"საქართველოს ოკუპირებული ტერიტორიების ანექსიის შესახებ ნებისმიერი მუქარა მიუღებელია" - კობახიძე სტოლტენბერგს შეხვდა

კობახიძე სტოლტენბერგს შეხვდა

საქართველოს პრემიერმინისტრი ირაკლი კობახიძე ბრიუსელში NATO-ს გენერალურ მდივანს, იენს სტოლტენბერგს შეხვდა. ერთობლივ პრესკონფერენციაზე სტოლტენბერგმა ხაზი გაუსვა იმას, რომ საქართველოს ოკუპირებული ტერიტორიების ანექსიის შესახებ ნებისმიერი მუქარა მიუღებელია. მისივე თქმით, საქართველოსთვის მნიშვნელოვანია განაგრძოს და გააფართოოს შიდა რეფორმები, დაიცვას დემოკრატიული ღირებულებები.

რა თქვეს კობახიძემ და სტოლტენბერგმა.

იენს სტოლტენბერგი: ნატო თქვენთან ერთად დგომას განაგრძობს

ნატო-ს გენერალურმა მდივანმა აღნიშნა, რომ ნატო საქართველოსთან ერთად დგომას განაგრძობს მისწრაფებების შესრულების პროცესში.

“ნატო აგრძელებს უკრაინის მხარდაჭერას. მხოლოდ ბოლო დღეების განმავლობაში მოკავშირეებმა მილიარდობით ევროს ოდენობის სამხედრო დახმარების პაკეტების შესახებ გამოაცხადეს, მათ შორის საჰაერო დაცვისთვის, საარტილერიო ჭურვებისთვის და აღჭურვილობა F-16-ისთვის.

ნატოს პარტნიორები, ასევე, საკვანძო როლს თამაშობენ და მივესალმები იმას, რომ საქართველო ჰუმანიტარულ და ფინანსურ დახმარებას აწვდის [უკრაინას] და ათასობით უკრაინელ დევნილს იფარებს.

დღევანდელ შეხვედრაზე ჩვენ, ასევე, შევეხებით უსაფრთხოებას შავი ზღვის რეგიონში, რომელიც ვიცი, რომ ძალიან მნიშვნელოვანია საქართველოსთვის. უკრაინის წინააღმდეგ რუსეთის ომი მნიშვნელოვან რისკებს უქმნის ნავიგაციის თავისუფლებას. ასევე, გავლენას ახდენს მსოფლიოს მასშტაბით საკვების უსაფრთხოებაზე. ასე რომ, მივესალმები ჩვენი მოკავშირეების ძალისხმევებს, რომლებიც შავი ზღვრის განაღმვაზე მუშაობენ, რათა უფრო უსაფრთხო გახადონ ნავიგაციისთვის და კომერციისთვის.

ჩვენს დღევანდელ შეხვედრაზე, ასევე, განვიხილავთ, უფრო მეტად როგორ განვავითაროთ პარტნიორობა ნატო-სა და საქართველოს შორის. მივესალმები პროგრესს კრიზისების მენეჯმენტში, კიბერუსაფრთხოებაში, სამხედრო ინჟინერიასა და უსაფრთხო კომუნიკაციებში.

ასევე, გილოცავთ, ევროკავშირთან კანდიდატის სტატუსის მოპოვებას. ახლა საქართველოსთვის მნიშვნელოვანია განაგრძოს და გააფართოოს შიდა რეფორმები, დაიცვას დემოკრატიული ღირებულებები. გვინდა ვნახოთ, რომ საქართველო ამ მიმართულებით მოძრაობს, მეტი დემოკრატიისკენ და კეთილდღეობისკენ, ევროატლანტიკურ ოჯახში სრულფასოვანი წევრობისადმი.

ნატო თქვენთან ერთად დგომას განაგრძობს ამ მისწრაფებების შესრულების პროცესში”, – განაცხადა სტოლტენბერგმა.

მისივე თქმით, ნატო აგრძელებს რუსეთისთვის მოწოდებას, უკან წაიღოს საქართველოს ტერიტორიების დამოუკიდებელ სახელმწიფოებად აღიარება.

“აქამდე შევხვედრილვართ, მაგრამ ეს პირველი შეხვედრაა თქვენთან, როგორც პრემიერ-მინისტრთან. გილოცავთ ამ პოზიციაზე დანიშვნას და თქვენთან ერთად მუშაობას ველით.

საქართველო ნატოს ახლო პარტნიორია და ჩვენ სრულიად ვუჭერთ მხარს საქართველოს სუვერენიტეტსა და ტერიტორიულ მთლიანობას. ნატო აგრძელებს რუსეთისთვის მოწოდებას, უკან წაიღოს საქართველოს ტერიტორიების დამოუკიდებელ სახელმწიფოებად აღიარება, საქართველოს ოკუპირებული ტერიტორიების ანექსიის შესახებ ნებისმიერი მუქარა მიუღებელია”, – აღნიშნა მან.

● “მიმდინარე წელი იქნება ძალიან სერიოზული ტესტი ქართული დემოკრატიისთვის” – პრემიერის პირველი ვიზიტი ბრიუსელში
● საქართველოს პარლამენტმა მთავრობა დაამტკიცა – ირაკლი კობახიძე ქვეყნის ახალი პრემიერმინისტრია
● ირაკლი კობახიძის სამთავრობო პროგრამა. ევროინტეგრაცია, დეოკუპაცია, დასაქმება და სხვა პრიორიტეტები

ირაკლი კობახიძე: საქართველოს ტერიტორიების 20% ოკუპირებულია – მოკავშირეებმა და საერთაშორისო საზოგადოებამ უნდა განაგრძოს მტკიცე ერთგულების დემონსტრირება

მთავრობის მეთაურის თქმით, საქართველოს ტერიტორიების 20% ოკუპირებულია და ამ რთულ დროს მოკავშირეებმა და საერთაშორისო საზოგადოებამ უნდა განაგრძოს უპრეცედენტო ერთობისა და მტკიცე ერთგულების დემონსტრირება.

“ჩემთვის ძალიან მნიშვნელოვანია, რომ დინამიური და შინაარსიანი პარტნიორობის და ინტეგრაციის საკითხებზე გვიწევს საუბარი. მომეცით ნება, გამოვიყენო ეს შესაძლებლობა და გამოვხატო საქართველოს გულწრფელი მადლიერება ნატოსადმი საქართველოს სუვერენიტეტისა და ტერიტორიული მთლიანობის მტკიცე და თანმიმდევრული მხარდაჭერისთვის.

საქართველო ალიანსის უერთგულესი, ურთიერთთავსებადი პარტნიორია. ჩემი პირველი ვიზიტი ბრიუსელში საქართველოს ახალი პრემიერმინისტრის რანგში იმის ნათელი დადასტურებაა, რომ ჩვენთვის ძალიან მნიშვნელოვანია ეს მიმართულება.

ნატომ მნიშვნელოვანი როლი ითამაშა საქართველოს თავდაცვისუნარიანობის გაძლიერებაში, ალიანსთან ჩვენი თავსებადობის გაზრდაში. არც ჩვენ დაგვიკლია ძალისხმევა, რომ ჩრდილოატლანტიკური ალიანსის ღირებულებები გაგვეთავისებინა, განგვეხორციელებინა ყოვლისმომცველი რეფორმების დღის წესრიგი და წინ წაგვეწია ჩვენი ინტეგრაციის პროცესი, მიუხედავად, შიდა თუ გარე უსაფრთხოების გამოწვევებისა.

ამჟამად ევროპის უსაფრთხოების კონტექსტში რთული პერიოდი გვაქვს. წესებზე დაფუძნებული საერთაშორისო წესრიგი მნიშვნელოვანი გამოწვევების წინაშე დგას. საფრთხის ქვეშაა პრინციპი, მთლიანი, თავისუფალი და მშვიდობიანი ევროპა.

საქართველოს ტერიტორიების 20% ოკუპირებულია. ამ რთულ დროს მოკავშირეებმა და საერთაშორისო საზოგადოებამ უნდა განაგრძოს უპრეცედენტო ერთობისა და მტკიცე ერთგულების დემონსტრირება, წესებზე დაფუძნებული მსოფლიო წესრიგის და საერთაშორისო სამართლის პრინციპების მიმართ. კიდევ ერთხელ მომეცით უფლება, რომ გავიმეორო ჩვენი მტკიცე ვალდებულება ნატო-საქართველოს პარტნიორობის მიმართ და გამოვხატო მადლიერება თქვენი მხარდაჭერისთვის.” – განაცხადა პრემიერმა.