ლაზარე გრიგორიადისმა ციხე დატოვა
ლაზარე გრიგორიადისმა ციხე დატოვა
2023 წლის მარტის აქციების დროს დაკავებულმა ლაზარე გრიგორიადისმა გლდანის ციხე დატოვა. მსჯავრდებულს ციხესთან ოჯახის წევრები, ახლობლები და ადვოკატები ელოდებოდნენ.
“პირველ რიგში, მინდა მადლობა ვუთხრა პრეზიდენტს, სალომე ზურაბიშვილს. ბრძოლა გრძელდება. აქციებზე შევხვდებით”. – თქვა ჟურნალისტებთან ლაზარე გრიგორიადისმა.
მისივე თქმით, მოსამართლემ პოლიტიზირებული გადაწყვეტილება მიიღო.
ლაზარე გრიგორიადისის შეწყალების აქტი საქართველოს პრეზიდენტმა სალომე ზურაბიშვილმა დღეს გამოსცა, შესაბამისი პროცედურების გავლის შემდეგ კი, გრიგორიადისმა გლდანის ციხე დატოვა.
სასამართლოს მიერ გამოტანილი განაჩენის სარეზოლუციო ნაწილი ადვოკატებმა დღეს ჩაიბარეს, რომელიც პრეზიდენტის ადმინისტრაციაში მიიტანეს.
საქართველოს პრეზიდენტმა ლაზარე გრიგორიადისი 12 აპრილს შეიწყალა, თუმცა მოსამართლე ზვიად შარაძემ სარეზოლუციო ნაწილის შედგენას 12 დღე მოანდომა და მაქსიმალურად გამოიყენა ის დრო, რომელიც მას კანონით ჰქონდა მინიჭებული.
“არ დაველოდე არავის მოწოდებას, ასე რომ ვერავინ ვერ ჩაითვლის ქულებს, არც მუქარებს, მე ჩემი სინდისის წინაშე ჩავთვალე, რომ არ შეიძლება, ეს ახალგაზრდა 9 წლით დაისაჯოს, ხელი ჯერ არ მომიწერია, მაგრამ გადაწყვეტილება იყო მიღებული, ამაზე ვფიქრობ რამდენიმე დღეა, თუმცა, სანამ არ იქნებოდა გამამტყუნებელი განაჩენი, ვერაფერს ვიტყოდი.” – თქვა სალომე ზურაბიშვილმა TV პირველის ეთერში.
● აშშ-ის ელჩი: როცა მეგობარი შეშფოთებულია და ოკუპანტი გიწონებს, უნდა დაისვას კითხვა – კარგია თუ არა
● “ქვეყანა ხდება პუტინის პირადი სალარო, ეს იცით რას ნიშნავს?” – ექსპერტები ოფშორების კანონზე და ოცნების ტაქტიკაზე
● “დირექტივა სუბიექტებს უცხოური დაფინანსების გამო სამიზნეში არ იღებს” – EU-ში განმარტავენ, რით განსხვავდება მათი დირექტივა რუსული კანონისგან
ლაზარე გრიგორიადისის საქმე
12 აპრილს თბილისის საქალაქო სასამართლომ გასული წლის მარტში დაკავებულ 22 წლის ლაზარე გრიგორიადისს, რომელიც რუსულ კანონს აპროტესტებდა, 9 წლით თავისუფლების აღკვეთა მიუსაჯა. გადაწყვეტილება მოსამართლე ზვიად შარაძემ გამოაცხადა.
გრიგორიადისი 2023 წლის მარტის აქციების ერთადერთი მონაწილეა, რომელიც ხელისუფლებამ დააკავა.
2023 წლის 7-9 მარტს, თბილისში, პარლამენტის შენობასთან მრავალათასიანი მიტინგები მიმდინარეობდა ე.წ. “აგენტების რუსული კანონის” წინააღმდეგ.
გამოძიება გრიგორიადისს მძიმე სისხლის სამართლის დანაშაულის ჩადებას ედავებოდა – მას პოლიციელების ჯანმრთელობის ხელყოფისა და სახელმწიფო ქონების განადგურების ფაქტებზე ედება ბრალი.
გამოძიების ინფორმაციით, გრიგორიადისმა 7 მარტს, რუსთაველის გამზირზე გამართული აქციის მიმდინარეობისას, სამართალდამცავების მიმართულებით ორჯერ ისროლა ე.წ. „მოლოტოვის კოქტეილი“.
ასევე, ბრალდების ვერსიით, 9 მარტს გრიგორიადისმა ცეცხლი წაუკიდა პოლიციის მანქანას, რომელიც ადგილზე დაიწვა.
ლაზარე გრიგორიადისს პატიმრობაში 22 წელი შეუსრულდა.
გრიგორიადისის ადვოკატები და ოჯახი დარწმუნებულები იყვნენ, რომ სასამართლო გამამტყუნებელ განაჩენს გამოიტანს. თუმცა, ამავე დროს, მათ იმედი ჰქონდათ, რომ ლაზარე გრიგორადისს პრეზიდენტი ზურაბიშვილი შეიწყალებდა.
