ლიეტუვაში აუქმებენ ჯაშუშის მიერ დაარსებული ორგანიზაციას, რომელიც რუსეთთან მეგობრობის მომხრეა
ლიტვაში პრორუსული ორგანიზაციის ლიკვიდაცია მიმდინარეობს
“ნოვაია გაზეტა – ბალტიას” მასალების მიხედვით
ლიეტუვაში დაიწყო სასამართლო პროცესი ადგილობრივი ორგანიზაციის, “საერთაშორისო სამეზობლო ფორუმის” ლიკვიდაციისთვის. პროკურატურა ამტკიცებს, რომ ფორუმის წევრები აწყობენ შეხვედრებს ბელარუსის პრეზიდენტთან და მხარს უჭერენ რუსეთთან მეგობრობას დიდ საერთაშორისო ღონისძიებებზე. უწყების ცნობით, ისინი ამას აკეთებენ ლიეტუვის სახელით.
გენერალური პროკურატურა ფორუმის საქმიანობას განიხილავს როგორც ანტისახელმწიფოებრივს.
თავად ამ ორგანიზაციის შექმნა და განვითარება დაკავშირებულია პოლიტიკოს ალგირდას პალეკისთან, რომელიც რუსი ჯაშუში აღმოჩნდა.
პალეკისი ლიეტუვის სსრ უმაღლესი საბჭოს პრეზიდიუმის თავმჯდომარის შვილიშვილია. იგი 1994 წლიდან მუშაობდა ქვეყნის საგარეო საქმეთა სამინისტროში, 10 წლის შემდეგ გახდა სეიმის დეპუტატი, შემდეგ კი საკუთარი პარტია შექმნა.
1991 წლის 13 იანვრის ღამეს საბჭოთა ჯარებმა ვილნიუსის სატელევიზიო ცენტრზე შტურმი სცადეს, რა დროსაც დაიღუპა ტელევიზიის 14 დამცველი და დაშავდა 900-ზე მეტი ადამიანი. ეს მოვლენები უდიდესი ტრაგედია იყო ქვეყნისთვის, რამაც საბოლოოდ დააჩქარა საბჭოთა ხელისუფლების დამხობა ლიეტუვაში.
თუმცა 2011 წელს პალეკისმა სკანდალური განცხადება გააკეთა და თქვა, რომ ლიეტუველებს საკუთარმა ხალხმა ესროლა. ამისთვის მას ჯარიმა დაეკისრა და გახდა პირველი მსჯავრდებული სისხლის სამართლის მუხლით „საბჭოთა ოკუპაციის უარყოფის შესახებ“.
“საერთაშორისო სამეზობლო ფორუმი” შეიქმნა პალეკისის მიერ, როდესაც ის უკვე ციხეში იჯდა – 2022 წლის ივნისში. ფორუმის დამფუძნებლებს შორის იყვნენ სხვა ოდიოზური პერსონაჟებიც.
● კაზიმერას იურაიტისი – 1997 წელს ნასამართლევი თაღლითობისთვის. 2017 წელს ის კვლავ გაასამართლეს, ამჯერად ექიმზე და პოლიციის თანამშრომლებზე ძალადობისთვის.
● დარიუს ნორკუსი – Vilnius Waters-ის ყოფილი დირექტორი. 2009 წელს იგი ეჭვმიტანილი იყო ქრთამის აღებასა და სამსახურებრივი უფლებამოსილების გადამეტებაში. თუმცა, მიუხედავად ამისა, ათწლიანი სასამართლო პროცესის შემდეგ, უმაღლესმა სასამართლომ დაადგინა, რომ ნორკუსი უდანაშაულო იყო.
“საერთაშორისო სამეზობლო ფორუმი” საკუთარ თავს ეროვნულს უწოდებს და ადგენს ქვეყნისთვის საერთაშორისო პრიორიტეტებს. ყოველ კვირას ორგანიზაცია აქვეყნებს რამდენიმე ვიდეოს ლიეტუველებისთვის ყველაზე მნიშვნელოვან პოლიტიკურ თემებზე და ერთდროულად ახორციელებს მათ პოპულარიზაციას რამდენიმე ინტერნეტ პლატფორმაზე.
მათ ვიდეორგოლებში გამოთქმულია ეჭვი იმის შესახებ, უნდა იყოს თუ არა ლიეტუვა ნატოსა და ევროკავშირის წევრი; ვიდეოებში ასევე დაგმობილია საბჭოთა ძეგლების დანგრევა და დემონტაჟი. ორგანიზაცია აქტიურად ავრცელებს თეზისს, რომ დასავლელმა პარტნიორებმა კიევს იარაღი არ უნდა მიაწოდონ.
2022 წლის ივლისში, ანუ უკრაინაში ომის პიკზე, ფორუმის ხუთი წარმომადგენელი მოსკოვში გაემგზავრა და მონაწილეობა მიიღო რუსეთის საზოგადოებრივი პალატის მიერ დაგეგმილ ღონისძიებაში, რომელიც „რუსეთ-ლიეტუვურ მეგობრობას“ მიეძღვნა.
ფორუმის ხელმძღვანელი ერიკა შვენჩიენიენე ასევე მონაწილეობდა პროპაგანდისტულ პროგრამაში „სოლოვიევი Live”, სადაც ისაუბრა იმის შესახებ, თუ როგორ სურს ლიეტუვას რუსეთთან ყოფნა.
ვინ აფინანსებს ფორუმის მუშაობას, ჯერჯერობით გაურკვეველია. ორგანიზაციის წევრები აცხადებენ, რომ “საერთაშორისო სამეზობლო ფორუმი” არსებობს მოქალაქეების შემოწირულობების ხარჯზე. ასევე, ორგანიზაცია გეგმავს გაფართოებას და ფილიალების შექმნას პოლონეთსა და ლატვიაში. ფორუმის წევრები ასევე აპირებენ ჩაერთონ საგამომცემლო და უძრავი ქონების ბიზნესში ამ ქვეყნებში.
რა მომავალი აქვს ორგანიზაციას, ძნელი სათქმელია, რადგან ლიეტუვის პროკურატურამ სარჩელი შეიტანა ფორუმის ლიკვიდაციის შესახებ. უწყებაში განაცხადეს, რომ ის „ხელს უწყობს ომს, ძალადობასა და ავტორიტარულ მმართველობას; ახორციელებს საქმიანობას სხვა სახელმწიფოების ინტერესებიდან გამომდინარე. ასევე, მისი ქმედებები ეწინააღმდეგება ლიეტუვის სახელმწიფო ინტერესებს და კონსტიტუციას, და ის ზიანს აყენებს სახელმწიფოს“.
