„ლიბერალური აკადემიის“ დირექტორმა, ლაშა ტუღუშმა გადაცემა “დღის ნიუსრუმში” განაცხადა, რომ საქართველოში ერთი პრეზიდენტი მოკლეს, მეორე რევოლუციით დაამხეს, მესამე დაიჭირეს, მეოთხეს იმპიჩმენტს უწყობენ და “ღმერთმა იცის, კიდევ რა იქნება” – გახდე ამ ქვეყნის პირველი პირი, საფრთხის მატარებელი და სიკვდილ-სიცოცხლის საკითხია
ლაშა ტუღუში: “ევროპა რთულ ვითარებაშია. ერთ მხრივ, მათ ინტერესშიც არის და ბუნებრივია, ეს ინტერესი მნიშვნელოვანია, რომ გაფართოვდეს და მეორე მხრივ, ადგილზე ის ხომ არ გაგიკეთებს რეფორმას? – შენ თუ არ აკეთებ ბოლომდე და წესიერად არ იქცევი, როგორაც არ უნდოდეთ ბორელს, თუ შარლ მიშელს, შენი ხელისუფლების მაგივრად ის აქ რეფორმებს ვერ ჩაატარებს… პოლიტიკურ ელიტებს კარგად უნდა ჰქონდეთ გააზრებული ეს ამოცანა. თუ ვერ შეძლეს ერთმანეთთან დალაპარაკება და საერთო მიზნისთვის გაერთიანება, ისტორია მათ განაჩენს გამოუტანს.
საგარეო საქმეთა სამინისტრო ამ პროცესში ჩაკარგულია. ჩვენ ვერ ვხედავთ საგარეო საქმეთა სამინისტროს ისე ძლიერად, როგორც უნდა ვხედავდეთ. რატომ? იმიტომ რომ ეს 12 პუნქტი მთლიანად გადმოტანილია პარლამენტში და საგარეო საქმეთა სამინისტრო ამ პროცესიდან მნიშვნელოვანწილად ამოვარდნილია.
ამ ვითარებაში კიდევ ერთი დიდი თავის ტკივილია ქვეყნისთვის, როდესაც უმრავლესობა, სახელმწიფოს მეთაურის წინააღმდეგ, იმპიჩმენტის პროცესს იწყებს. არ აქვს მნიშვნელობა იმპიჩმენტი შედგება, თუ ვერა, მთავარია, ეს პროცესი დაიწყო და დაიწყო ძალიან რთულ დროს. როდესაც ერთ მხრივ, პრეზიდენტი მიემგზავრება უცხოეთში იმისთვის, რომ საქართველოს მხარი დაუჭიროს, მეორე მხრივ, შიგნით შიდაპოლიტიკურ კონტექსტში, ისედაც უკიდურესად დაძაბული ვითარებაა. პირდაპირ შეგვიძლია ვთქვათ, რომ ეს აზიანებს ქვეყნის ევროპულ მისწრაფებას.”
“ქართული ოცნება” საქართველოს პრეზიდენტის წინააღმდეგ იმპიჩმენტის პროცედურას იწყებს. ამის შესახებ ბრიფინგზე მმართველი პარტიის თავმჯდომარემ, ირაკლი კობახიძემ განაცხადა. კობახიძის განმარტებით, იმპიჩმენტის პროცედურა დაიწყება მიუხედავად იმისა, რომ მის აღსრულებას პარლამენტში ოპოზიციის მხარდაჭერაც სჭირდება.
გარდა ამისა, კობახიძის თქმით, პრეზიდენტის მიერ კონსტიტუციის დარღვევის ფაქტზე „ქართული ოცნება“ მიმართავს საკონსტიტუციო სასამართლოსაც.
საქართველოს პრეზიდენტის ადმინისტრაციამ 30 აგვისტოს გამოაქვეყნა განცხადება, რომლის მიხედვით, საქართველოსთვის ევროკავშირის წევრობის კანდიდატი ქვეყნის სტატუსის მინიჭების მხარდასაჭერად პრეზიდენტი სალომე ზურაბიშვილი ევროპელ ლიდერებთან შეხვედრებს იწყებს.
მალევე საქართველოს მთავრობა სალომე ზურაბიშვილის გერმანიაში დაგეგმილ ვიზიტს გამოეხმაურა და განმარტა, რომ პრეზიდენტს უარი გერმანიის გარდა, უკრაინაში ვიზიტზეც უარი ეთქვა. ზურაბიშვილს ასევე უარი ეთქვა შვეიცარიაში, პოლონეთში, ბელგიაში, დანიაში, არაბთა გაერთიანებულ საამიროებში, ბულგარეთში, ჩეხეთსა და ისრაელში დაგეგმილ შეხვედრებზეც.
თუმცა საქართველოს პრეზიდენტმა ევროპული ტურნე მაინც წამოიწყო. ზურაბიშვილი გერმანიაში გაემგზავრა და გერმანიის პრეზიდენტს შეხვდა, მოგვიანებით კი იგი საფრანგეთის პრეზიდენტს, ემანუელ მაკრონსაც შეხვდა.
