მიხაილო პოდოლიაკი: ვთავაზობთ საქართველოს მთავრობას, გადმოგვცეს სააკაშვილი მკურნალობის მიზნით

მიხაილო პოდოლიაკი

უკრაინის პრეზიდენტის აპარატის უფროსის, ანდრეი ერმაკის მრჩეველი მიხაილო პოდოლიაკი ამბობს, რომ უკრაინამ და პრეზიდენტმა ზელენსკიმ კონკრეტული პოზიცია დააფიქსირეს სააკაშვილთან მიმართებაში, თუმცა ისინი არ ერევიან უცხო ქვეყნის სუვერენულ უფლებებში, “რუსეთის ფედერაციისგან განსხვავებით.” ამიტომ უკრაინა ოფიციალურად სთავაზობს საქართველოს მთავრობას, გადასცენ მათ მიხეილ სააკაშვილი. 

“მე პირადად მიხეილ სააკაშვილისადმი დიდი სიმპატიითა და პატივისცემით ვარ განწყობილი. საქართველოს ისტორიისთვის და პოსტ-საბჭოთა სივრცისთვის ის მნიშვნელოვანი და ისტორიული ფიგურაა.” – ამბობს პოდოლიაკი.

მისივე განმარტებით, ამას არავითარი ცუდი შედეგი საქართველოსთვის – “ვგულისხმობ რუსეთის მხრიდან აგრესიულ ქმედებებს” – ნამდვილად არ მოჰყვება. პოდოლიაკის თქმით, თუ არ უნდათ უკრაინისთვის გადაცემა, მაშინ გადასცენ ნებისმიერ მესამე ქვეყანას ევროპაში, რათა მან მიიღოს ისეთი სახის დახმარება, “როგორის მიწოდებაც თავად საქართველოს, სამწუხაროდ”, არ შეუძლია:

“ეს არის პრეზიდენტ ზელენსკის საჯარო პოზიცია. ასევე სხვა უკრაინელი მაღალჩინოსნების საჯარო პოზიციაა… რაც შეეხება ჩემს პოზიციას, რომელიც უფრო რადიკალურია და ვფიქრობ, რომ საქართველოს ხელისუფლებას მიზანმიმართულად სურს, ქვეყანას მოსცხოს შავი ლაქა და ისტორიაში დაფიქსირდეს ფაქტი, რომ ციხეში მოკლეს პრეზიდენტი. ეს არ ეკადრება საქართველოს დიდებულ სახელს… 

მოვუწოდებ მმართველ პარტიასა და მის დეპუტატებს, რომლებსაც ძალიან მოსწონთ რუსეთი, არ ჩაეწერონ ისტორიაში შავი ასოებით. ისეთი ერისთვის როგორც ქართველი ერია, ეს არ შეიძლება. თუ გინდათ პირადად მე ჩამოვალ და წამოვიყვან, პრობლემა არ არის. უბრალოდ მინდა საქართველოს მთავრობის მოტივაცია გავიგო… სააკაშვილის უკრაინისთვის ან მესამე ქვეყნისთვის ჰუმანიტარული თვალსაზრისით გადაცემა თვით საქართველოსთვის ძალიან კარგი იქნება.”

უკრაინის პრეზიდენტის აპარატის უფროსის მრჩევლის განცხადებას გაემოხმაურა “ქართული ოცნების” დეპუტატი რატი იონათამიშვილი, რომელმაც განაცხადა, რომ პოდოლიაკის ეს წინადადება ქართულ მართლმასჯულებაში პირდაპირი ჩარევის მცდელობაა.

“ცოტა უხერხული განცხადება იყო და რასაკვირველია, სერიოზულად ვერ აღვიქვამ. რაღაც, თითქოს, ჩამოვალ და მე ჩემი ხელით წავიყვან პატიმარ სააკაშვილსო. მაგრამ, მეორე მხრივ, ცხადია, ეს არის ქართულ მართლმსაჯულებაში პირდაპირი ჩარევის მცდელობა. ვინაიდან, მსგავს გადაწყვეტილებას დამოუკიდებელი და ობიექტური გარემოებების გათვალისწინებით, მოსამართლე და სასამართლო იღებს და ამ გადაწყვეყილების მიღებაში ვერავინ ჩაერევა.” – ამბობს დეპუტატი.

● სააკაშვილის საქმეები. რისთვის ზის ციხეში ყოფილი პრეზიდენტი
● “საქართველოში დემოკრატიის უკუსვლა შემაშფოთებელია” – აშშ-ს სენატის საგარეო კომიტეტის სხდომა
● მაგნიტსკის აქტის ავტორი: სააკაშვილი ჩვენ თვალწინ კვდება – ეს ხელისუფლების პასუხისმგებლობაა 

5 იანვარს, აშშ-ს ყოფილმა ელჩმა რუსეთში და უკრაინის პრეზიდენტის, ვოლოდიმირ ზელენსკის მიერ შექმნილი რუსეთის სანქციებზე საერთაშორისო სამუშაო ჯგუფის ერთ-ერთმა კოორდინატორმა მაიკლ მაკფოლმა The Washington Post-ში საქართველოს ექსპრეზიდენტ მიხეილ სააკაშვილთან დაკავშირებით საკუთარ მოსაზრება გამოაქვეყნა, სადაც ბაიდენს და ევროპის ლიდერებს მოუწოდებს, წამოაყენენონ საქართველოს მესამე პრეზიდენტის, მიხეილ სააკაშვილის გადარჩენის მოთხოვნა.

მანამდე, 20 დეკემბერს, უკრაინის პრეზიდენტმა ვოლოდიმირ ზელენსკიმ საქართველოს მთავრობას მოუწოდა, მიხეილ სააკაშვილი სამკურნალოდ სამკურნალოდ საზღვარგარეთ გადაიყვანონ. მის ამ მოწოდებას მოლდოვის პრეზიდენტი, მაია სანდუც შეუერთდა. 

ამის საპასუხოდ, “ქართული ოცნების” თავმჯდომარემ, ირაკლი კობახიძემ აღნიშნა, რომ სააკაშვილზე ზელენსკის განცხადება მნიშვნელოვანი ვერ იქნება, ხოლო სანდუმ “თავის მე-6 პრეზიდენტს უნდა მიხედოს, რომელიც დღემდე პატიმრობაშია”.

რამდენიმე დღის წინ მიხეილ სააკაშვილმა უკრაინელ ჟურნალისტს, დმიტრი გორდონს წერილი გაუგზავნა, სადაც წერს, რომ ამერიკელი ტოქსიკოლოგების დასკვნის თანახმად, ის ციხეში მოწამლეს და მიზანი მისი სიკვდილი იყო, თუმცა გადარჩა, “ახლა კი სათანადო მკურნალობის გარეშე ლეტალური შედეგი გარდაუვალია.” სწორედ ამ წერილის საპასუხოდ გაავრცელა დმიტრი გორდონმა ვიდეომიმართვა.

24 დეკემბერს სააკაშვილმა რუს უფლებადამცველ მარკ ფეიგინსაც მისწერა წერილი, რომელშიც ის აღნიშნავს, რომ პუტინის ბრძანებით მოკლეს. წერილი, რომელიც სააკაშვილმა რუსულად დაწერა, ფეიგინმა ტვიტერზე გამოაქვეყნა.

#SaveMisha – ამ ლოზუნგით უკრაინის პრეზიდენტის მრჩეველმა ოლექსი არესტოვიჩმა და ყოფილმა ადვოკატმა და წამყვანმა მარკ ფეიგინმა საზოგადოებას მოუწოდეს, 4 იანვარს, მსოფლიოს სხვადასხვა ქვეყანაში, საქართველოს საელჩოებთან, მიხეილ სააკაშვილის მხარდამჭერი აქციები გაემართათ.

ამავე ეთერში ოლექსეი არესტოვიჩმა აღნიშნა, რომ “მიხეილ სააკაშვილს საჩვენებლად ანადგურებენ ციხეში” და მოუწოდა მაყურებლებს, გლობალურ აქციაში მიიღონ მონაწილეობა, რადგან “არ შეიძლება დავუშვათ, რომ თანამედროვე მსოფლიოში ადამიანს ასე ექცეოდნენ”. 

აქციები ევროპის რამდენიმე ქალაქში გაიმართა. საქართველოში კი  მშვიდობის ხიდის გარდა, მიხეილ სააკაშვილის სოლიდარობის აქცია მთავრობის ადმინისტრაციასთანაც გაიმართა. 

29 დეკემბერს, სააკაშვილის სასამართლო პროცესზე მოწმის სახით ამერიკელი ტოქსიკოლოგი, დევიდ სმიტი დაკითხეს. მისი თქმით, საქართველოს ექსპრეზიდენტი მძიმე მეტალებით კლინიკა “ვივამედში” გადაყვანამდე, ციხეში მოწამლეს.

ამერიკელმა ტოქსიკოლოგმა თქვა, რომ მან განიხილა მიხეილ სააკაშვილის სამედიცინო ჩანაწერები და ლაბორატორიული ტესტების შედეგები. ასევე, თმის, ფრჩხილებისა და სისხლის ნიმუშები. გარდა ამისა, ექსპრეზიდენტის გაფართოებული სამედიცინო ჩანაწერები და აგრეთვე, 170-გვერდიანი დასკვნა.

“ეს მეტალები ჯანმრთელობის მდგომარეობას ამძიმებენ და მათ კავშირი აქვთ პაციენტის დაავადებასთან. ჩემი აზრით, სააკაშვილის პირველი ინტოქსიკაცია მარტში მოხდა, ვიდრე მას ვივამედში გადაიყვანდნენ და მოგვიანებით, ამ მძიმე მეტალებმა სხვადასხვა ორგანო დააზიანა. მას სიმპტომები მაშინ ჰქონდა, როდესაც სამედიცინო დაწესებულებაში გადაიყვანეს. ანუ, ვთვლი, რომ მძიმე მეტალებით დაზიანება მანამდე, ანუ ციხეში მიიღო. ვვარაუდობ, რომ ამ ტოქსიკური აგენტების დოზა იმდენად მაღალი იყო, რომ ამ 5 თვის გასვლის შემდეგაც კი კონცენტრაცია ნორმაზე მაღლა აღმოჩნდა. ანუ მას ტოქსიკური კონცენტრაცია ჰქონდა”. – ამბობს სმიტი.

მიხეილ სააკაშვილის პროცესზე მოწმის სახით კლინიკა “ვივამედის” ნევროლოგი, თამარ აბაშიძეც დაკითხეს. ექიმის თქმით, ბოლო თვეებში მიხეილ სააკაშვილის ნევროლოგიური მდგომარეობა საგრძნობლად გაუარესებულია.