სტრასბურგმა საქართველოს წინააღმდეგ გადაწყვეტილება მიიღო: კარვის გამო დაკავებული აქტივისტის უფლებები დაირღვა
სტრასბურგის გადაწყვეტილება კარვის გაშლის საქმეზე
ადამიანის უფლებათა ევროპულმა სასამართლომ დაადგინა, რომ საქართველომ მოქალაქე ზურაბ ქარჩავას გამოხატვისა და შეკრების თავისუფლება დაარღვია, როდესაც ის ბათუმში, საკონსტიტუციო სასამართლოსთან კარვის გაშლის გამო დააკავა.
საქმის შესახებ ინფორმაციას „საქართველოს ახალგაზრდა იურისტთა ასოციაცია“ ავრცელებს. სტრასბურგის სასამართლომ სახელმწიფოს ქარჩავასთვის 1 000 ევროს გადახდა დააკისრა მორალური ზიანის ასანაზღაურებლად.
საქმე 2022 წლის მოვლენებს ეხება. მაშინ ზურაბ ქარჩავა ბავშვებისთვის სკოლებში უფასო კვების მოთხოვნით პროტესტს მართავდა. მან საკონსტიტუციო სასამართლოსთან, მემედ აბაშიძის ძეგლის მიმდებარედ, კარვის გაშლა სცადა, რის შემდეგაც დააკავეს და ადმინისტრაციულ სამართალდამრღვევად ცნეს.
საქართველოს ხელისუფლება ამტკიცებდა, რომ კარავი სასამართლოს მუშაობას შეუშლიდა ხელს. ასევე საუბარი იყო ძეგლის შესაძლო დაზიანებასა და საახალწლო პერიოდში პიროტექნიკის გამოყენებასთან დაკავშირებულ რისკებზე.
თუმცა ევროპულმა სასამართლომ მიიჩნია, რომ ამ არგუმენტებს საკმარისი დასაბუთება არ ჰქონდა. გადაწყვეტილებაში აღნიშნულია, რომ ეროვნულმა სასამართლოებმა ვერ ახსნეს, რატომ იყო აუცილებელი ქარჩავას უფლებებში ასეთი ჩარევა. სასამართლომ ასევე გაითვალისწინა, რომ კარავი თავად ობიექტთან ახლოს არ იყო განთავსებული, არ არსებობდა ძეგლის დაზიანების რეალური საფრთხე და არც პიროტექნიკის გამოყენებასთან დაკავშირებული კონკრეტული ღონისძიება იგეგმებოდა.
სტრასბურგმა დაადგინა, რომ დაირღვა როგორც გამოხატვის თავისუფლება, ისე მშვიდობიანი შეკრების უფლება. გადაწყვეტილებაში ხაზგასმულია, რომ ქარჩავას ერთდღიან ადმინისტრაციულ დაკავებას შეიძლებოდა სხვა მოქალაქეებისთვისაც შეექმნა შემაკავებელი სიგნალი და ადამიანებს პროტესტის გამოხატვისგან შეეკავებინა.
