NATO-ში აშშ-ს ელჩი: ძალიან პირდაპირები ვართ საქართველოში დემოკრატიულ პროცესებზე ჩვენს შეშფოთებაში
NATO-ში აშშ-ს ელჩი საქართველოზე
NATO-ში აშშ-ს ელჩი, ჯულიან სმითი ვაშინგტონში მომუშავე კორესპონდენტს, ალექს რაუფოღლუს, რომლის ერთ-ერთი მთავარი სამუშაო თემა საქართველოა, ეუბნება, რომ შეერთებული შტატები ძალიან პირდაპირია საქართველოში დემოკრატიულ პროცესებზე შეშფოთებაში.
“ეს ჩვეული ქმედებაა რუსეთის მხრიდან. ისინი დეზინფორმაციას იყენებენ, რათა საზოგადოებები შიგნიდან დაყონ, რათა სცადონ, იმ ერთიანობის დაშლა, რომელიც მსოფლიოში მოკავშირეებისა და პარტნიორების შორის არსებობს, და ჩვენ მრავალი წელი ვმუშაობდით ქართველ ხალხთან ერთად, რათა გვენახა, შეგვეძლო თუ არა ამ დეზინფორმაციის გამოწვევასთან გამკლავებაში მათი დახმარება
აშშ, ისევე როგორც ევროპაში მრავალი ქვეყანა, ძალიან პირდაპირი იყო ქართველი მეგობრების მიმართ დემოკრატიულ პროცესებთან დაკავშირებით არსებული შეშფოთებების შესახებ და იმაზე, რომ ჩვენ გვსურს, უზრუნველვყოთ, დასავლურ ინსტიტუციებთან, როგორიცაა ევროკავშირი ან NATO, ქართული საზოგადოების ინტეგრაციის სურვილი, რომ ეს სურვილები ხმამაღლა და გასაგებად ისმის და რომ მათ შეინარჩუნონ დემოკრატიულ პრინციპებთან, ადამიანის უფლებებთან, დემოკრატიასთან და კანონის უზენაესობასთან მიმართებით ვალდებულება.” – განაცხადა სმითმა.
14 ოქტომბერს გაერთიანებული სამეფოს ელჩმა, გარეტ უორდმა “ინტერპრესნიუსთან” განაცხადა, რომ “ქართული ოცნების” ქმედებების გამო ბრიტანულმა მხარემ გადაწყვიტა ყოველწლიური ე.წ. უორდროპის დიალოგი გაეუქმებინა. ამასთან, გაუქმდა თავდაცვის ძალებს შორის მაღალი რანგის მოლაპარაკებები და შეჩერდა კიბერუსაფრთხოების პროგრამა.
როგორც ელჩმა ინტერვიუში აღნიშნა, საქართველოს მთავრობის მხრიდან მიმდინარე წელს გადადგმულმა ნაბიჯებმა დასავლელი პარტნიორებთან ურთიერთობა გააფუჭა.
აღსანიშნავია, რომ 14 ოქტომბერს, ევროკავშირის საგარეო საქმეთა მინისტრების შეხვედრა გაიმართა, რომლის დასრულების შემდეგ პრესკონფერენცია გამართა ევროკავშირის უმაღლესმა წარმომადგენელმა ჯოზეფ ბორელმა. მან სხვა საკითხებთან ერთად საქართველოზეც ისაუბრა და თქვა, რომ საქართველოში მოლდოვასთან შედარებით შავი სურათია.
