კახეთში საფლავებს ონლაინ მოუვლიან, გორში ქარის ქანდაკებებს დადგამენ. რა ხდება საქართველოს რეგიონებში. დაიჯესტი

რა ხდება საქართველოს რეგიონებში

უკრაინის ქალაქ დნიპროს ქუთაისი ფულად დახმარებას უგროვებს

ქუთაისში, სამოქალაქო აქტივისტებმა, უკრაინის ქალაქ დნიპროს დასახმარებლად, ფულის შეგროვება დაიწყეს. თანხა სპეციალურად გახსნილ ანგარიშზე გროვდება. დნიპრო ქუთაისის დამეგობრებული ქალაქია.

იდეა აქტივისტებს მას შემდეგ გაუჩნდათ, რაც დნიპროს მერმა საჯაროდ თქვა, რომ ქუთაისის გარდა მათ ყველა დაძმობილებული ქალაქი დაეხმარათ.  „ქუთაისს თუ ესმის, ჩვენ შეგვიძლია მივიღოთ ნებისმიერი დახმარება ადამიანებისთვის, ქუთაისის მხრიდან” , – თქვა დნიპროს მერმა.

ვრცლად: Kutaisipots.ge

ტიმოთი სნაიდერი: 15 მიზეზი, თუ რატომ არის უკრაინის გამარჯვება კაცობრიობისთვის მნიშვნელოვანი

ცნობილი ამერიკელი ისტორიკოსი ამბობს, რომ უკრაინელები კაცობრიობას აძლევენ შანსს, შემოაბრუნონ საუკუნის ტენდენციები

კასპში სასმელი წყალი არ აქვთ

წლებია კასპში ხალხი სასმელი წყლის პრობლემის მოგვარებას ითხოვს. ადგილობრივები ამბობენ, რომ წყალი ან საერთოდ არ აქვთ, ან თუ მოდის, სასმელად უვარგისი.  

 „ჯერ ამღვრეულია, შემდეგ სიყვითლე დაჰკრავს. ერთი კვირაა წყალი დასალევად არ გამოგვიყენებია“, – ამბობს ერთ-ერთი ადგილობრივი რადიო „მოზაიკასთან“.

ვრცლად: Mozaikanews.ge

როგორ ცხოვრობს ხალხი კასპის სოფლებში, ნახეთ “ჯემნიუსის” დოკუმენტურ ფილმში – სოფელი ხოვლე

ნინოწმინდის ყველაზე ცივ სოფლებში გაზი არ აქვთ

ნინოწმინდის რვა სოფელში, სადაც ყველაზე მკაცრი ზამთარია, გაზი არ აქვთ. ეს სოფლებია: ჟდანოვაკანი, გორელოვკა, ორლოვკა, სამება, ეფრემოვკა, ვლადიმიროვკა, ახალი ხულგუმო და ფარავანი.

ამ რვიდან ერთ სოფელში შარშან გაზიფიცირებისთვის ნახევარ მილიონზე მეტი ლარი გამოყეს, მაგრამ შემდეგ ეს ფული სხვა საქმეში დახარჯეს.

მერიაში რადიო ნორს უთხრეს, რომ გაზიფიკაციის პრობლემის მოსაგვარებლად ახლა სხვა გზებს ეძებენ.

ვრცლად: Nor.ge

გორში ქარის მიმართულებით მოძრავ ქანდაკებებს დადგამენ

გორში, ერთ-ერთ შადრევანზე, ქარის მიმართულებით მოძრავ ქანდაკებებს დადგამენ. ამისთვის ბიუჯეტიდან 65 ათას ლარს დახარჯავენ. გორის მერიაში გამოცემა Qartli.ge-ს უთხრეს, რომ ეს გადაწყვეტილება მოქალაქეების თხოვნის საფუძველზე მიიღეს.

ამავე გამოცემის ინფორმაციით, შადრევნები შარშან უნდა დაედგათ, მაგრამ პროექტის შედგენა დაგვიანდა.  

ვრცლად: Qartli.ge

კუმურდოს ტაძარს დაცვას დაუყენებენ

ახალქალაქში მდებარე კუმურდოს ტაძარს, რომელსაც ახლა რეაბილიტაცია უტარდება, დაცვის პოლიციის ინსპექტორები დაიცავენ. ტაძრისთვის დაცვა კულტურული მემკვიდრეობის დაცვის სააგენტომ დაიქირავა და ამაში 143 ათასამდე ლარს გადაიხდის.  

 კულტურული მემკვიდრეობის დაცვის სააგენტოს განმარტებით, საკათედრო ტაძრის დაცვა, მისი რეაბილიტაციის პროცესის უსაფრთხოდ წარმართვისთვის გადაწყდა.  

ვრცლად: sknews.ge

მალე კახეთში საფლავების მოვლას დისტანციურად შეუკვეთავენ

ერთ თვეში, კახეთში საფლავების მოვლა-დასუფთავების  ონლაინ სერვისი ამოქმედდება. იდეა რამდენიმე ახალგაზრდას ეკუთვნის. ეს მათი სტარტაპ პროექტია.

ერთ-ერთი დამფუძნებელი  მარიამ ოსიაშვილი knews.ge-სთან ამბობს, რომ ეს სერვისი არის იმ ადამიანებისთვის, ვისაც სურს ახლობლების საფლავები მუდმივად მოვლილი ჰქონდეს. ამას კი დროის სიმცირის, ასაკის, სტრესის, მანძილის ან ტრანსპორტის უქონლობის გამო ვერ ახერხებს.

ვრცლად: knews.ge

საქართველოს ვიცე-ჩემპიონი მშვილდოსნობაში მარნეულელი გოგო გახდა

სალომე ხარშილაძე ამ ჩემპიონატისთვის დიდხანს ემზადებოდა, რადგან ამ ჩემპიონატზე უნდა გადაწყვეტილიყო, ვინ წავა საქართველოს სახელით ევროპის ჩემპიონატზე.

„საკმაოდ დიდი კონკურენცია იყო , ვინაიდან მხოლოდ სამ გოგოს და სამ ბიჭს შეეძლო   მოხვედრა. დიდხანს ვემზადებოდი“, – უთხრა სალომემ რადიო „მარნეულს“

ვრცლად: marneulifm.ge

გურჯაანში საკალათბურთო აკადემიას ქმნიან

გურჯაანში საკალათბურთო კლუბი დააფუძნეს. ეს კლუბი მერიის დაქვემდებარებაში იქნება, რადგან მერიის ააიპ-ია. კლუბში 8-12 წლის ასაკის სპორტსმენები ჩაირიცხებიან.

გამოცემა “სპექტრს“ მერიაში განუცხადეს, რომ ამ გადაწყვეტილების მიზანი ახალგაზრდებში ცხოვრების ჯანსაღი წესის ხელშეწყობაა.

ვრცლად: Speqtri.ge