ოპოზიციურ არხებზე გასული სიუჟეტების შემდეგ შს მინისტრის მოადგილე გადადგა

ოპოზიციური ტელეარხების ეთერში გასული სიუჟეტების შემდეგ თანამდებობა დატოვა შინაგან საქმეთა მინისტრის მოადგილემ, კახა საბანაძემ.

გადადგომის შესახებ განცხადება მან ფეისბუკზე გააკეთა:

საბანაძე გადადგომის მიზეზად “მედიაში გასულ სიუჟეტებს” ასახელებს, სადაც მისი გვარი ფიგურირებს 20 ივნისის ღამეს უკანონო ბრძანებების გაცემის კონტექსტში.

საბანაძე ამბობს, რომ ამ ფაქტებზე სრულყოფილი და ობიექტური გამოძიება უნდა ჩატარდეს და ის გადადგა, რათა გამოძიებას ხელი არ შეუშალოს:

“ვფიქრობ, რომ ზემოხსენებულ ფაქტებს სჭირდება შესწავლა, შესაბამისად უნდა ჩატარდეს სრულყოფილი და ობიექტური გამოძიება, რომელიც დაადგენს სიმართლეს. აღნიშნულიდან გამომდინარე, საგამოძიებო პროცესის მიმართ ნდობის უზრუნველყოფის მიზნით, ვტოვებ თანამდებობას! ვფიქრობ, ეს იქნება პრეცედენტი ყველა თანამდებობის პირისათვის, საზოგადოებაში ობიექტურად გაჩენილი კითხვების შემთხვევაში იმოქმედოს პასუხისმგებლობის მაღალი სტანდარტით,” – წერს ის.

რა იყო იმ სიუჟეტებში, რომლის გამოც მინისტრის მოადგილე გადადგა

საუბარია ორ სატელევიზიო სიუჟეტზე – რომლებიც შაბათს და კვირას  “TV პირველისა” და “მთავარი არხის” ეთერში გავიდა.

“მთავარი არხის” სიუჟეტის გმირია სპეცსამსახურის ყოფილი თანამშრომელი ივანე გულაშვილი, რომელიც ახლა სახელმწიფო საიდუმლოების გაცემის ბრალდებითაა დაკავებული.

____________________________________________________________________________

● მესამე ძალა თუ ივანიშვილის სატელიტი? ვინ როგორ აფასებს გახარიას პოლიტიკაში დარჩენას

● პოლიტიკური კრიზისი საქართველოში. იქნება თუ არა ვადამდელი არჩევნები?

● მორიგი პოლიტიკური სკანდალი საქართველოში: ფარული ჩანაწერი ივანიშვილის შვილის და პრემიერის მონაწილეობით

____________________________________________________________________________

ინტერვიუ, რომელიც “მთავარმა” 21 მარტს გაუშვა, 2019 წლის 24 ნოემბერსაა ჩაწერილი. ტელეკომპანიას ეს ჩანაწერი ანონიმურმა წყარომ მიაწოდა.

ინტერვიუში ივანე გულაშვილი საუბრობს თუ რა საიდუმლო ბრძანებებს იღებდა იგი 2019 წლის ივნისის საპროტესტო აქციების დროს. ასევე, როგორ უთვალთვალებდა პოლიტიკურ და რელიგიურ ლიდერებს.

როგორც “მთავარი” ჰყვება, თავიდან გულაშვილი უსაფრთხოების ერთ-ერთი მაღალჩინოსანს, ნიკოლოზ შარაძეს ექვემდებარებოდა (შარაძე ამჟამად შსს-ს სასაზღვრო პოლიციის უფროსია). მოგვიანებით კი, გულაშვილი შინაგან საქმეთა მინისტრის მოადგილის, კახაბერ საბანაძის უშუალო დაქვემდებარებაში გადავიდა. გულაშვილი ამბობს, რომ საბანაძესთან მას კონკრეტულად თვალთვალი ევალებოდა. მისი თქმით, მას ბევრი ფარული ჩანაწერი აქვს, რისთვისაც, შესაძლოა, მოკლან.

პოლიტიკოსის პირადი ცხოვრების კადრები

გულაშვილი ამბობს, რომ 2014 წელს, როდესაც იგი შარაძესთან მუშაობდა, მას ანა დოლიძესთან სახლში სათვალთვალო კამერების დაყენება დაავალეს. ის ჰყვება, რომ კარი ე.წ. “ატმიჩკით” (მოწყობილობა, რომლითაც მძარცველები აღებენ კარებს) გააღო.

იურისტი ანა დოლიძე სხვადასხვა დროს თავდაცვის მინისტრის მოადგილე იყო, ასევე პრეზიდენტის საპარლამენტო მდივანი და იუსტიციის უმაღლესი საბჭოს წევრი.

გულაშვილი ამბობს, რომ კამერები დოლიძის სახლიდან მას შემდეგ მოხსნეს, რაც მისი პირადი ცხოვრების ამსახველი კადრები გადაიღეს.

ანა დოლიძე ამჟამად აქტიური პოლიტიკოსია. მან „მთავარ არხს“ უთხრა, რომ პირადი ცხოვრების კადრებით არ დაუშანტაჟებიათ, თუმცა მიანიშნეს, რომ თითქოსდა ჰქონდათ რაღაც კადრები, სადაც იგი კორუფციულ გარიგებაში მონაწილეობს.

“ამ შეტყობინების გამოგზავნით ალბათ მცდიდნენ,” – ფიქრობს პოლიტიკოსი.

თვალთვალი რელიგიურ ლიდერზე

გულაშვილი ასევე ამბობს, რომ გაუშვა სპეციალური ვირუსი რელიგიური ლიდერის, ვაგიფ აკპეროვის კომპიუტერში. აკპეროვი იმ დროს საქართველოს მუსლიმთა სამმართველოს შეიხის თანამდებობაზე იყო და უშიშროება მისი პერსონალური ინფორმაციის მოპოვებას ცდილობდა.

გულაშვილის მონათხრობს ირიბად ადასტურებს ის ფაქტი, თუ რა ვითარებაში გადადგა აკპეროვი – შეიხის თანამდებობა მან 2014 წელს საკუთარი სურვილით კი დატოვა, თუმცა თქვა, რომ მას უშიშროება ფარული ჩანაწერების გამოქვეყნებით აშანტაჟებდა.

როგორც გულაშვილი ამბობს, აკპეროვის თვალთვალიც შარაძის ბრძანება იყო.

20 ივნისის საქმე

გულაშვილი ინტერვიუში ამბობს, რომ მან ბევრი ბრძანება შეასრულა 2019 წლის ივნისში, როდესაც ქვეყანა საპროტესტო აქციებმა მოიცვა.

მაშინ მისი უშუაულო ხელმძღვანელი უკვე კახა საბანაძე იყო და 20 ივნისთან დაკავშირებული ყველა ბრძანება უშუალოდ საბანაძის გაცემულია, ამბობს გულაშვილი ინტერვიუში.

• მოკლედ

  20 ივნისის ღამე

  

  2019 წლის 20 ივნისის ღამეს თბილისში, პარლამენტთან მრავალათასიანი საპროტესტო აქცია გაიმართა, რომელიც ხელისუფლებამ ძალისმიერი მეთოდებით დაშალა. აქციის დაშლისას დაშავდა ასობით ადამიანი, ორმა დაკარგა თვალი.

  20 ივნისის აქცია მოჰყვა საქართველოს პარლამენტში რუსი დეპუტატის, სერგეი გავრილოვის სტუმრობას. რუსეთის სათათბიროს დეპუტატმა, რომელიც მართლმადიდებლობის საპარლამენტთაშორისო ასამბლეის სესიას თავმჯდომარეობდა, პარლამენტის თავმჯდომარის სავარძელი დაიკავა.

  ოკუპანტი ქვეყნის დეპუტატის ხილვამ საქართველოს პარლამენტის თავმჯდომარის სკამზე, მოსახლეობის პროტესტი გამოიწვია.

  ხელისუფლებამ აქციის ძალის გამოყენების დაშლის გადაწყვეტილება მიიღო, რადგან ხელისუფლების წარმომადგენელთა თქმით, ოპოზიცია საკუთარ მხარდამჭერებს პარლამენტის შენობაში შეჭრისკენ მოუწოდებდა.

გულაშვილი ამბობს, რომ მან გააფუჭა პარლამენტის წინ დამონტაჟებული დიდი მონიტორი, რომელზეც აქციის დროს ლიდერების გამოსვლები გადიოდა. ასევე მწყობრიდან გამოიყვანა ხმის სისტემის აპარატურა, რათა მომიტინგეებს გამომსვლელთა ხმები არ გაეგოთ და მათთან კომუნიკაცია არ ჰქონოდათ.

____________________________________________________________________________

● 20 ივნისი. გზამკვლევი მათთვის, ვისაც დეტალები კარგად არ ახსოვს

● მაკო გომურის ისტორია, რომელმაც თბილისში, საპროტესტო აქციაზე თვალი დაკარგა

____________________________________________________________________________

გულაშვილი ამბობს, რომ მას ასევე პარლამენტის მიმდებარე ტერიტორიასთან დამონტაჟებული ვიდეო სათვალთვალო კამერის ჩანაწერის ამოღება დაევალა.

“პირველ რიგში, ამომაღებინა კამერები დარბევის ღამის, 7 ვინჩესტერი, პარლამენტის სარდაფიდან.. სადაც იწერდა სერვერი. შიდა და გარე კადრები. არ უთქვამთ რატომ. დამტვრეულია და გადაყრილია სადღაც. მაგ კადრებს ვერავინ ნახავს, თუ პროკურატურას არ ჩაუწერია ჩვენამდე… პროკურატურა იწერდა ამ კადრებს ჩვენ სანამ შევიდოდით, მაგრამ ჩვენ რომ შევედით, ბრძანება მოვიდა და გავაჩერებინეთ ჩაწერა. მარტო გახარიას და საბანაძის მიერ იყო ბრძანება გაცემული. პირადად მე საბანაძისგან მივიღე ბრძანება,” – ამბობს გულაშვილი.

გულაშვილის თქმით, 20 ივლისს მას „მთავარი არხის“ მეწილის, ამჟამად პატიმრობაში მყოფი გიორგი რურუას მანქანის ქვეშ GPS სათვალთვალო მოწყობილობის დამონტაჟება დაავალეს. რამდენიმე თვეში რურუა ცეცხლსასროლი იარაღის მართლსაწინააღმდეგო ტარების ბრალდებით დააკავეს. ოპოზიცია მას „პოლიტპატიმრად“ მიიჩნევს და მის გათავისუფლებას ითხოვს.

„ტელეკომპანია პირველის“ 20 მარტის სიუჟეტიც უშუალოდ კახა საბანაძეს ეხება. სიუჟეტში ნაჩვენებია ფარული კადრები, რომლებიც სავარაუდოდ საბანაძის კაბინეტშია ჩაწერილი.

ტელევიზია ამბობს, რომ საბანაძე 20 ივნისის ღამის სპეცოპერაციას ხელმძღვანელობდა და ბრძანებებს იძლეოდა. მათი თქმით, საბანაძემ გასცა ბრძანება, რომ აქციის მონაწილეების “გახმოვანების სისტემა” დაეზიანებინათ, რათა ოპოზიციონერებს აქციაზე მისული ხალხისთვის ხმა ვერ მიეწვდინათ. 

საბანაძე ყოფილი პრემიერ–მინისტრის გიორგი გახარიას კადრად ითვლებოდა. მისი თვალთვალი, პოლიტიკური დამკვირვებლების აზრით, ნიშნავდა იმასაც, რომ უთვალთვალებდნენ თავად პრემიერსაც.

პროკურატურამ საქმე აღძრა

პროკურატურის განცხადებაში აღნიშნულია, რომ საჯაროდ გავრცელებული ინფორმაციის საფუძველზე 22 მარტს გამოძიება დაიწყო.

კერძოდ, გამოძიება დაწყებულია ცალკეულ საჯარო მოხელეთა მიერ, სამსახურებრივი მდგომარეობის გამოყენებით, კერძო კომუნიკაციის საიდუმლოების შესაძლო დარღვევისა და სამსახურებრივი უფლებამოსილების შესაძლო გადამეტების ფაქტებზე.

_____________________________________________________________________________

● ბოლო ერთი თვის განმავლობაში ეს საქართველოში უკვე მეორე სკანდალია ფარული ჩანაწერების მონაწილეობით. 7 მარტს ტელეკომპანია პირველმა გაავრცელა ანონიმური წყაროს მიერ მიწოდებული ჩანაწერები, სადაც ფიგურირებს ამჟამინდელი პრემიერი ირაკლი ღარიბაშვილი, სახელმწიფო დაცვის უფროსი ანზორ ჩუბინიძე და არაფორმალური მმართველის, ბიძინა ივანიშვილის ვაჟი ბერა. ფარულად ჩაწერილ სატელეფონო საუბრებში ისინი დეტალურად განიხილავენ თუ როგორ დააშინეს და დასაჯეს სკოლის მოსწავლე, რომელმაც სოციალურ ქსელში ბერა ივანიშვილს აგინა.