რუმინეთმა, იტალიამ და ესპანეთმა ირაკლი კობახიძე ტყუილში ამხილეს

ირაკლი კობახიძე ტყუილში ამხილეს

რუმინეთი, იტალია და ესპანეთი აცხადებენ, რომ მხარი დაუჭირეს ევროკავშირის უმაღლესი წარმომადგენლის, კაია კალასის წინადადებას სანქციებთან დაკავშირებით და ტყუილში ამხილეს საქართველოს პრემიერმინისტრი, ირაკლი კობახიძე, რომელმაც რუმინეთს, უნგრეთს, სლოვაკეთს, იტალიასა და ესპანეთს “ევროკავშირის საბჭოზე ქართველი ხალხის მხარდამჭერი პოზიციის დაფიქსირების გამო” მადლობა გადაუხადა.

თავდაპირველად კობახიძის განცხადებას რუმინეთის საგარეო საქმეთა სამინისტრო გამოეხმაურა. რუმინეთის საგარეო უწყების თანახმად, მათი პოზიცია “არასწორად იქნა წარმოდგენილი”.

“ღრმად იმედგაცრუებული ვართ ევროკავშირის დონეზე შიდა დისკუსიების არაზუსტად წარმოდგენის გამო. ჩვენ ვიყენებთ ამ შესაძლებლობას, რათა კიდევ ერთხელ გამოვხატოთ ძლიერი შეშფოთება საქართველოს მთავრობის გადაწყვეტილებაზე ევროკავშირში გაწევრიანების დიალოგთან დაკავშირებით და ქართველი ხალხის ლეგიტიმური პროტესტის ძალადობრივად ჩახშობის გამო”, – წერს საგარეო საქმეთა სამინისტრო X-ზე.

რუმინეთის შემდეგ იტალია აცხადებს, რომ მხარი დაუჭირა ევროკავშირის უმაღლესი წარმომადგენლის კაია კალასის წინადადებას სანქციებთან დაკავშირებით.

“საქართველოში არსებული სიტუაციის შესახებ საგარეო საქმეთა საბჭოს დისკუსიის დროს, იტალიამ კვლავ დაადასტურა, რომ მკაცრად გმობს ნებისმიერ ძალადობას, რომელსაც ადგილი ჰქონდა ბოლო კვირების განმავლობაში, მხარი დაუჭირა ზომებს, რომლებიც უმაღლესმა წარმომადგენელმა/ვიცე-პრეზიდენტმა კალასმა წარადგინა, მათ შორის სანქციების წინადადებას (რომელიც სხვა სახელმწიფოების მხრიდან კონსენსუსის არარსებობის გამო არ დამტკიცდა).

ჩვენი ქვეყანა ასევე შეუერთდა კონსენსუსს დიპლომატიური ვიზების გაცემის გამარტივების შესახებ შეთანხმების შეჩერებას, რომელიც საბოლოოდ დამტკიცდა.

იტალიამ ასევე ხაზი გაუსვა იმას, რომ ევროკავშირი საქართველოს ხალხის გვერდით უნდა დარჩეს და გამოხატა იმედი, რომ თბილისის მიერ ბოლო პერიოდში მიღებული გადაწყვეტილებები, რომლებმაც ფაქტობრივად შეაჩერეს ქვეყნის ევროპული ინტეგრაციის გზა, გადაიხედება.” – ვკითხულობთ განცხადებაში.

როგორც გამოცემა ABC-სთან ესპანეთის საგარეო საქმეთა სამინისტრომ განმარტა, საქართველოს მთავრობის განცხადება, თითქოს ესპანეთმა გუშინდელ საგარეო საქმეთა საბჭოში გარკვეული პოზიცია დაიკავა, არ შეესაბამება სინამდვილეს.

“მინისტრ ალბარესის განცხადება ამ მხრივ ცალსახა იყო. ესპანეთმა, ევროკავშირის წევრი სახელმწიფოების უმრავლესობასთან ერთად, მხარი დაუჭირა სანქციების მიღებას და ღიად დაგმო მოქალაქეთა დემონსტრაციების ძალოვანი სტრუქტურების მიერ ჩახშობა.” – განმარტეს მადრიდში.

კობახიძის განცხადებას ესპანეთის საგარეო საქმეთა სამინისტრო X-ზეც გამოეხმაურა:

“ესპანეთმა ძალიან მკაფიოდ გამოხატა თავისი სერიოზული შეშფოთება საქართველოში სამოქალაქო უფლებებთან და სავარაუდო დეზინფორმაციულ კამპანიებთან დაკავშირებით. ჩვენ სრულად დავუჭირეთ მხარი საგარეო საქმეთა საბჭოს მიერ გუშინ მიღებულ გადაწყვეტილებებს. დეზინფორმაცია არის საფრთხე ჩვენი დემოკრატიისთვის, რომელსაც ჩვენ ყოველთვის ვეწინააღმდეგებით.”