კიევ-პეჩერის ლავრა მას შემდეგ დაიხურა, რაც მონასტერში კორონავირუსის 90 შემთხვევა აღმოაჩინეს
კიევ-პეჩერის ლავრაში, კიევის ერთ-ერთ ყველაზე ცნობილ მონასტერში, ერთ დღეში კორონავირუსის ინფექციის 63 ახალი შემთხვევა დაფიქსირდა. მონასტერი კარანტინზე დაიხურა.
უკრაინული ტელეკომპანიის Нromadske- ს ცნობით, ამის შესახებ უკრაინის დედაქალაქის მერმა, ვიტალი კლიჩკომ განაცხადა. მან სამართალდამცავებს მოუწოდა, ამ გადაწყვეტილების შესრულება გააკონტროლონ.
- მართლმადიდებელი მრევლი ბზობას აღნიშნავს – ეკლესიებში ხალხმრავლობაა
- სომხეთი: აღდგომის მსახურება პირველად ჩატარდა მორწმუნეების გარეშე
- რა ხდება ქართულ ეკლესიაში? პატრიარქის ტახტისთვის ბრძოლა გადამწყვეტ ფაზაში შედის
მან აღნიშნა, რომ გასული დღის განმავლობაში ქალაქში რეგისტრირებული 79 შემთხვევიდან 63 კიევი-პეჩერის ლავრაში დაფიქსირდა. საერთო ჯამში, ლავრაში დაავადების 90-ზე მეტი დადასტურებული შემთხვევაა.
მანამდე კიევ-პეჩერის ლავრამ, ფაქტობრივად, მოუწოდა მორწმუნეებს, უგულებელყონ სახელმწიფოს მიერ დაწესებული შეზღუდვები კორონავირუსის გავრცელების საფრთხის გამო და ტაძარში შეიკრიბონ. თუმცა, საბოლოოდ მოსკოვის საპატრიარქოს უკრაინულმა მართლმადიდებელმა ეკლესიამ (რუსეთის მართლმადიდებელი ეკლესიის დაქვემდებარებაში) გადაწყვიტა, რომ საკარანტინო პერიოდის განმავლობაში ლავრაში ღვთისმსახურება დახურულ რეჟიმში – მრევლის გარეშე, ჩაატაროს.
12 აპრილს ცნობილი გახდა, რომ გარდაიცვალა კიევი-პეცერის ლავრის ერთ-ერთი სასულიერო პირი, 74 წლის არქიმანდრიტი ნექტარიუსი.
გარდაცვალების მიზეზს მონასტერი არ ასაჯაროებს.
ჯარიმები ტაძრებში შეკრებისათვის
უკრაინის პოლიციამ დააჯარიმა სამი სასულიერო პირი, რომლებმაც დაარღვიეს საკარანტინო წესები და ბზობის დღეს ეკლესიებში ხალხის შეკრება დაუშვეს.
ამის შესახებ შინაგან საქმეთა მინისტრმა არსენ ავაკოვმა განაცხადა.
“უპასუხისმგებლობასა და ადამიანის ჯანმრთელობისადმი უპატივცემულობას არაფერი აქვს საერთო ღმერთთან! 3 შემთხვევაში სასულიერო პირები ადმინისტრაციულად დაჯარიმდნენ პოლიციის მიერ. სინდისის თავისუფლება გვაქვს, მაგრამ… სინდისიც იქონიეთ!”- დაწერა მინისტრმა საკუთარ Twitter- ზე.
მანამდე ქვეყნის ხელისუფლებამ ხალხს მოუწოდა, ბზობაზე ტაძრებში არ შეკრებილიყვნენ.
უკრაინაში, 13 აპრილის დილის მდგომარეობით, დაფიქსირდა კორონავირუსული ინფექციის 3102 შემთხვევა. აქედან, გამოჯანმრთელდა 97 პაციენტი, გარდაიცვალა 93 ადამიანი.
