მოლდოვის ყოფილი პრორუსი პრეზიდენტი იგორ დოდონი ქვეყანას მოუწოდებს, საქართველოს ხელისუფლებას მიბაძოს და და რუსეთთან ურთიერთობები არ გაწყვიტოს. მისივე თქმით, სიცრუეა, რომ დსთ-ის წევრობა ევროკავშირში ინტეგრაციის კურსს ეწინააღმდეგება. ექსპრეზიდენტი ასევე ხაზს უსვამს, რომ შესაძლოა, დსთ-დან გასვლა მოლდოვის ეკონომიკისა და სოფლის მეურნეობისთვის საბედისწერო დარტყმაც გახდეს. რუსული საინფორმაციო სააგენტო „ტასის“ ინფორმაციით, ამის შესახებ დოდონმა ტელეარხ „ექსკლუზივის“ ეთერში განაცხადა.
„ხელისუფლება უნდა შეთანხმდეს რუსეთში თავისუფალ ექსპორტზე და იმ პირობებში, როცა დასავლეთმა სანქციები დაუწესა რუსეთის ფედერაციას, სცადოს ჩვენი საქონლის მიწოდება იქ, როგორც ამას აკეთებს საქართველო. ეს გამოიწვევს ჩვენი ეკონომიკის ზრდას
მოქალაქეების მოტყუება არ არის საჭირო. მოლდოვა არ გახდება ევროკავშირის წევრი. ევროკავშირს საკმარისად აქვს საკუთარი და იმ ქვეყნების პრობლემები, რომლებიც რიგში დგანან გაწევრიანებისთვის.“ — აღნიშნა დოდონმა.
დოდონი არ არის პირველი პრორუსი პოლიტიკოსი, რომელიც საქართველოს მთავრობას აქებს. ირაკლი ღარიბაშვილის მიმართ პოზიტიურადაა განწყობილი ევროპის ყველაზე პრორუსული და პოპულისტური პოზიციებით ცნობილი უნგრეთის ლიდერი ვიქტორ ორბანიც.
თავის მხრივ, საქართველოს პრემიერმინისტრმა ირაკლი ღარიბაშვილმა ბუდაპეშტში კონსერვატიული პოლიტიკური მოქმედების ყოველწლიურ კონფერენციაზე სიტყვით გამოსვლისას განაცხადა, რომ უნგრელ ხალხს ძალიან გაუმართლა, რომ “ასეთი ბრძენი და შორსმჭვრეტელი” ლიდერი ჰყავს. მისივე თქმით, სიმართლესთან დაპირისპირებული ძალები მიზნების მიღწევას ლგბტ პროპაგანდით ცდილობენ.
“როგორ ცდილობენ ძალები, რომლებიც თავისუფლებას, სიმართლეს უპირისპირდებიან, საკუთარი მიზნების მიღწევას? სწორედ ტრადიციული, ოჯახური ფასეულობების ნგრევითა და ყალბი თავისუფლების თავს მოხვევით – მაგალითად, ლგბტ პროპაგანდით, არასრულწლოვანი ბავშვებისათვის მშობლების გვერდის ავლით სქესის შეცვლის დაკანონების მცდელობით. ასეთი ე.წ. სიახლეების იძულებით, რომლებიც ადამიანს საკუთარ ფესვებს, ოჯახს, საკუთარ ტრადიციას, კულტურას, ისტორიას მოწყვეტს. ასეთი ადამიანის მართვა, რომელმაც დაივიწყა საკუთარი ისტორია, რწმენა, ადვილია. ამიტომ, ასეთ რთულ დროში ჩვენი უმთავრესი იარაღი და დასაყრდენი სწორედ ტრადიციული, ქრისტიანული, ოჯახური, კონსერვატიული ფასეულობებია.” – ამბობს პრემიერი.
