იური კიმი: სიცრუეა "ქართული ოცნების" ნარატივები ე.წ. გლობალური ომის პარტიასა და მეორე ფრონტზე
გლობალური ომის პარტია და მეორე ფრონტი
ევრაზიულ საკითხებში აშშ-ს სახელმწიფო მდივნის თანაშემწის, იური კიმის თქმით, სიცრუეა “ქართული ოცნები” ნარატივები ე.წ. გლობალური ომის პარტიასა და მეორე ფრონტზე. ამის შესახებ ინფორმაციას ჟურნალისტი ალექს რაუფოღლუ ავრცელებს. იური კიმმა საქართველოს მთავრობის შესახებ Carnegie Endowment-ის ღონისძიებაზე ისაუბრა, რომელიც ეხებოდა აშშ-ს როლს სამხრეთ კავკასიაში ახალ რეგიონული წესრიგში.
როცა ირწმუნები, რომ აშშ-ს სურს საქართველოში მეორე ფრონტის გახსნა – ფეიკ ნიუსია… როცა ირწმუნები, რომ ამერიკელი ელჩი, ამერიკის პრეზიდენტის პირადი წარმომადგენელი, რაღაცგვარად ჩართულია საქართველოს მსგავსი მეგობრული ქვეყნის არჩეული მთავრობის წინააღმდეგ გადატრიალების საიდუმლო ოპერაციაში, კვლავ – ფეიკ ნიუსია.
როცა ირწმუნები, რომ არსებობს გლობალური ომის პარტია, რომელსაც სურს საქართველოს ავნოს – ფეიკ ნიუსია. როცა ირწმუნები, რომ, ვაშინგტონის მაღალჩინოსნების ქართული ოცნების ქმედებების კრიტიკის მიუხედავად, აშშ-სთან ურთიერთობა ჯანსაღია, როგორც არასდროს – ფეიკ ნიუსია.” – თქვა იური კიმმა.
როგორც ალექს რაუფოღლუ ციტირებს, კიმმა ხაზი გაუსვა, რომ შეუძლებელია ორი ურთიერთგამომრიცხავი გარემოების ერთდროულად არსებობა.
ორივე ერთდროულად ვერ იქნება… ჯერ ვერ იტყვი, რომ შენს ხალხს წარმოადგენ და გსურს მომავალი ევროპაში და მტკიცე ურთიერთობა შეერთებულ შტატებთან, შემდეგ კი გააკეთო რაღაცები, რაზეც შენმა ხალხმა და მეგობრებმა მიგანიშნეს, რომ ეს სწორედ ისაა, რასაც რუსეთი აკეთებს და რაც რუსეთს უნდა.
ეს სიგიჟეა, განსაკუთრებით მაშინ, როცა ქვეყნის 20% რუსეთის მიერ არის ოკუპირებული.” – წერს რაუფოღლუ.
“გლობალური ომის პარტია”, “ნაციონალური მოძრობა”, “უკრაინიზიაცია” – ძველი მესიჯბოქსით მმართველმა პარტია “ქართულმა ოცნებამ” წინასაარჩევნო კამპანია 16 ივლისს დაიწყო. ოცნების ახალი ცენტრალური ოფისის გახსნაზე პრემიერმინისტრმა ირაკლი კობახიძემ განაცხადა, რომ მმართველი პარტია “სულ მცირე 12 წელიწადი” არცერთი არჩევნების წაგებას არ აპირებს.
ყრილობაზე სიტყვით გამოვიდა პარტიის საპატიო თავმჯდომარე და ქვეყნის არაფორმალური მმართველი ბიძინა ივანიშვილიც. როგორც მან აღნიშნა, 2012 წელს, ქართულმა საზოგადოებამ წარსულს ჩააბარა „ნაციონალური მოძრაობის“ რეჟიმი, თუმცა, როგორც “მოგვიანებით გაირკვა”, მათ ღრმად ჰქონდათ ფესვები გადგმული და წარმოადგენდნენ გლობალური გავლენის მქონე ძალის აგენტურას.
გახსნაზე ცნობილი გახდა ისიც, რომ “ქართული ოცნება” და მისგან ფორმალურად გამოყოფილი პრორუსული “ხალხის ძალა” 2024 წლის საპარლამენტო არჩევნებზე საერთო სიით წარდგებიან. ამის შესახებ პარტიის აღმასრულებელმა მდივანმა, მამუკა მდინარაძემ განაცხადა.
