"ღამის სერენადები" - ბიჭვინთიდან ანაკლიაში

“ღამის სერენადები – ყველაზე ახლოს აფხაზეთთან” – კლასიკური მუსიკის ამ სახელწოდების ფესტივალი ანაკლიის ციხესიმაგრეში, ღია ცის ქვეშ ზაფხულის ბოლო დღეებში გაიმართა.

პირველი “ღამის სერენადები” 1982 წელს ბიჭვინთაში, ცნობილი მევიოლინე და დირიჟორი ლიანა ისაკაძის ინიციატივით გაიმართა და 1991 წლამდე ყოველ წელს ტარდებოდა აფხაზეთში. 8 წლის წინათ ფესტივალი ბათუმში აღადგინეს. წელს კი, მას პირველად უმასპინძლეს სამეგრელოში, ანაკლიაში.

კლასიკური მუსიკის შედევრები შეასრულეს – ლიანა ისაკაძემ, მსოფლიო კამერულმა ანსამბლმა “ვირტუოზები” და ცეზარ ალვარესმა.

კონცერტის დასრულებისას ლიანა ისაკაძემ ჟურნალისტებს უთხრა, რომ მან “ორკესტრთან ერთად გადმოსცა ის სევდა, ტკივილი და დანაკლისი, რაც ქართველ ხალხს აფხაზეთთან აკავშირებს.” 

“ძალიან მიხარია, რომ კონცერტი ჩატარდა ანაკლიაში, ბიჭვინთასთან ახლოს, საიდანაც დაიწყო ამ ფესტივალის ისტორია 1982 წელს. ეს კონცერტი ბინჭვინთაში ეკლესიაში ტარდებოდა  და დარბაზში ტევა არ იყო.”

 გამოქვეყნდა: 1.09.2016