მორიგი პოლიტიკური სკანდალი საქართველოში: ფარული ჩანაწერი ივანიშვილის შვილის და პრემიერის მონაწილეობით

შაბათს საღამოს, ტელეკომპანია “პირველის” ეთერში გავიდა ფარულად ჩაწერილი სატელეფონო საუბრები, სადაც სამი ადამიანის ხმა ისმის.

ტელეკომპანიის ინფორმაციით, ერთი საქართველოს მოქმედი პრემიერ მინისტრი ირაკლი ღარიბაშვილია, მეორე – სახელმწიფო დაცვის სამსახურის ხელმძღვანელი ანზორ ჩუბინიძე, ხოლო მესამე – ქვეყნის არაფორმალური მმართველის, ბიძინა ივანიშვილის შვილი – ბერა ივანიშვილი.

ფარულად ჩაწერილ სატელეფონო საუბრებში ისინი დეტალურად განიხილავენ თუ როგორ დააშინეს და დასაჯეს სკოლის მოსწავლე, რომელმაც სოციალურ ქსელში ბერა ივანიშვილს აგინა.

ჩანაწერების ავთენტურობა დადგენილი არ არის, თუმცა ხმები ჰგავს ზემოთჩამოთვლილი პირების ხმას.

„სკოლაში ჩაფსმული მივა დღეს“ – რას ამბობენ ჩანაწერში

ჩანაწერში ბერა ივანიშვილი ირაკლი ღარიბაშვილს უყვება, რომ ანზორ ჩუბინიძის სადამსჯელო რაზმი მისი დავალებით მივიდა არასრულწლოვანის სახლში და ოჯახის და მეზობლების თანდასწრებით დააშინა, დაამცირა და ბოდიშის მოხდა აიძულა: 

„სკოლაში ჩაფსმული მივა დღეს“, – ამბობს, სავარაუდოდ, ბერა ივანიშვილი.

 „ვერ წავიდოდა სკოლაში, ტო,” – პასუხობს ირაკლი ღარიბაშვილი.

“ტვ პირველის” ეთერში გასული ჩანაწერის თანახმად, ბერა ივანიშვილი რამდენჯერმე ამოწმებს შეასრულა თუ არა ანზორ ჩუბინიძემ მისი დავალება და ნამდვილად დასაჯა თუ არა სათანადოდ არასრულწლოვანი, რომელმაც სოციალურ ქსელში მისთვის არასასურველი კომენტარი გამოაქვეყნა.

ამის შემდეგ, ღარიბაშვილი და ივანიშვილი კიდევ ერთი ადამიანის დასჯის ფაქტს განიხილავენ იგივე მიზეზით – ამ პირმაც ისეთი რამე დაწერა ფეისბუკზე, რაც ბერა ივანიშვილს არ მოეწონა.

ამ მეორე ადამიანსაც ანზორ ჩუბინიძემ ბოდიში მოახდევინა.

 „ყოჩაღ ძმაო, ყოჩაღ, კაცურად მოიქეცი,” – აქებს მას ღარიბაშვილი.

საუბარი შეიცავს უხეშ და უცენზურო ენას. საუბრის მონაწილეები დასცინიან მსხვერპლს.

ჩანაწერში ახსენებენ “ვახოს” რომელიც ასევე მონაწილეობდა სადამსჯელო ოპერაციაში. ტელეკომპანია “პირველის” ვარაუდით, ეს არის ვახტანგ გომელაური, შინაგან საქმეთა მინისტრი.

ივანიშვილმაც იცოდა

ჩანაწერში ბერა ივანიშვილი ახსენებს. ჩანაწერის მიხედვით, სავარაუდოდ, ბერა ივანიშვილი ღარიბაშვილს ეუბნება, რომ ანგარიშსწორების შესახებ ბიძინა ივანიშვილმა ყველაფერი იცის.

სავარაუდოდ ბერა ივანიშვილი სთავაზობს ღარიბაშვილს, რომ ვინც ფეისბუქზე რამე ცუდი დაწერა მასზე და ვინც სპეციალურ სიაში ჰყავს, “ბოდიშები მოიხადონ წერილობით”.

“მაგათმა ყველამ, ვინც იგინებოდა, რა… და ბოდიშები რომ მოიხადონ რა… მამაჩემმაც თქვა ტო, ეგ გააკეთეთო აუცილებლადო. ზა მარალნი უშერბ, ხო აზრზე ხარ, მორალური იმისთვის,” – ისმის სავარაუდოდ ბერა ივანიშვილის ხმა.

სავარაუდოდ ირაკლი ღარიბაშვილი პასუხობს, რომ ეს კარგი იდეაა:

“აჰა. მოდი ბოდიშები მოვახდევინოთ მაგ დედამო***ულებს”.

სიუჟეტის ავტორის თქმით, ტელეკომპანიას ანონიმურმა წყარომ ოთხი ჩანაწერი მიაწოდა.

ჟურნალისტებისთვის უცნობია, როდისაა გაკეთებული აუდიოჩანაწერი.

ვინ გაავრცელა ჩანაწერი?

ტელეკომპანია “პირველის” მტკიცებით, ეს ჩანაწერები ტელეკომპანიას ანონიმურმა წყარომ გადასცა.

მედიასა და სოციალურ ქსელებში ჩანაწერების სავარაუდო გამავრცელებლის რამდენიმე ვერსია ვრცელდება. მათ შორის, ერთ-ერთი ვერსიაა ყოფილი პრემიერი გიორგი გახარია, ასევე სახელმწიფო უსაფრთხოების სამსახურის ყოფილი მოადგილე სოსო გოგაშვილი და სხვა ყოფილი მაღალჩინოსნები, რომლებმაც სხვადასხვა მიზეზით და სხვადასხვა დროს, ხელისუფლების შიგნით არსებული დაპირისპირების გამო დატოვეს მმართველი გუნდი.

როდინდელია ჩანაწერები?

ზუსტი თარიღი, თუ როდის არის ჩაწერილი საუბრები, უცნობია. სიუჟეტის ავტორები ვარაუდობენ, რომ ჩანაწერები გაკეთდა 2015-2016 წლებში.

თუმცა, ასევე არის ვერსია, რომ ეს ჩანაწერები გაკეთებულია 2011 წელს.

ხელისუფლების და ოპოზიციის რეაქცია

რეაგირება ხელისუფლებამ ჯერ კიდევ სიუჟეტის გასვლამდე, გადაცემის ანონსის გასვლისთანავე დაიწყო – სპეციალური გადაცემები და სიუჟეტები მომზადდა სახელისუფლებო მედიაში, სადაც ფარული ჩანაწერების ფაბრიკაციაში მიხეილ სააკაშვილს და ოპოზიციას ადანაშაულებდნენ.

ანონსის გასვლის შემდეგ “ქართული ოცნების” ოფისში გაიმართა პარტიის პოლიტიკური საბჭოს სხდომა. ჩანაწერების კომენტირებისას, პარტიის ერთ-ერთმა ლიდერმა მამუკა მდინარაძე თქვა, რომ ეს არის “ფაბრიკაცია”.

მდინარაძის თქმით, ჩანაწერი ცალკეული, კონტექსტიდან ამოგლეჯილი ფრაზებისგან შედგება.

ხელისუფლების კიდევ ერთი არგუმენტია ის, რომ ბერა ივანიშვილის სატელეფონო საუბრები ჩაწერილია 2011 წელს, როდესაც ხელისუფლებაში სააკაშვილი იყო, ხოლო ბერა ჯერ კიდევ არასრულწლოვანი იყო.

ასევე, ხელისუფლების თქმით, ეს ჩანაწერები გაავრცელა ოპოზიციამ, რათა ჩაშალოს ხელისუფლებასა და ოპოზიციას შორის, პოლიტიკური კრიზისის დასაძლევად მიმდინარე მოლაპარაკებები, რომლებიც ევროპის საბჭოს პრეზიდენტის შარლ მიშელის შუამავლობით მიმდინარეობს.

ოპოზიცია ერთხმად ამბობს, რომ გასული ჩანაწერების შემდეგ “ქართულ ოცნებას” მხოლოდ ერთი გზა დარჩა – გადადგეს პრემიერი და დაინიშნოს ვადამდელი საპარლამენტო არჩევნები.

“ელემენტარულია. მხოლოდ სრულიად გაკოტრებულ და ხალხის მოშიშარ ხელისუფლებას შეუძლია ამ სიტუაციაში ვერ დაინახოს, რომ არანაირი ლეგიტიმურობა არ გააჩნია და მისი ნებისმიერი ნაბიჯი მხოლოდ აღრმავებს კრიზისს“, – ამბობს “ევროპული საქართველოს” ლიდერი სერგი კაპანაძე.

8 მარტს ოპოზიცია აპირებს შეკრებას და სამომავლო გეგმებთან დაკავშირებით ერთობლივი განცხადების გავრცელებას.

“ღარიბაშვილს ისედაც დაზიანებული რეპუტაცია ჰქონდა, ეს ჩანაწერები

საზოგადოების რეაქცია

სკანდალური სიუჟეტის გასვლისთანავე, მიუხედავად იმისა, რომ კომენდანტის საათი იყო, აქტივისტები და პოლიტიკოსები “ქართული ოცნების” ცენტრალურ ოფისთან შეიკრიბნენ.

“ბერა ​​+ ირაკლი = ძალადობას!”, “მაფია ივანიშვილების ოჯახი”, ეწერა ტრანსფარანტებზე.

აქციის მონაწილეებმა მოითხოვეს გამოძიების დაწყება იმ ფაქტებზე, რაზეც სიუჟეტში იყო საუბარი.

ასევე, ისინი ითხოვენ ვადამდელ საპარლამენტო არჩევნებს და პოლიტიკური ნიშნით დაკავებული ადამიანების გათავისუფლებას.

გამოძიებას ითხოვს საქართველოს სახალხო დამცველი ნინო ლომჯარიაც. ის გმობს წლების განმავლობაში საქართველოში გავრცელებულ ფარული ჩანაწერების გავრცელების პრაქტიკას და ამბობს, რომ უნდა ჩატარდეს გამოძიება და დადგინდეს, მოხდა თუ არა სისხლის სამართლის დანაშაული: “მხოლოდ ეფექტურად ჩატარებული გამოძიების, ჩანაწერების ავთენტურობისა და ნამდვილობის დადგენის შემდეგ შეიძლება შეფასდეს – შეიცავს თუ არა ჩანაწერები ინფორმაციას სავარაუდო დანაშაულებრივ ქმედებებთან დაკავშირებით, რაც ცალკე გამოძიების საგანს უნდა წარმოადგენდეს,” – აღნიშნავს ლომჯარია.