ივანიშვილის სიტყვა. არაფორმალურმა მმართველმა დააანონსა, რა ელის ქვეყანას არჩევნების შემდეგ (სპოილერი: კარგი არაფერი)
ივანიშვილის გამოსვლა მიტინგზე
29 აპრილს “ქართულმა ოცნებამ” თბილისში, პარლამენტთან გამართა მრავალათასიანი მიტინგი. აქციის მიზანი იყო “აგენტების კანონის წინააღმდეგ” მასშტაბური პროტესტების საპასუხოდ იმის ჩვენება იყო, რომ ხელისუფლებასაც ჰყავს მომხრეები.
აქციაზე, ძირითადად, საბიუჯეტო სექტორში დასაქმებული ადამიანები იღებდნენ მონაწილეობას. მათი დიდი ნაწილი რეგიონებიდან სამარშრუტო ტაქსებითა და ავტობუსებით ჩამოიყვანეს.
აქციის ყველაზე მნიშვნელოვანი, კულმინაციური მომენტი იყო ბიძინა ივანიშვილის გამოსვლა. ივანიშვილი ამჟამად მმართველი პარტიის, “ქართული ოცნების” საპატიო თავმჯდომარეა. რეალურად კი, ის ქვეყნის არაფორმალური, რელური მმართველია, რაც 29 აპრილს კიდევ ერთხელ დადასტურდა.
სიტყვა, რომელიც ივანიშვილმა აქციაზე წარმოთქვა, ბევრმა პოლიტიკურმა კონენტატორმა შეაფასა როგორც საპროგრამო – გეგმა, თუ რას აპირებს ხელისუფლება ოქტომბერში, საპარლამნენტო არჩევნებში მოგების შემთხვევაში.
ექსპერტების შეფასებებს ჩვენ ცალკე მოვუყარეთ თავი. აქ კი მოგიყვებით, რა თქვა ივანიშვილმა თავისი გამოსვლის დროს.
ყველაზე მთავარი მოკლედ:
● ივანიშვილმა პირველივე აბზაცში მონიშნა, თუ ვის თვლის საკუთარი ხელისუფლების მტრებად: დასავლეთი, ოპოზიცია და არასამთავრობო სექტორი.
● გამოსვლის უდიდესი ნაწილი დასავლეთის დემონიზაციას დაეთმო. საქართველოს დასავლელ პარტნიორებს ივანიშვილმა მთელი გამოსვლის განმავლობაში “უცხოური აგენტურა” და “ომის გლობალურ პარტია” ეძახა;
● ივანიშვილი ამბობს, რომ დღეს საქართველოს ხელისუფლებას „გლობალური ომის პარტია“ ებრძვის, რომლისთვისაც „საქართველოსაც და უკრაინასაც მხოლოდ საზარბაზნე ხორცის ფასი აქვს“.
● რუსეთი ივანიშვილის გამოსვლაში მხოლოდ ერთხელ იყო ნახსენები. ისიც იმ კონტექსტში, რომ 2008 წელს “გლობალური ომის პარტიამ” საქართველო რუსეთს დააპირისპირა. მისი თქმით, და “გლობალური ომის პარტიამ” რუსეთთან ჯერ საქართველო დააპირისპირა, ხოლო შემდეგ – უკრაინა. ასე ხედავს ის უკრაინაში მიმნდინარე ომს.
● ივანისვილმა 10-ჯერ ახსენა სიტყვა სუვერენიტეტი, რომლის წართმევაც უნდა საქართველოსთვის “ომის გლობალურ პარტიას” ენჯეოების დახმარებით. ასევე თქვა, რომ ამ წლების განმავლობაში ხელისუფლებამ დააგროვა საკმარისი რესურსი, რომ “სუვერენიტეტის სრულად განმტკიცება” დაიწყოს და რომ სწორედ ამას ემსახურება კანონი „უცხოური გავლენის გამჭვირვალობის შესახებ“.
● ივანიშვილმა აღიარა, რომ “აგენტების შესახებ კანონის” დაბრუნება მისი პირადი ინიციატივაა და რომ მან, როგორც გამოცდილმა პოლიტიკურმა ლიდერმა “სწორ დროს სწორი სვლა გააკეთა” და იდეალური დრო შეარჩია კანონის დასაბრუნებლად:
● ივანიშვილმა აღიარა, რომ კანონს “აგენტების” შესახებ არასამთავრობო სექტორის გასაჩუმებლად იღებენ;
● ივანიშვილმა დაანონსა არჩევნების შემდეგ პოლიტიკური ოპონენტების, კერძოდ კი “ნაციონალური მოძრაობის” წინააღმდეგ რეპრესიები;
● ივანიშვილმა ფაქტობრივად თქვა, რომ ხელისუფლება არ აპირებს გაითვალისწინოს ევრორეკომენდაციები სასამართლოებთან დაკავშირებით
გარე ძალები და ბრძოლა სუვერენიტეტისთვის
ივანიშვილმა თავის გამოსვლაში თქვა, რომ საქართველოს ერთხელ უკვე ჰყავდა უცხოეთიდან მართული ხელისუფლება, სააკაშვილის “ნაციონალური მოძრაობის” სახით. მისი თქმით, “ვარდების რევოლუცია” გარე ძალებმა მოაწყვეს ენჯეოების დახმარებით და ახლაც იგივე უნდათ რომ გაიმეორონ.
“ამ უცხოელებს დღეს ამოძრავებთ სურვილი, საქართველოში იგივე ადამიანების არაჰუმანური და სადისტური დიქტატურა დაგვიბრუნონ, რასაც არაფრის ფასად არ დავუშვებთ”, – აღნიშნა ივანიშვილმა.
მან ტრადიციულად ბევრი ისაუბრა სააკაშვილზე და სააკაშვილის ხელისუფლებაზე.
ივანიშვილის თქმით, 2012 წელს ქვეყანა კი გათავისუფლდა სააკაშვილის რეჟიმისგან, მაგრამ ამით არაფერი დასრულებულა და დღეს “ქართულ ოცნებას” კვლავ უწევს ბრძოლა “თავისუფლებისა და სუვერენიტეტისთვის, რომლებსაც საფრთხეს უქმნიან უცხო ძალები”.
“დღევანდელი საქართველო არ არის არც შევარდნაძის დროინდელი საქართველო და არც იანუკოვიჩის უკრაინა. დღეს საქართველოს მართავს ძლიერი და ერთ მუშტად შეკრული პროფესიონალთა გუნდი, რომელმაც იცის სამშობლოს, დამოუკიდებლობის, სუვერენიტეტის ფასი. შესაბამისად, ურეიტინგო „ნაციონალებისა“ და „ენჯეოების“ ხელით ხელისუფლების შეცვლა დღევანდელ საქართველოში შეუძლებელია. თუმცა, ეს არ ნიშნავს იმას, რომ სიფხიზლე უნდა დავკარგოთ და საქართველოს სუვერენიტეტისთვის გრძელვადიანი გარანტიის შექმნაზე არ უნდა ვიზრუნოთ. სწორედ საქართველოს სუვერენიტეტის გამყარებას ემსახურება ქართული კანონი „უცხოური გავლენის გამჭვირვალობის შესახებ“.
უსამშობლო ელიტა და ჯავაჰარლალ ნერუ
არასამთავრობო სექტორზე საუბრისას ივანიშვილმა თქვა, რომ „არ არსებობს საკუთარი ქვეყნის იმაზე დიდი მტერი, ვიდრე უცხო ქვეყნის მიერ აღზრდილი ფსევდო-ელიტა“. ივანიშვილის თქმით, ეს სიტყვები ჯავაჰარლალ ნერუს ციტატის ადაპტაციაა. [JAMnews-მა ვერ იპოვა ინტერნეტში ნერუს აღნიშნული ციტატა. იგი იძებნება მხოლოდ რუსულ წყაროებში]
ივანიშვილის თქმით, „ენჯეოების“ დაფინანსება, “რომელსაც უცხოეთიდან ხშირად გვამადლიან და დახმარებაში გვითვლიან, სინამდვილეში, თითქმის მთლიანად აგენტურის გამაგრებასა და ხელისუფლებაში მათ მოყვანას ხმარდება”.
” შესაბამისად, ამ თანხებს არავითარი საერთო არა აქვს დახმარებასთან და პირიქით, ერთადერთ მიზნად საქართველოსთვის სახელმწიფო სუვერენიტეტის წართმევას ისახავს,” – განაცხადა ყოფილმა პრემერმა.
ომში ჩათრევის მცდელობა
ივანიშვილის თქმით, 2022 წლის დასაწყისიდან დღემდე, “საქართველომ გადაიტანა ურთულესი ბრძოლა ომის თავიდან ასაცილებლად და მშვიდობის შესანარჩუნებლად”. და “გლობალური ომის პარტიის “დიდი ძალისხმევის მიუხედავად, საქართველოს მეორე ფრონტად ქცევა ვერ მოახერხდა.
ივანიშვილი დეტალურად ხსნის რატომ დააბრუნეს აგენტების კანონი:
ივანიშვილმა დეტალურად ახსნა თუ რატომ დააბრუნეს აგენტების კანონი წელს და რატომ გაიწვიეს იგი შარშან. მან ასევე აღიარა რომ კანონის დაბრუნება მისი პირადი ინიციატივაა და თქვა, რომ ყველა სვლა გათვლილია.
ივანიშვილის თქმით, თუკი შარშან ხელისუფლების ოპონენტებმა შეძლეს “საზოგადოების დიდი ნაწილის შეცდომაში შეიყვანა” და საფრთხე შეუქმნის “ქვეყნის პოლიტიკურ მდგრადობას”, წელს ვითარება შეიცვალა.
წელს ივანიშვილის განცხადებით, „ნაციონალებმა“ და მათმა პატრონებმა ხალხი ვეღარ მოატყუეს:
“დღეს საზოგადოების უდიდესი ნაწილი „ენჯეოების“ გამჭვირვალობას მყარად უჭერს მხარს”.
გუშინდელ გამოსვლაში ივანიშვილმა ტრადიციულად საკუთარი პოლიტიკური გამჭრიახობა შეაქო და თან ირიბად აღიარა, რომ კანონის პარლამენტში დაბრუნების ინიციატორი თავად იყო. ეს მორიგი დადასტურებაა იმის, რომ ივანიშვილი საქართველოს არაფორმალური მმართველია.
“სწორ დროს სწორი სვლის გაკეთება პოლიტიკის მთავარი ხელოვნებაა. ჩემი პოლიტიკური წარსული მაძლევს იმის მტკიცების საშუალებას, რომ როგორც პოლიტიკურ ლიდერს, ამგვარი სვლების გათვლა კარგად შემიძლია”.
აგენტების კანონის დაბრუნებაზე საუბრისას ივანიშვილმა კიდევ ერთი ტაქტიკური მიზეზი დაასახელა:
“ენერგიას, რომელიც შემოდგომისთვის უნდა დაეგროვებინათ, ახლა ისინი ქუჩაში ნაადრევად ანიავებენ,” – თქვა ივანიშვილმა. [საპარლამენტო არჩევნები საქართველოში ოქტომბერშია_JAMnews]
” დასაგროვებელი ენერგიის ნაადრევი ხარჯვა ისედაც დასუსტებულ აგენტურას ძალას ბოლომდე გამოაცლის”, – განაგრძო მან და კიდევ ერთხელ შეაქო საკუთარი გადაწყვეტილება:
“შესაბამისად, კანონპროექტების ინიცირებისთვის დრო იდეალურად არის შერჩეული”. ამ განცხადებიდან ირკვევა ისიც, რომ ხელისუფლება ღელავს ოქტომბრის არჩევნების შედეგებზე და ელის დიდ პროტესტს საზოგადოების მხრიდან.
ივანიშვილის თქმით, ქვეყნისთვის ენჯეოების “გაუმჭვირვალე” დაფინანსება უფრო დამაზიანებელია, ვიდრე “აგენტების შესახებ კანონის” მიღება.
“ენჯეოების“ გაუმჭვირვალე დაფინანსება არის მთავარი ინსტრუმენტი, რომლითაც საქართველოს ხელისუფლება გარედან შეგიძლია დანიშნო,” – განაცხადა ივანიშვილმა.
ივანიშვილს არ უსაუბრია, ელოდება თუ არა კონკრეტულად სანქციებს დასავლეთისგან, მაგრამ თქვა, რომ გარდა “გლობალური ომის პარტიის” განაწყენებისა, ხელისუფლებას ამ კანონის მიღებით არავითარი სხვა ზიანი არ მიადგება.
სასამართლო და ცესკო
ივანიშვილმა თავის გამოსვლაში ფაქტობრივად აღიარა, რომ “აგენტების” შესახებ კანონს სწორედ არასამთავრობო სექტორის საქმიანობის შესაზღუდად იღებენ.
“ნურავის ექნება ილუზია, რომ ამ კანონპროექტების გარეშე დიდხანს მოგვასვენებდნენ. შეგახსენებთ, თუ როგორ გამალებით ცდილობდნენ მთელი ამ დროის განმავლობაში ცენტრალური საარჩევნო კომისიისა და სასამართლოს შერყევას”.
მან ხაზგასმის აღნიშნა, რომ “ქართული ოცნების” ხელისუფლება არ დაუშვებს სასამართლო სისტემაში ცვლილებებს, რომელსაც დასავლელი პარტნიორები და არასამთავრობო სექტორი საქართველოსგან ითხოვენ.
ℹ️ შეგახსენებთ, რომ დეკემბერში ევროკავშირმა საქართველოს ევროკავშირის წევრობის კანდიდატის სტატუსი მიანიჭა. მაგრამ, ბრიუსელმა განაცხადა, რომ სანამ წევრობის მოლაპარაკებები ოფიციალურად დაიწყება, თბილისს მოუწევს სასამართლო და საარჩევნო სისტემების რეფორმირება, ასევე პოლიტიკური პოლარიზაციის შემცირება, პრესის თავისუფლების გაუმჯობესება და ოლიგარქების ძალაუფლების შეზღუდვა.
“სასამართლოში დღემდე ითხოვენ ეგრეთ წოდებულ ვეტინგს [მოსამართლეთა კეთილსინდისიერების შემოწმების პროცედურა _JAMnews], ანუ უცხოური მმართველობის შემოღებას, რომელმაც რეპრესიები უნდა ჩაატაროს და სასამართლო სისტემა აგენტურით უნდა დააკომპლექტოს. მსგავს მიზანს ემსახურებოდა ცენტრალურ საარჩევნო კომისიასთან დაკავშირებული მოთხოვნებიც, რომლებიც საქართველოს პარლამენტმა სამართლიანად არ გაითვალისწინა”.
ივანიშვილმა თავის გამოსვლაში მაღალი შეფასება მისცა სასამართლო სისტემას. მისი თქმით, ქართული სასამართლო საერთაშორისო რეიტინგებში “სამართლიანობისა და ეფექტიანობის კრიტერიუმებით არაერთი ევროკავშირის წევრი ქვეყნის სასამართლოსაც კი უსწრებს” და თავისუფალია პოლიტიკური ზეწოლისგან.
ℹ️ შეგახსენებთ, რომ 2023 წლის 5 აპრილს აშშ-ის სახელმწიფო დეპარტამენტმა ოთხი ქართველი მოსამართლე დაასანქცირა. მიზეზად კორუფცია და უფლებამოსილების ბოროტად გამოყენება დასახელდა. ეს ის მოსამართლეები არიან, რომლებსაც ხელისუფლების ოპონენტები „ქართული ოცნების“ მითითებების აღმსრულებელი სასამართლო კლანის შემქმნელებს უწოდებენ. ეს იყო პირველი შემთხვევა, როდესაც აშშ-მა სანქციების მექანიზმი გამოიყენა და ისინი სწორედ სასამართლო სისტემას შეეხო. საერთაშორისო ანგარიშებში სულ უფრო ხშირად გვხვდება ჩანაწერი, რომ ქართულ სასამართლოში პრობლემებია. სასამართლო სისტემა საქართველოში პოლიტიკური გავლენის ინსტრუმენტია და ხელს უშლის ქვეყნის მისწრაფებას ევროატლანტიკური სივრცისკენ.
დასავლელი პარტნიორების მცდელობებს კი, რეფორმები განხორციელდეს სასამართლო სისტემაში, ივანიშვილი ასე ხედავს:
“გრძელდება დაჟინებული ზეწოლა ხელისუფლებაზე სასამართლოს ხელში ჩასაგდებად.”
ოპოზიცია
ივანიშვილმა ერთგვარად დაანონსა, რომ არჩევნების შემდეგ ქვეყანაში მნიშვნელოვანი ცვლილებები დაიწყება, რომლებიც ქვეყნის ყველაზე მსხვილი ოპოზიციური პარტიის წინააღმდეგ იქნება მიმართული:
“ბევრი ჩვენი თანამოქალაქე განაწყენებულია იმის გამო, რომ 2012 წელს „ნაციონალები“ სათანადოდ არ დავსაჯეთ. რეჟიმის არაერთმა ლიდერმა მრავალწლიანი სასჯელი მოიხადა… ამჟამად სასჯელს იხდის რეჟიმის მთავარი დამნაშავე, მიხეილ სააკაშვილი. თუმცა, არ მომხდარა „ნაციონალური მოძრაობის“, როგორც ერთიანი დანაშაულებრივი და მოღალატეობრივი დაჯგუფების გასამართლება… არჩევნების შემდეგ ჩვენ გვექნება იმის საშუალება, რომ კოლექტიურ ნაციონალურ მოძრაობას გამოვუტანოთ მკაცრი პოლიტიკური და სამართლებრივი განაჩენი”.
ივანიშვილის თქმით, არჩევნების შემდეგ “სუვერენიტეტის სრულად განმტკიცება” დაიწყება:
“საქმეში უშუალოდ ჩახედული ადამიანები დამეთანხმებიან, რომ მაშინ „ნაციონალების“ დასჯის არავითარი რესურსი არ გვქონდა, ურესურსოდ ნაბიჯების გადადგმა კი მხოლოდ კონტრპროდუქტიული იქნებოდა… ამ წლების განმავლობაში კი ჩვენ დავაგროვეთ საკმარისი რესურსი, რომ სუვერენიტეტის სრულად განმტკიცება დავიწყოთ. სწორედ ამას ემსახურება კანონი „უცხოური გავლენის გამჭვირვალობის შესახებ”, – თქვა ივანიშვილმა.
მისი თქმით, “არჩევნების შემდეგ, ნაციონალური მოძრაობა მკაცრად აგებს პასუხს ყველა იმ დანაშაულისთვის, რომელიც მან ორი ათწლეულის მანძილზე ქართული სახელმწიფოს და ქართველი ხალხის წინააღმდეგ ჩაიდინა!” [ნაციონალური მოძრაობა 9 წლის განმავლობაში იყო ხელისუფლების სათავეში. ორ ათწლეულში, სავარაუდოდ, ზოგადად პარტიის არსებობის წლები იგულისხმება _JAMnews]
დაბოლოს. ევროკავშირში გაწევრიანება
ამ ყველაფრის ბოლოს ივანიშვილმა თქვა, რომ 2030 წლისთვის საქართველო ევროკავშირის წევრი ქვეყანა გახდება.
“გაძლევთ პირობას, რომ ყველა წინააღმდეგობას გადავლახავთ, სუვერენიტეტსაც განვიმტკიცებთ, მშვიდობასაც შევინარჩუნებთ, ქართულ ეკონომიკასაც გავაძლიერებთ და 2030 წელს გავხდებით ევროკავშირის წევრი ქვეყანა”.
თუმცა, ევროკავშირში გაწევრიანებას საქართველო მხოლოდ თავისი “უნიკალური ისტორიით, ტრადიციებითა და იდენტობით” აპირებს, “რადგან მხოლოდ ასეთ შემთხვევაში შეიძლება ჰქონდეს ნამდვილი ფასი ევროკავშირს საქართველოსთვის და საქართველოს ევროკავშირისთვის”.
