სახალხო დამცველი: პროკურატურას შეუძლია, დღესვე გაათავისუფლოს ნიკა მელია

“პროკურატურას შეუძლია, დღესვე გაათავისუფლოს ნიკა მელია. გირაოს შეფარდების გარეშეც არის ეს შესაძლებელი”, – განაცხადა სახალხო დამცველმა ნინო ლომჯარიამ, რომელიც დღეს ციხეში “ნაციონალური მოძრაობის” თავმჯდომარეს, ნიკა მელიას შეხვდა.

ლომჯარიას თქმით, გირაოს საკითხთან დაკავშირებით მელიას პოზიცია უცვლელია. 

ასევე, სახალხო დამცველის თქმით, მისი რეკომენდაცია იქნებოდა პროკურატურის მისამართით, რომ რაც შეიძლება დროზე იყოს მიღებული ეს გადაწყვეტილება.

“თუმცა ვერ გეტყვით რა გეგმები აქვს პროკურატურას ან ხელისუფლებას”, – აღნიშნა ლომჯარიამ.

გუშინ, 19 აპრილს, ნიკა მელიამ ფეისბუქპოსტით დააფიქსირა პოზიცია შარლ მიშელის დოკუმენტზე. მისი თქმით, ის გარიგებაში არ და ვერ შევა.

“რა გამოდის – ძალმომრეობას იმიტომ არ შევეგუე, უკანონობას იმიტომ არ დავემორჩილე და უსამართლობაზე იმიტომ არ დავხუჭე თვალი, რომ მერე ჩემი თავისუფლებისთვის ვინმეს, ან მე გირაოდ გასაღებული გამოსასყიდი გადაგვეხადა.

ეს ჩემთვის მიუღებელია! ჯერ პატიმრობა შემიფარდეს და მერე ჩემი თავისუფლებით დაიწყეს ვაჭრობა”, – წერს ნიკა მელია.

_________________________________

● რა წერია შარლ მიშელის ახალ გეგმაში – ხუთივე პუნქტი მოკლედ
● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა
● მოსაზრება: რატომ არ გამოდიან ქართველები ქუჩაში?

_____________________________

18 აპრილს, ევროპული საბჭოს პრეზიდენტმა შარლ მიშელმა წინადადებების ახალი პაკეტი შესთავაზა საქართველოს პოლიტიკურ პარტიებს.

დოკუმენტს ჰქვია “სამომავლო გზა საქართველოსთვის” და იგი რამდენიმე მნიშვნელოვანი დეტალით განსხვავდება ბოლო დოკუმენტისგან, რომელიც შარლ მიშელის წარმომადგენელმა, ქრისტიან დანიელსონმა 31 მარტს წარუდგინა ოპოზიციას.

სიახლეები ეხება ორ ყველაზე მნიშვნელოვან და მხარეებს შორის ყველაზე შეუთანხმებელ პუნქტს – პოლიტიკური ნიშნით დაკავებულ ადამიანებს და ახალ საპარლამენტო არჩევნებს, რომელთა რიგგარეშე ჩატარებასაც ითხოვს ოპოზიცია.

ახალი წინადადების შესათანხმებლად 18 აპრილს ევროკავშირის დელეგაციის ოფისში მივიდა ყველა პარტიის წარმომადგენელი, მმართველი პარტიის გარდა. მოგვიანებით მმართველმა პარტიამ გაავრცელა განცხადება, სადაც წერია, რომ ხელისუფლება “მზად არის” მიშელის წინადადებების განსახილველად.

საბოლოო ჯამში მიშელის დოკუმენტს ხელი მოაწერეს შემდეგმა ოპოზიციურმა პარტიებმა: 

ლელომ [ბადრი ჯაფარიძე და მამუკა ხაზარაძე]
სტრატეგია აღმაშენებელმა [გიორგი ვაშაძე]
რესპუბლიკურმა პარტიამ [ხათუნა სამნიძე]
გირჩმა [ვახტანგ მეგრელიშვილი]
მოქალაქეებმა [ალეკო ელისაშვილმა]

იყო ინდივიდუალური ხელმოწერებიც, კერძოდ: სალომე სამადაშვილი, დავით ბაქრაძე და ზურაბ ჯაფარიძე. 

დღეს დილით, ყველასათვის მოულოდნელად, დოკუმენტს ხელი მოაწერა ნაციონალური მოძრაობის გადამდგარმა თავმჯდომარემ გრიგოლ ვაშაძემაც.

დღესვე, საქართველოს თავად შარლ მიშელი ეწვია. ის მთელი დღის განმავლობაში შეხვედრებს მართავს პრეზიდენტთან, პრემიერთან, ხელისუფლების წარმომადგენლებთან და ოპოზიციასთან.