეგიტიმურად, რადგან ის არის უკანონო ქმედებების შედეგად არჩეული და არ გამოხატავს ხალხის ნებას.ამ გადაწყვეტილებას სრულად იზიარებენ ქვემორე ხელმომწერი პოლიტიკური პარტიებიც, რომლებიც ამ გაყალბებული არჩევნების შედეგად ცესკოს მიერ გამოქვეყნებული მონაცემებით ვერ მოხვდნენ პარლამენტში.
ჩვენ ვაგრძელებთ ბრძოლას ივანიშვილის წინააღმდეგ ჩვენი ქვეყნის უკეთესი დემოკრატიული მომავლისთვის. დემოკრატიული ოპოზიციის მოთხოვნა არის ამ არჩევნების შედეგების გაუქმება, განმეორებითი არჩევნების ჩატარება და ყველა იმ დარღვევის სისტემური აღმოფხვრა, ცესკოს დაკომპლექტების წესის ჩათვლით, რამაც გამოიწვია ამ არჩევნების სისტემური გაყალბება
