ლევან ვასაძის თქმით, მალე მისი მოძრაობა პოლიტიკურ პარტიად გარდაიქმნება
ულტრანაციონალისტური, პრორუსული და ჰომოფობიური განწყობებით ცნობილმა ბიზნესმენმა ლევან ვასაძემ ალექსანდრეს ბაღში მხარდამჭერებთან შეხვედრა გამართა და ოფიციალურად დააფუძნა მოძრაობა „ერთობა, რაობა, იმედი“.
მან მოძრაობის პოლიტიკურ პარტიად გარდაქმნაც დააანონსა და აღნიშნა, რომ პარტია დაფუძნებული იქნება ოჯახის სიწმინდეზე და ტრადიციულ მოტივებზე.
“მე ძალიან გულაჩუყებული ვარ, რადგან ეს საოცარი გამოხმაურება, შევკრებილიყავით ოჯახებით. სწორედ ეს არის ის, რისთვისაც გადავდგი ეს მძიმე ნაბიჯი და აღარ ვილაპარაკებ ამაზე.“
ბიზნესმენმა შეკრებილ მხარდამჭერებს მეუღლე და 8 შვილი გააცნო, რის შემდეგაც ისაუბრა იმაზე, თუ რატომ გადაწყვიტა პოლიტიკაში მოსვლა.
მისი თქმით, “ერთობა რაობა, იმედი”, ეს არის ის გაერთიანება, რომელიც სულ მალე გადაიქცევა პოლიტიკურ პარტიად და რომელიც ქართველი ხალხის მხარდაჭერით შეცვლის ამ გამოუვალ ვითარებას საქართველოში:
“ეს გზა არ იქნება ადვილი, ია-ვარდით მოფენილი. გველოდება წინ ბევრი ერთობლივი ბრძოლა, წინააღმდეგობები, მაგრამ მტკიცედ გვწამს, რომ ქართველი ხალის მხარდაჭერით შევძლებთ გავარღვიოთ ეს მოჯადოებული წრე რომელზეც ტრიალებს საქართველო 30 წელია.“
I Have a Dream
ლევან ვასაძემ მხარდამჭერებს შემდეგი სიტყვებით მიმართა:
“დიდ ამერიკელ მოაზროვნეს და საზოგადო მოღვაწეს დავესესხები, მარტინ ლუთერ კინგს, რომელმაც თქვა, I Have a Dream. ქართულად რომ ვთარგმნო, ისე როგორც ადრე თარგმნიდნენ ამ სიტყვებს, რაღაცა ცუდი გამოვა იმიტომ, რომ სიტყვა ოცნება ჩვენმა პოლიტიკოსებმა შეგვაძულეს და მოგვაბეზრეს. მე ვთარგმნიდი ასე მარტინ ლუთერის სიტყვებს – მე მაქვს ნატვრა. I Have a Dream, მე მაქვს ნატვრა საქართველოსი, რომელშიც ბავშვი აღარ დადის მშიერი, რომელშიც ადამიანი აღარ დადის ღირსებააყრილი, რომელშიც აღარ არის წაგლეჯილი ტერიტორიები და ყველა ჩვენი თანამოძმე და თანამემამულე დაბრუნებული არის სახლში და მშვიდობიანად ცხოვრობს ჩვენს ძმებთან, ოსებთან და ჩვენს ძმებთან, აფსუებთან ერთად.
მე მაქვს ნატვრა სადაც ეს გიგანტური ჩვენი ჩრდილოელი მეზობელი ჩვენი მტერი კი აღარ არის, ჩვენი მეგობარი გახდა, იმიტომ რომ გაგვაკეთებინა ეს და მე მაქვს ნატვრა იმ საქართველოსი სადაც ჩვენ არ ვართ არც დასავლეთის და არც ევროპის მტრები და ჩვენი ქვეყანა გადაქცეულია არა ბრძოლის ველად ამ გიგანტური იმპერიების ერთმანეთში დაჯახებისა, არამედ ოაზისისა მათი თანამშრომლობის. ამიტომ ჩემთვის არ აქვს მნიშვნელობა შენ ამერიკის აგენტი ხარ, რუსეთის აგენტი ხარ, ირანის აგენტი ხარ, თურქეთის აგენტი თუ ვისიც გინდა. შენ თუ აგენტი ხარ, შენ ღალატობ სუბერენიტეტს, შენ ღალატობ შენს დამოუკიდებლობას. მე გეუბნებით თქვენ, მე ვარ მხოლოდ ერთი რაღაცის აგენტი დღიდან ჩემი დაბადებისა და ჩემს ბოლო ამოსუთქვამდე, მე ვარ საქართველოს აგენტი მთელს მსოფლიოში.”
_____________________________
• “ქართული მარში”: მიგრანტების წინააღმდეგ და საგარეო “ნეიტრალიტეტის” მხარდასაჭერად
• ცხოვრება სიძულვილის გარემოში. რას ჰყვებიან ლგბტ ადამიანების მშობლები
• “არასოდეს ვიცი, სახლში ცოცხალი დავბრუნდები თუ არა”
______________________________
ლევან ვასაძემ პოლიტიკაში მოსვლის შესახებ 6 მაისს, “თბილისი მარიოტში” გამართულ შეხვედრაზე განაცხადა. მისი თქმით, ქვეყნის საზოგადოებრივ-პოლიტიკურ ცხოვრებაში შემოსვლის გადაწყვეტილება მას შემდეგ მიიღო, რაც შარლ მიშელის დოკუმენტზე „ქართული ოცნებისა“ და გაერთიანებული ოპოზიციის უმრავლესობის მხრიდან ხელმოწერა მოხდა.
მისივე განმარტებით, ამ გადაწყვეტილებით მოხდა ქვეყნის სუვერენიტეტის უხეში ხელყოფა და შემცირება.
კრემლის იდეოლოგთან, ალექსანდრ დუგინთან დაახლოებული ქართველი ბიზნესმენი ლევან ვასაძე, საქართველოში რუსეთის ინტერესების გამტარებლად მიიჩნევა. ის დიდი ხნის წინ გამოირჩა, როგორც გამოკვეთილი ჰომოფობი. დაახლოებით ორი წლის წინ, მან სპეციალური ჯგუფების შექმნის შესახებ გააკეთა განცხადება, რომლებიც ხელკეტებით იქნებოდნენ შეიარაღებული, რათა ლგბტ საზოგადოება დაესაჯათ.
ის იყო ერთ-ერთი ორგანიზატორი აქციისა, რომელიც კინოთეატრ ამირანთან გაიმართა და ქართული ფილმის – „და ჩვენ ვიცეკვეთ“ (And Then We Danced) – წინააღმდეგ იყო მიმართული.
მაშინ, ფილმის წინააღმდეგ გამოვიდა ეკლესიაც, რომლის წარმომადგენლებიც, ცოტა ხნის მერე, თავად აღმოჩნდნენ სკანდალის ეპიცენტრში, როდესაც გავლენიანმა სასულიერო პირმა, მეუფე პეტრემ და სხვა მღვდელმსახურებმა „პედოფილიასა და მამათმავლობაში“ დაადანაშაულეს.
_____________________________
● ვის უფლებებს იცავენ საქართველოში
● ორი აქცია კანცელარიასთან: ერთმანეთს ლგბტ-პრაიდის მომხრეები და მოწინააღმდეგეები დაუპირისპირდნენ
