კელი დეგნანი: იმედგაცრუებულები ვართ მოსამართლეების ნაჩქარევად დანიშვნის გამო

ამერიკის ელჩის, კელი დეგნანის თქმით, შეერთებული შტატები იმედგაცრუებულია, რომ უზენაეს სასამართლოში მოსამართლეთა უვადოდ დანიშვნის პროცესი გაგრძელდა, მიუხედავად შეთანხმებისა, რომლის მიხედვით ეს არ უნდა მომხდარიყო სასამართლო რეფორმის გატარებამდე. 

პირველ დეკემბერს, პარლამენტმა უზენაესი სასამართლოს მოსამართლეობის 4 კანდიდატი უვადოდ დანიშნა. ესენი არიან: თამარ ოქროპირიძე, გენადი მაკარიძე, ნინო სანდოძე, თეა ძიმისტარაშვილი.

“ქართულ ოცნებაში” აცხადებენ, რომ პროცესი უპრეცედენტოდ გამჭვირვალეა და კითხვებს არ ბადებს, ხოლო ოპოზიციისა და არასამთავრობო ორგანიზაციების წარმომადგენლები დანიშვნებს კატეგორიულად ეწინააღმდეგებიან. მათი თქმით, ფუნდამენტური რეფორმების გატარებამდე მმართველმა გუნდმა უზენაესი სასამართლოს მოსამართლეების შერჩევა უნდა შეაჩეროს. 

მოსამართლეობის კანდიდატებთან გასაუბრებას არ დასწრებია არც სახალხო დამცველის აპარატი და არც ევროკავშირის წარმომადგენლობა.

არასამთავრობო ორგანიზაციები წლებია ამბობენ, რომ სასამართლო სისტემას ე.წ კლანი მართავს, რომელიც ხშირად ხელისუფლების სასარგებლო გადაწყვეტილებებს იღებს. ეს პუნქტი ჩაიწერა შარლ მიშელის 19 აპრილის შეთანხმებაშიც.

მოგვიანებით რამდენჯერმე გააკეთა განცხადება აშშ-ის ელჩმაც. თუმცა, ხელისუფლებამ დანიშვნების პროცესი არ შეაჩერა და უზენაეს სასამართლოში უვადო მოსამართლეების დანიშვნა გააგრძელა.

კელი დეგნანმა აღნიშნა, რომ მისთვის გაუგებარია, რა საჭირო იყო ამ პროცესის დაჩქარება. 

იუსტიციის უმაღლეს საბჭოში არის 5 ვაკანტური პოზიცია არამოსამართლე წევრებისთვის, ეს პოზიციები თავისუფალია თვეების მანძილზე და რატომღაც, არავინ ჩქარობს მათ შევსებას მაშინ, როდესაც ისინი, საქართველოს კონსტიტუციით, წარმოადგენენ ხალხის აზრს სასამართლო სისტემაში.

შესაბამისად, რთული ასახსნელია, რატომ დაჩქარდა მოსამართლეების დანიშვნის პროცესი, როცა იგივე ადამიანები პარლამენტში, მათ შორის, მმართველი პარტიის წევრები, შეთანხმდნენ, რომ საჭირო იყო სასამართლო სისტემის ყოვლისმომცველი რეფორმა. 

იმედი მაქვს, ქართველები ასეთი რეფორმის საჭიროებას“. – თქვა აშშ-ის ელჩმა. 

● რას ფიქრობენ ექსპერტები შარლ მიშელის შეთანხმების გაუქმებაზე
● კელი დეგნანი: სანქციები ჩვენი ერთ-ერთი ბერკეტია
● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა