ოლექსეი არესტოვიჩი: თუ სააკაშვილი ციხეში მოკვდება საქართველოს მთავრობა ამას ვერასდროს ჩამოირეცხავს

ოლექსეი არესტოვიჩი სააკაშვილზე

უკრაინის პრეზიდენტის ოფისის მრჩეველმა, ოლექსი არესტოვიჩმა გადაცემაში Фейгин Live თქვა, რომ თუ საქართველოს მესამე პრეზიდენტი მიხეილ სააკაშვილი ციხეში მოკვდება. საქართველოს მთავრობა ამას ვერასდროს ჩამოირეცხავს.

მისივე განმარტებით, პოლიტიკურად, საქართველოს ხელისუფლებას სააკაშვილი არ უნდა, რადგან მისი ეშინიათ და თავიანთ მტრად მიაჩნიათ. როგორც არესტოვიჩი აღნიშნავს, მიხეილ სააკაშვილი ძალიან მასშტაბური და რთული პიროვნებაა, ხოლო “მისი გაკრიტიკება უწყვეტად შეიძლება, ასევე უწყვეტად შეიძლება მისით აღფრთოვანებაც” და ორივე შემთხვევაში ამის საფუძველი არსებობს:

“ჩნდება კითხვა: რა უნდა უქნა ასეთ ფიგურას? ის თავად ჩავიდა საქართველოში და საკუთარი ნებით ჩაუვარდა ხელში ხელისუფლებას. ის ახლა ციხეშია. მისი მოკვლის ეშინიათ, გაშვებისაც ეშინიათ, ამიტომ გადაწყვიტეს ნელი სიკვდილით მოკლან. მერე კი იტყვიან: ასე მოხდა, ასაკი, სიბერე, ავადმყოფობა, ნერვები, თავად მიიყვანა საკუთარი თავი ამ მდგომარეობამდე. იმის დამტკიცება, რომ “მოკლეს” და სამედიცინო დახმარება არ გაუწიეს, ძალიან რთულია.”

უკრაინის პრეზიდენტის ოფისის მრჩევლის თქმით, სააკაშვილი ისეთი მასშტაბის ფიგურაა, რომ “საქართველოს ხელისუფლებაში მყოფ ყველა ადამიანს გადაწონის” და მან თვითონაც არ იცის, რისი გაკეთება შეუძლია უკრაინას.

“რამე რომ გავაკეთოთ იტყვიან, რომ სუვერენული ქვეყნის საქმეებში ვერევით. არ ვიცი შეუძლია თუ არა რაიმეს გაკეთება პრეზიდენტ ზელენსკის ასეთ სიტუაციაში, ეს მისი გადასაწყვეტია. თუ [სააკაშვილი] ციხეში მოკვდება, საქართველოს ხელისუფლება ამას ვერასდროს ჩამოირეცხავს, რა მტკიცებულებებიც არ უნდა წარმოადგინოს, ამ ლაქას ვერასდროს მოიშორებენ.” – დასძინა არესტოვიჩმა.

● მედია, პოლიტიკური დევნა, სააკაშვილი და სხვა – ევროპარლამენტმა საქართველოზე კომპრომისული რეზოლუცია მიიღო
● “სააკაშვილის პოლიტპატიმრად მოხსენიების გამო” – მმართველმა პარტიამ მხარი არ დაუჭირა PEACE-ს ისტორიულ რეზოლუციას
● სააკაშვილის საქმეები. რისთვის ზის ციხეში ყოფილი პრეზიდენტი

პირველ დეკემბერს ცენტრმა “ემპათია” საქართველოს მესამე პრეზიდენტის, მიხეილ სააკაშვილის ჯანმრთელობის მდგომარეობასთან დაკავშირებით სამედიცინო დასკვნა გამოაქვეყნა, რომლის მიხედვით, სააკაშვილს ოცზე მეტი დიაგნოზი თუ სიმპტომი აქვს – მათგან, დაახლოებით ათი პატიმრობასთან შეუთავსებელია. “ემპათიაში” აცხადებენ, რომ ძირითადი დიაგნოზები არ საჯაროვდება.

დასკვნაში ვკითხულობთ, რომ მიხეილ სააკაშვილის ამჟამინდელი ჯანმრთელობის მდგომარეობა ფასდება როგორც მძიმე და პატიმრობასთან შეუთავსებელი – ცალკეული დიაგნოზები ცალკეც და ერთობლიობაში გამოიწვევს ჯანმრთელობის მდგომარეობის შეუქცევად მოშლას, სიცოცხლის ხანგრძლივობის შემოკლებას და სიკვდილსაც, თუკი მას არ მიეცემა შესაძლებლობა მიიღოს ადეკვატური დიაგნოსტიკისა და მკურნალობის უფლება. 

მათივე ცნობით, სააკაშვილს აქვს დაუდგენელი ეტიოლოგიის ცხელება, ანორექსია, წონაში სწრაფი კლება, კუნთების, სახსრების ძვლების ტკივილი, კუნთების განლევა, რომელიც შესაძლოა წარმოადგენდეს “დაუდგენელი ინფექციური პროცესის ან/და შესაძლო ინტოქსიკაციის შედეგებსაც”. 

28 ნოემბერს თბილისის საქალაქო სასამართლოში სააკაშვილის წინააღმდეგ ახალი პროცესი დაიწყო (ე.წ. საზღვრის კვეთის საქმე – სააკაშვილის საქართველოში გასულ ოქტომბერს სახელმწიფო საზღვრის უკანონოდ გადაკვეთის შედეგად შემოვიდა). პროცესზე თავად სააკაშვილიც უნდა მიეყვანათ, თუმცა, ჯანმრთელობის გაუარესებული მდგომარეობის გამო, ექს-პრეზიდენტმა სხდომაზე დასწრება ვერ შეძლო. მოსამართლე ნინო ჩახნაშვილმა სხდომა თარიღის განსაზღვრის გარეშე გადადო.

პრეზიდენტმა, სალომე ზურაბიშვილმა 24 ნოემბერს განაცხადა, რომ მიხეილ სააკაშვილის ჯანმრთელობის მდგომარეობა ქვეყნის რეპუტაციისთვის მნიშვნელოვანია და თუ ჯანმრთელობის მდგომარეობა “ამ დონეზეა დაზიანებული”, სასამართლომ უნდა მიიღოს ღირსეული გადაწყვეტილება.

საქართველოს სახალხო დამცველთან არსებული კონსილიუმის შეფასებითაც, რომელიც მიმდინარე წლის აპრილში გამოქვეყნდა, საქართველოს პატიმარი ექსპრეზიდენტის, მიხეილ სააკაშვილის ჯანმრთელობის მდგომარეობა მნიშვნელოვნადაა დამძიმებული. ოჯახი, მის საზღვარგარეთ სამკურნალოდ გადაყვანას ითხოვს.