ივანიშვილის კავშირი რუსეთის მთავრობასთან, დასავლური ბიზნესის შევიწროება - რას წერენ სენატორები აშშ-ს სახელმწიფო მდივანს

აშშ-ის სენატორებმა, ტედ კრუზმა, ჯონ კორინმა და კონგრესმენებმა – ჯოდი არინგტონმა და მარკვეინ მულინმა აშშ-ის სახელმწიფო მდივანს, მაიკ პომპეოსა და აშშ-ის სახაზინოს მდივანს, სტივენ მნუჩინს წერილი მისწერეს, სადაც ისინი შეშფოთებას გამოთქვამენ საქართველოში კარგი მმართველობის გაუარესებაზე, დასავლური ბიზნესების შევიწროებაზე, ირანელი ბიზნესმენების მიერ საქართველოში აქტივობებით სანქციების თავის არიდებასა და ბიძინა ივანიშვილსა და რუსეთის მთავრობის შესაძლო კავშირზე. 

“ჩვენ გწერთ, რათა შეშფოთება გამოვთქვათ საქართველოში კარგი მმართველობის გაუარესების და პოტენციურად უკანონო ფინანსური საქმიანობის შესახებ. ჩვენ კონკრეტულად და სულ უფრო მეტად შეშფოთებულნი ვართ საქართველოს კავშირით ამერიკისადმი მტრულად განწყობილ მეტოქეებსა და მტრებთან, რაც ჩვენი გეოსტრატეგიული და ბიზნეს ინტერესების ხარჯზე მოდის,” – აღნიშნულია წერილში.

წერილში ხაზგასმულია, რომ ბოლო ერთი წლის განმავლობაში, საქართველოში უცხოური პირდაპირი ინვესტიციები თითქმის 50%-ით შემცირდა, დასავლური ბიზნესებისთვის გადასახადები და ბიუროკრატიული ბარიერები  კი გაიზარდა. 

საუბარია ამერიკული ნავთობმომპოვებელი კომპანიის – ფრონტერას საქმეზე. საქართველოს ნავთობისა და გაზის სახელმწიფო სააგენტომ ამ კომპანიასთან კონტრაქტი საარბიტრაჟო ტრიბუნალის გადაწყვეტილების შემდეგ გაწყვიტა. სააგენტო აცხადებდა, რომ არბიტრაჟის დადგენილებით, „ფრონტერა რისორსიზ ჯორჯია კორპორეიშენმა” დაარღვია კონტრაქტი, რაც სახელმწიფოს მისი შეწყვეტის უფლებას ანიჭებდა.

სახელმწიფო მდივნისა და ხაზინის მდივნის მისამართით გაგზავნილ წერილში ასევე ნახსენებია ანაკლიის ღრმაწყლოვანი პორტისა და ამერიკული “კონტი ჯგუფის” თემაც.

წერილში სენატორები და კონგრესმენები წერენ:

“კარგი მმართველობის ამ პრობლემებმა ამერიკული კომპანიების ფუნქციონირების უნარს და საქართველოსთან ჩვენი ურთიერთობის გაღრმავებას პირდაპირ ძირი გამოუთხარა. ტეხასური კომპანია, Frontera resources, საქართველოში აშშ-ის უმსხვილესი ინვესტორია ნავთობისა და გაზის სექტორში. ნავთობისა და გაზის აღმოჩენაში მათ 500 მილიონზე მეტი დოლარის ინვესტიცია ჩადეს. ახლახანს Frontera რეგულაციებით და შეზღუდვებით მიზანში ამოიღეს და ახლა საქართველოს ხელისუფლებისგან შესაძლო ქონფისკაციის წინაშე დგას. 2019 წელს სხვა ამერიკული კომპანია, Conti Group, კონსორციუმიდან, რომელიც ანაკლიაში საპორტო ობიექტს აშენებს, ანალოგიურად გააგდეს და პროექტი შეჩერდა.” 

• საქართველოში პოლიტიკა ბრუნდება. ისტორიული საარჩევნო შეთანხმება შეიძლება ჩაიშალოს
• საქართველო ევროკავშირისგან 500 მლნ ევროს მიიღებს. დახმარება ვალდებულებების შესრულებაზე იქნება დამოკიდებული
  

ისინი წერენ, რომ ამ ყველაფერს საფუძვლად უდევს გეოპოლიტიკური ინტერესები და რომ ფრონტერას სამუშაოები მიზნად ისახავდა საქართველოს სტაბილურობისა და ენერგოდამოუკიდებლობის მიღწევას, ხოლო ანაკლიაში პორტის მშენებლობის პროექტი –  რუსეთის პორტის ინფრასტრუქტურაზე საქართველოს დამოკიდებულების შემსუბუქებას. 

წერილში საუბარია იმაზეც, რომ საქართველო წლების განმავლობაში ირანელ ბიზნესმენებს აშშ-ს მიერ დაწესებული სანქციების თავიდან არიდების საშუალებას აძლევდა. 

“ლეგალური ბიზნესის გაგდების შემდეგ მისი ადგილი უკანონო ვაჭრობამ დაიკავა. წლების განმავლობაში ქართული ბიზნესი და საქართველოს ფინანსური სისტემა აშშ-ს ოფიციალური პირების მიერ ცნობილი იყო, როგორც ირანზე ამერიკული სანქციების გვერდის ავლის საშუალებები, რაც სულ მცირე 2013 წელში გვაბრუნებს, როდესაც ჩვენმა ხელისუფლებამ გაიგო, რომ სამმა ირანელმა ბიზნესმენმა კონტროლი დაამყარა თბილისში მცირე საბანკო ინსტიტუტზე და ისინი მას ფულის გადასატანად და დამატებითი საქმიანობისთვის იყენებდნენ, რაც მოიცავდა ფულის გადაცვლას, კომპანიებს შავი ზღვის სანაპიროზე და ასევე ავიაკომპანიას. ქვეყნის დასავლური ორიენტაცია, მის პორტებთან ერთად, ირანელებისთვის იდეალური სამიზნეა. სინამდვილეში, ბოლოდროინდელი ცნობებით, ბათუმის პორტი კვლავ ირანის უკანონო ნავთობის აქტივობების სამიზნეა,” – აღნიშნულია წერილში. 

სენატორები წერილში ხაზგასმით აღნიშნავენ იმასაც, რომ “ქართული ოცნების” თავმჯდომარეს, ბიძინა ივანიშვილს აქვს კავშირი რუსეთის მთავრობასთან და ამ კავშურის დამადასტურებელი საბუთები არსებობს.

სენატორები და კონგრესმები ითხოვენ ბრიფინგს შემდეგ საკითხებზე:

● “საქართველოს ამჟამინდელი მთავრობა, რომლის სათავეშიც არის პარტია “ქართული ოცნება”, ჩართულია ლეგიტიმური ამერიკული ბიზნესების შევიწროვებაში, რომლებმაც საქართველოს ეკონომიკასა და მომავალში ჩადეს ინვესტიცია.

● ნებისმიერი ასეთი მოქმედება მოტივირებულია გეოპოლიტიკური მოსაზრებებით, მათ შორის, “ქართული ოცნების” თავმჯდომარის, ბიძინა ივანიშვილის კავშირებით რუსეთის მთავრობასთან, რომელზეც ცნობები არსებობს.

● საქართველოში შავი ზღვის პორტებთან დაკავშირებული საქმიანობა საფრთხეს უქმნის ამერიკის ეროვნული უსაფრთხოების ინტერესებს, მათ შორის:

● ამერიკული კომპანიების მიზანმიმართული გამორიცხვა პორტების მშენებლობიდან, რომელიც მიზნად ისახავს საქართველოს იზოლირებას რუსეთზე დამოკიდებულებისგან.

● ირანის წინააღმდეგ ამერიკული სანქციების აღსრულების ნაკლოვანება, განსაკუთრებით კი საპორტო საქმიანობის კონტექსტში”.

წერილის ხელმომწერები აღნიშნავენ, რომ საქართველო კავკასიაში სტრატეგიული პარტნიორია და NATO-ს მოკავშირეობას ესწრაფვის და რომ გეოპოლიტიკურად, საქართველო აშშ-ს სთავაზობს კრიტიკულ გზას კასპიის ზღვიდან აღმოსავლეთ ევროპამდე ვაჭრობისა და ენერგორესურსებისთვის:

“აშშ-საქართველოს ძლიერი პარტნიორობა ამერიკული ინტერესებისთვის აუცილებელია, რაც, თავის მხრივ, მოითხოვს, რომ საქართველო დაუბრუნდეს კარგ მმართველობას და წაახალისოს ის. ჩახლართული გეოსტრატეგიული და ბიზნეს ინტერესები ფედერალური მთავრობისგან ფართო პასუხს მოითხოვს და როგორც ყოველთვის, ჩვენ მზად ვართ მოგაწოდოთ რესურსები, რომლებიც ამერიკის ეროვნული ინტერესის დასამტკიცებლად და დასაცავად გჭირდებათ,” – წერენ სენატორები.