ლიეტუვა საქართველოს "გრუზიას" ნაცვლად, ოფიციალურად "საქართველოს" დაუძახებს

21 დეკემბერს გადაწყდა, რომ ლიეტუვას სახელმწიფო დოკუმენტებში, “გრუზიას” ნაცვლად, გამოყენებული იქნება “საქართველო”.

ამ გადაწყვეტილებას საქართველოს საგარეო საქმეთა მინისტრი, დავით ზალკალიანი ტვიტერის საშუალებით მიესალმა.

ლიეტუვამ “საქართველოს” გამოყენების შესახებ გადაწყვეტილება ჯერ კიდევ 2018 წლის მაისში მიიღო და ასე მიულოცა საქართველოს დამოუკიდებლობის 100 წლისთავი.

თუმცა, 2018 წლიდან “საქართველო”-სთან ერთად “გრუზიაც” იხმარებოდა. ამჯერად კი, “საქართველო” უკვე ერთადერთი სახელწოდება იქნება, რომელსაც ოფიციალურ დოკუმენტებში გამოიყენებენ.

მსგავსი გადაწყვეტილება მიიღეს საქართველოში 2018 წლის 24 მაისს – ქართულად, ლიტვის ოფიციალური სახელი შეიცვალა და გახდა “ლიეტუვა” – ლიტვის თვითდასახელება.

● რუსეთის გარდა, საქართველო ასევე „გრუზიაა“ ბევრი სხვა ქვეყნისთვის, მაგალითად იაპონიისთვის. განსაკუთრებით კი, საქართველოს ეს სახელწოდება რუსული გავლენით გავრცელებულია აღმოსავლეთევროპულ ქვეყნებში.

● საქართველოში ფიქრობენ, რომ სახელწოდება “გრუზია” ასოცირდება საქართველოს რუსეთის ქვეშ ყოფნის 200 წლიან პერიოდთან.

● როგორც ისტორიკოსები ამბობენ, სახელწოდება  „გრუზია“ წარმოშობილია სირიულიდან. „გურზანი“ ერქვა ქართლის სამეფოს, აქედან არის „გურზია“ და შემდგომში „გრუზია“.