სუს-ი აცხადებს, რომ ე.წ. ჰავანის სინდრომზე არსებული ვერსიის უსაფუძვლობის ხელახლა მტკიცება საჭირო არ არის
ჰავანის სინდრომი
საქართველოს სახელმწიფო უსაფრთხოების სამსახური (სუს) ეხმაურება The Insider-ის, 60 Minutes-ისა და Der Spiegel-ის ერთობლივ გამოძიებას ე.წ. ჰავანის სინდრომთან დაკავშირებით და აცხადებს, რომ არსებული ვერსიის უსაფუძვლობის ხელახლა მტკიცება საჭირო არ არის. სუს-ის განცხადებაში ნათქვამია, რომ უწყებამ კიდევ ერთხელ გადაამოწმა ფაქტები და დაელოდა “პარტნიორი მხარის ოფიციალურ განცხადებას”.
აღსანიშნავია, რომ უწყება განცხადებაში არაფერს რუსული სპეცსამსახურების აგენტის, ალბერტ ავერიანოვის 2021 წელს, სავარაუდოდ, თბილისში ყოფნის შესახებ.
● TI: სავარაუდოდ, რუსეთის მოქალაქეებმა თანხა შესწირეს „ოცნებას” და ბათუმთან მშენებლობის ნებართვა მიიღეს
● “Крым наш”: ხუთი მთავარი მითი ყირიმის შესახებ, რომლებსაც კრემლი ავრცელებს
რუსული The Insider-ი, ამერიკული ტელეკომპანია CBS-ი და გერმანული გამოცემა Spiegel-ი ერთობლივ გამოძიებას აქვეყნებენ, საიდანაც ირკვევა, რომ რუსეთის შეიარაღებული ძალების გენერალური შტაბის მთავარი სადაზვერვო სამმართველოს (გრუ) თანამშრომლები აკუსტიკურ თავდასხმებს ახორციელებდნენ აშშ-ის საელჩოს თანამშრომლებზე, რაც ე.წ. “ჰავანის სინდრომს” იწვევდა.
გამომძიებელმა ჟურნალისტებმა (ერთ-ერთი ავტორი ხრისტო გროზევია, რომელმაც ნავალნის მოწამვლის საქმე გამოიძია) გამოიკვლიეს აუხსნელი, უცნაური სიმპტომები, რომლებიც მსოფლიოს სხვადასხვა ქვეყანაში მყოფ ამერიკელ დიპლომატებს სხვადასხვა დროს, უცაბედად გამოუვლინდათ. მათ დაადგინეს, რომ სწორედ იმ მომენტში, როდესაც აშშ-ის თანამშრომლები ცუდად ხდებოდნენ, ამ კონკრეტულ ქვეყანაში გრუ-ს ნომერ 29155 სამხედრო ნაწილის ოფიცრები მოგზაურობდნენ.
გამოძიების ერთ-ერთი ქვეთავი ეთმობა თბილისს – 2021 წელს საქართველოს დედაქალაქში გრუ-ს აგენტები, მამა-შვილი ავერიანოვები იმყოფებოდნენ. მათი ვიზიტი საბედისწერო აღმოჩნდა აშშ-ის საელჩოს თანამშრომლის მეუღლისთვის – მრავალწლიანი მკურნალობისა და ქირურგიული ჩარევის მიუხედავად, ქალი დღემდე ვერ დაუბრუნდა სრულფასოვან ცხოვრებას.
რა წერია სუს-ის განცხადებაში
სახელმწიფო უსაფრთხოების სამსახური ეხმაურება ბოლო პერიოდში კონკრეტულ მედიასაშუალებებში გავრცელებულ ინფორმაციას მსოფლიოს რამდენიმე ქვეყანაში, მათ შორის საქართველოში, ამერიკელი დიპლომატების ჯანმრთელობის დაზიანების შესახებ. სუს-ი აღნიშნავს, რომ ინფორმაციის წყარო უცხოური ჟურნალისტური გამოძიება გახდა, რომლის თანახმად, ამერიკელი დიპლომატების მიმართ “თითქოს ჯანმრთელობის ანომალიურ ინციდენტს“ ჰქონდა ადგილი.
“მედიასაშუალებებში ინფორმაციის გავრცელების შემდეგ, სახელმწიფო უსაფრთხოების სამსახურმა შესაბამის რეაგირებამდე გარკვეული დროის განმავლობაში, კიდევ ერთხელ გადაამოწმა აღნიშნული ფაქტები და დამკვიდრებული საერთაშორისო პრაქტიკის გათვალისწინებით, დაელოდა საქმესთან უშუალო შემხებლობაში მყოფი პარტნიორი მხარის მიერ გაკეთებულ ოფიციალურ განცხადებას.
როგორც საზოგადოებისთვის ცნობილია, ისეთმა კომპეტენტურმა უწყებებმა, როგორებიცაა ამერიკის შეერთებული შტატების ცენტრალური სადაზვერვო სააგენტო და სახელმწიფო დეპარტამენტი, თავადვე ეჭვქვეშ დააყენეს შემოთავაზებული ჟურნალისტური გამოძიების შედეგების რეალურობა და არ დაადასტურეს ჟურნალისტების მიერ გამოქვეყნებული ფაქტების არსებობა არა მარტო საქართველოში 2021 წელს, არამედ სხვადასხვა წელს მსოფლიოს სხვადასხვა ქვეყანაში, მათ შორის, გერმანიაში, ავსტრიაში, პოლონეთში, კუბაში და სხვ.
საქართველოს სახელმწიფო უსაფრთხოების სამსახური აღნიშნულ რეაგირებას სავსებით ამომწურავად მიიჩნევს, რითაც სრულად დაკმაყოფილდა საზოგადოების ინტერესი და თვლის, რომ არსებული ვერსიის უსაფუძვლობის ხელახლა მტკიცება საჭირო არ არის.
სამწუხაროა, რომ ამერიკელი პარტნიორების მხრიდან ამომწურავი განმარტების მიუხედავად, საქართველოში მაინც აღმოჩნდნენ პოლიტიკურად ანგაჟირებული ცალკეული პირები და მედიასაშუალებები, რომლებიც შეეცადნენ ეს საკითხი, როგორც ყოველთვის, გამოეყენებინათ სპეკულაციებისთვის და სახელმწიფო უსაფრთხოების სამსახურის დისკრედიტაციის მცდელობისთვის.
აქვე გვსურს საზოგადოება დავარწმუნოთ, რომ რეგიონში მომატებული გამოწვევების ფონზე უსაფრთხოება ქვეყანაში დაცულია მაქსიმალურ დონეზე, რაც გამოიხატა კიდეც ბოლო წლების მშვიდობიან თანაცხოვრებაში.” – წერია განცხადებაში.
