ღარიბაშვილი ზელენსკიზე: ხშირად მისი განცხადებები სრულ თანხვედრაშია საქართველოს მტრულ ძალებთან
ღარიბაშვილი ზელენსკის პასუხობს
კიშინიოვში მყოფ საქართველოს პრემიერ-მინისტრს ირაკლი ღარიბაშვილს ჟურნალისტებმა უკრაინის პრეზიდენტ ვოლოდიმირ ზელენსკის განცხადების კომენტირება სთხოვეს.
ღარიბაშვილმა თქვა, რომ ხშირად ზელენსკის განცხადებები დესტრუქციული ოპოზიციის განცხადებებს ემთხვევა. ოპოზიციას ღარიბაშვილმა “მტრული ძალები” უწოდა:
“რაც შეეხება ზელენსკის განცხადებას, მე ამაზე კომენტარს ვერ გავაკეთებ, ეს ქვეყანა ომშია, თვითონაც ომში არის და მე არ მინდა გარკვეული სპეკულირების საფუძველი და საშუალება მივცე სხვა, ჩვენი ქვეყნის არაკეთილმოსურნე ადამიანებს. ასევე დავამატებდი, სამწუხაროა ის ფაქტი, რომ ხშირად ზელენსკის და მისი მთავრობის განცხადებები სრულ თანხვედრაშია ჩვენი ქვეყნის შიგნით მოქმედ მტრულ ძალებთან, ვგულისხმობ დესტრუქციულ ოპოზიციას, რომელიც არაფერს აკეთებს თუნდაც ევროინტეგრაციის გზაზე, რომ გაიმარჯვოს ჩვენმა ქვეყანამ, მიიღოს სტატუსი და ეს იქნებოდა ჩემი კომენტარი”, – თქვა ირაკლი ღარიბაშვილმა.
მისი თქმით, იგი განიცდის იმას, რაც უკრაინაში ხდება და მას მშვიდობას უსურვებს.
„მე ერთი რამ მინდა კიდევ ერთხელ ვუსურვო ომში მყოფ ქვეყანას, მშვიდობა, ამ ომის მალე დასრულება და ქვეყნის გამთლიანება,” – განაცხადა პრემიერმა.
მან ევროპელ პარტნიორებს მოუწოდა საქართველოს ევროკავშირის წევრობის კანდიდატის სტატუსი მისცენ. მისი თქმით, სტატუსის მინიჭება მინიმუმამდე დაიყვანს ქვეყნის შიგნით არსებულ პოლარიზაციას.
„ჩემი ერთ-ერთი მთავარი სათქმელი, რაც მე ჩამოვიტანე ჩვენს ევროპელ კოლეგებთან იყო შემდეგი, რომ თუ რეალურად ევროპას და ჩვენს ევროპელებს სურთ, რომ იხილონ მინიმუმამდე დაყვანილი, შემცირებული პოლარიზაცია, მე მათ ვუთხარი, რომ სტატუსის მონიჭება ავტომატურად შეამცირებს, დაიყვანს მინიმუმამდე ქვეყნის შიგნით არსებულ პოლარიზაციას. ეს ხარისხი ავტომატურად დაიწევს. მათ ეს არგუმენტი მოისმინეს და ვფიქრობ, გაიზიარეს”, – განაცხადა საქართველოს პრემიერ-მინისტრმა.
კიშინიოვში ევროპული პოლიტიკური გაერთიანების (EPC) რიგით მეორე სამიტი მიმდინარეობს. საქართველოს სამიტზე პრემიერ-მინისტრი ირაკლი ღარიბაშვილი წარმოადგენს.
სამიტის გახსნის ცერემონიაზე სიტყვით გამოსვლისას უკრაინის პრეზიდენტმა ბელარუსთან ერთად საქართველო ახსენა იმ კონტექსტში, რომ მათ რუსეთი “სახელმწიფოებრივ განუკითხაობაში” მიათრევს.
