ნაციონალური მოძრაობის თავმჯდომარის პოსტზე, ლევან ხაბეიშვილს თინა ბოკუჩავა შეცვლის

ლევან ხაბეიშვილს თინა ბოკუჩავა შეცვლის

ლევან ხაბეიშვილი “ერთიანი ნაციონალური მოძრაობის” თავმჯდომარის პოსტს დატოვებს. მას ამ პოზიციაზე თინა ბოკუჩავა ჩაანაცვლებს. როგორც ხაბეიშვილმა ენმ-ს საგანგებო ბრიფინგზე თქვა, რომ მან ეს გადაწყვეტილება ჯანმრთელობის გამო მიიღო.

ლევან ხაბეიშვილი პოლიტსაბჭოს თავმჯდომარე გახდება, ხოლო საპარლამენტო ფრაქციის ენმ-ს თავმჯდომარე ლევან ბეჟაშვილი იქნება, ის ამ პოსტზე სწორედ ბოკუჩავას შეცვლის.

“მე მაქვს მიღებული კონკრეტული გადაწყვეტილება, სამწუხაროდ, ჩემი ჯანმრთელობის მდგომარეობიდან გამომდინარე. იცის საზოგადოებამ ერთი თვის წინ განვითარებული მოვლენები. ჩემთვის, ცხადია მძიმეა, თუმცა ექიმების მკაცრი რეკომენდაციით, ჩემთვის 2-3 თვის განმავლობაში, ფაქტობრივად, აკრძალულია რეჟიმში მუშაობა. შესაბამისად, ვერ მივცემ თავს უფლებას 2-3 თვის განმავლობაში, როცა არჩევნებამდე სულ რაღაც 4 თვეა დარჩენილი, პარტიის თავმჯდომარე არ იყოს ფუნქციური, არ იყოს ყოველდღიურ საქმიანობაში, 24-საათიან მუშა რეჟიმში. შესაბამისად, ჩვენი გუნდის, ყველას გადაწყვეტილებით, თინასთან კონსულტაციების შედეგად, მივიღეთ კონკრეტული გადაწყვეტილება.” – თქვა ხაბეიშვილმა.

ბოკუჩავამ ხაბეიშვილს ნდობისთვის მადლობა გადაუხადა და ბრიფინგზე განაცხადა, რომ არჩევნებისთვის საჭიროა მთელი ოპოზიციის გაერთიანება.

ამ არჩევანში, მე ღრმად მწამს, რომ ივანიშვილი უნდა დავტოვოთ მარტო და ყველა სხვა პოლიტიკური ძალა, თუ პოლიტიკოსი, ვინც არ ეგუება საქართველოს გარუსებას, უნდა გაერთიანდეს. უნდა გაერთიანდეს გამარჯვებისთვის. უნდა გაერთიანდეს გამარჯვებისთვის. უნდა გაერთიანდეს ჩვენი ქვეყნისთვის და ჩვენი ქვეყნის ევროპული მომავლისთვის. – თქვა ბოკუჩავამ.

2023 წლის იანვრის ბოლოს ენმ-ში შიდაპარტიული არჩევნები ჩატარდა. პროცესი 2 დღის განმავლობაში ბლოკჩეინის სისტემით მიმდინარეობდა. მხარდაჭერის 52.58%, ანუ 21 656 ხმა, ლევან ხაბეიშვილმა მიიღო. მეორე ადგილზე გავიდა ნიკა მელია, 40%-ით. არჩევნებამდე პარტიის ყოფილი თავმჯდომარე, ნიკა მელია ამბობდა, რომ ენმ-ში მიმდინარე პროცესები მის წინააღმდეგ ვანო მერაბიშვილმა და დავით კეზერაშვილმა დაგეგმეს.

● მოსაზრება: გვარამიას შეუძლია სერიოზული ინტელექტუალური წვლილი შეიტანოს ალიანსში –  მაგრამ ის არ არის ხალხოსანი
● “სააკაშვილი დაღმავალი ფიგურაა ქართულ პოლიტიკაში”. რას ფიქრობენ ექსპერტები “ნაციონალური მოძრაობის” დაშლაზე
● “ნაციონალური მოძრაობის” თავმჯდომარე ლევან ხაბეიშვილი გახდა

გამოხმაურება

საქართველოს ყოფილი პრეზიდენტი, მიხეილ სააკაშვილი “ერთიანი ნაციონალური მოძრაობის” თავმჯდომარის ცვლილებას გამოეხმაურა. მისი აზრით, ხაბეიშვილის გადაწყვეტილება, დაეტოვებინა პოსტი ჯანმრთელობის გამო, არის ენმ-ს “მუდმივი განახლების და სიმტკიცის ნიმუში”.

“მივესალმები ლევანის გადაწყვეტილებას, რომ მიხედოს საკუთარ ჯანმრთელობას, რომელიც მას შეერყა პოლიტიკურად მოტივირებული ფიზიკური ანგარიშსწორების შედეგად და ენმ-ის თავმჯდომარის პოზიციიდან გადაინაცვლოს პარტიის პოლიტსაბჭოს თავმჯდომარის პოზიციაზე. უმნიშვნელოვანესია, რომ ლევანმა სწრაფად მოახერხოს რეაბილიტაციის გავლა და მისებურად აქტიურად ჩაერთოს გადამწყვეტ ბრძოლაში. მხარს ვუჭერ თინა ბოკუჩავას ახალ თავმჯდომარედ არჩევას და პარტიის განახლებისაკენ გადადგმულ ნაბიჯებს.” – წერს სააკაშვილი.

სააკაშვილი კვლავ ირწმუნება, რომ საჭიროა ყველა პოლიტიკური ძალის გაერთიანება. მისივე მტკიცებით, ენმ გადაეწყობა “ახალი სახეებით” და დღევანდელი გადაწყვეტილება “არის ერთიანი ნაციონალური მოძრაობის მუდმივი განახლების და სიმტკიცის ნიმუში”.

ჩვენ ყველაფერი უნდა გავაკეთოთ მაქსიმალურად ყველა პოლიტიკური ძალის გასაერთიანებლად. ამოვიდეთ იქიდან, რომ დღეს ასეთია ხალხის და განსაკუთრებით ახალგაზრდობის დაკვეთა. ენმ გადაეწყობა მთლიანად ამ მიმართულებით ახალი სახეებით, ახალი იდეებით, რაც დაეფუძნება წარმატებული სახელმწიფოს მშენებლობის ტრადიციას და მუდმივი განახლების პროცესს. დღევანდელი გადაწყვეტილება არის ერთიანი ნაციონალური მოძრაობის მუდმივი განახლების და სიმტკიცის ნიმუში.

ენმ-ს ყოფილი თავმჯდომარე და პარტია “ახალის” ერთ-ერთი ლიდერი, ნიკა მელია ლევან ხაბეიშვილის თინა ბოკუჩავათი ჩანაცვლებას გამოეხმაურა და უარყოფითად შეაფასა.

მელიამ მსგავს ცვლილებებს ქართულ პოლიტიკაში არსებული რუსული ყაიდა უწოდა და დაამატა, რომ არაფორმალური მმართველობა არაფორმალური მმართველობით ვერ დამარცხდება.

პოლიტიკური კორუფცია, პოლიტიკის ბიზნესად ქცევა, პოლიტიკურ პარტიაში, როგორც “შპს-ში”, მენეჯერების დანიშვნა და მერე გადანიშვნა – თუ რამეა რუსული ყაიდის ქართულ პოლიტიკაში, სწორედ ესაა.

რუსულს რეჟიმს ვერ დაამარცხებ რუსული მეთოდებით. ოლიგარქს ვერ დაამარცხებ ფულით. არაფორმალურ მართვას ვერ დაამარცხებ არაფორმალური მართვის სტილით.” – დაწერა მელიამ საკუთარ Facebook-გვერდზე.