"ომის მიზეზი იყო უკრაინის ნება, გამხდარიყო NATO-ს წევრი, ვხედავთ შედეგებს" - პრემიერის გამოსვლა ბრატისლავაში
ღარიბაშვილის გამოსვლა ბრატისლავაში
ბრატისლავაში, გლობალური უსაფრთხოების ფორუმზე გამოსვლისას საქართველოს პრემიერმინისტრმა ირაკლი ღარიბაშვილმა განაცხადა, რომ უკრაინაში ომის მიზეზი იყო უკრაინის ნება, გამხდარიყო NATO-ს წევრი და ყველა “ვხედავთ შედეგებს”.
კიდევ რა თქვა საქართველოს პრემიერმა
● ყველამ იცის მგონი მიზეზი [ომის დაწყების]… მგონი, კარგად იცით, დარბაზმაც იცის – ერთ-ერთი მიზეზი იყო NATO, NATO-ს გაფართოება, ხომ ასეა? და ბევრი სხვა მიზეზი. არ მინდა ამაზე სპეკულირება, არც ციტირება მინდა რუსეთის მთავრობის, მაგრამ ერთ-ერთი მიზეზი იყო უკრაინის ნება და განზრახვა გამხდარიყო NATO-ს წევრი. ამიტომ, ჩვენ ვხედავთ შედეგებს.
● ყველა ქართველის და ჩვენი მთავრობის საბოლოო მიზანი არის იმის მიღწევა, რასაც ჰქვია დეოკუპაცია მშვიდობიანი გზით. 2012 წელს, როცა მოვედით ხელისუფლებაში, ჩვენ დავნერგეთ ახალი მიდგომა – ჩვენ მას სტრატეგიულ მოთმინებას ვუძახით.
● საქართველოს აქვს უშუალო საზღვარი – 600 კმ. რუსეთთან. ეს არის ჩვენთვის დიდი გამოწვევა. მიუხედავად იმისა, რომ ერთის მხრივ ეს ოკუპაცია ჩვენს ქვეყანას უდიდესი რისკებისა და გამოწვევების წინაშე აყენებს, მეორე მხრივ, საქართველომ მოახერხა და მიაღწია უსაფრთხოების, სტაბილურობის და მშვიდობის უზრუნველყოფას.
● როცა 90-იან წლებში დამოუკიდებლობა დავიბრუნეთ, ჩვენი მთავრობის არსებობა არის ერთადერთი პერიოდი, როდესაც ქვეყანაში მშვიდობა გვაქვს. სხვა მთავრობის პირობებში, 90-იანებიდან მოყოლებული, გვქონდა ომი, ესკალაცია და კონფლიქტი. ჩემ პერიოდში ეს არ ყოფილა, ტერიტორიებიც არ დაგვიკარგავს.
● როდესაც საქართველოს მიეცა ჩამონათვალი ევროკომისიის მხრიდან, ჩვენ მყისიერად დავიწყეთ მათზე მუშაობა, ამ პროცესში ჩავერთეთ და ივნისისთვის ყველაფერი იქნება დასრულებული. ყველაფერი დასრულდება ერთი რეკომენდაციის გარდა – ეს არის დეპოლარიზაცია ან პოლარიზაციის დასრულება.
● თუ გვინდა, თავიდან ავიცილოთ შემდეგ სამიტზე მსგავსი კითხვები და მსგავსი პოლარიზაცია, მაშინ სტატუსი მოგვანიჭეთ. სტატუსი დაასრულებს პოლარიზაციას საქართველოში
მანამდე ღარიბაშვილს შოთა ღვინერიამ დაუსვა კითხვა, აქვს თუ არა მთავრობას გააზრებული რუსეთზე დამოკიდებულების გაზრდის შედეგები და ოკუპანტთან ურთიერთობების დაჩქარების პირობებში რა გავლენა ექნება საქართველოზე რუსეთის დამარცხებას. პრემიერმა კითხვას პროვოკაციული უწოდა.
“დარბაზისთვის მინდა ვთქვა, ვინ არის ეს ადამიანი – ოპოზიციის წარმომადგენელია, ოპოზიციის რიგებიდან არის. იყო ჩვენი მთავრობის წევრი ორიოდე წლის წინ. ცოტათი უცნაური არ არის, რომ ჩამოვიდა ბრატისლავაში და დამისვა ეს პროვოკაციული შეკითხვა?
დარბაზში ყველას ესმის, რომ საქართველო აჩვენებს ძალიან გონივრულ, ძალიან პრაგმატულ, საკმაოდ უნიკალურ დამოკიდებულებას. ჩვენ ამ რთულ სიტუაციაში ნავიგაციას ვცდილობთ და თან წინ მივიწევთ ჩვენს ევროკავშირის გზაზე. კონკრეტულ. ჩვენი ხელისუფლებაში ყოფნის პერიოდში ჩვენ გავაკეთეთ მაქსიმუმი. ამიტომ, სჯობს აქცენტი გავაკეთოთ გაერთიანებაზე, ჩვენ უნდა ვიყოთ ერთიანი – ასეთი ყალბი ინფორმაციის გავრცელება არ უნდა ხდებოდეს, რომ რუსეთთან ურთიერთობები გააქტიურდა”. – უპასუხა მას ირაკლი ღარიბაშვილმა.
იმავეს იმეორებს მმართველი პარტიის თავმჯდომარე ირაკლი კობახიძეც. იგი უკრაინაში ომის დაწყების “ერთ-ერთ მიზეზზე” საუბრობს და ამბობს, რომ ოკუპანტმა ქვეყანამ უკრაინას NATO-სკენ სწრაფვა “არ აპატია”. თუმცა მისი თქმით, ამას თავად დასავლელი ლიდერებიც ამბობენ.
“ამას ადასტურებს მთელი დასავლეთიც, მთელი დასავლეთიც ამას ამბობს, ხომ – რაღაცა მიზეზები ჰქონდა ამ კონკრეტულ სამხედრო აგრესიას და ერთ-ერთი მიზეზი… ამას ამბობენ დასავლელი ლიდერები, რომ რუსეთმა – არაერთი განცხადებაა ასეთი – არ აპატია უკრაინას სწრაფვა NATO-სკენ, ეს არის დასავლელი ლიდერების განცხადება, აქ რა შუაშია რუსეთი და ბელარუსი. არაერთ განცხადებაა, არა კაცო რა შუაშია? არის ეს დამოკიდებულება, ეს პოზიცია, ეს შეხედულება, რომ უკრაინა დაისაჯა NATO-ში გაწევრიანების სურვილისთვის. ამას აცხადებენ ძალიან ხშირად დასავლელი პოლიტიკოსები, ეს არის ფაქტის კონსტატაცია.” – აცხადებს კობახიძე.
● პაატა ზაქარეიშვილი: ირაკლი ღარიბაშვილმა მიანიშნა, რომ ჩვენ გვინდა მშვიდობა რუსეთთან
● ნიკა გვარამია: ღარიბაშვილის ტექსტები იყო კატასტროფა, საქართველო დღეს გრუზიაც კი აღარაა – ბელოგრუზიაა
● ირაკლი ღარიბაშვილი: ჩვენი ომი ომი არაა და უკრაინის არის? კიდევ რა თქვა პრემიერმა კატარში
აღსანიშნავია, რომ 24 მაისს, საქართველოს პრემიერმინისტრმა ირაკლი ღარიბაშვილმა კატარის ეკონომიკური ფორუმის პანელურ დისკუსიაზე გამოსვლისას კიდევ ერთხელ გაიმეორა, რომ 20% უკრაინის ტერიტორიისა უკვე არის რუსეთის მიერ ოკუპირებული და “არავინ იცის როდის” დამთავრდება ეს ომი. მისივე თქმით, ყველას უკვირს, რომ უკრაინამ “ამდენი ხანი” გაძლო.
პრემიერი ასევე შეეხო რუსეთთან ფრენების აღდგენას და განაცხადა, რომ ეს “ჩვეულებრივი” ამბავია. ღარიბაშვილმა კიდევ ერთხელ გაიმეორა პროპაგანდისტული გზავნილები და თქვა, რომ ამ კრიზისის განმავლობაში ჩინეთს ძალიან ჭკვიანური მიდგომა აქვს – მედიაციას ცდილობს უკრაინასა და რუსეთს შორის.
