უკრაინის ელჩი: საქართველოს ერთი თვის წინ ვთხოვეთ გენერატორები, მაგრამ ხელისუფლება არ გვპასუხობს
გაზიარება
გაზიარება
გენერატორები უკრაინისთვის
უკრაინის მიმართ მორალური მხარდაჭერისა და დაღუპული მებრძოლების ხსოვნის პატივისცემის ნიშნად, კარგი იქნებოდა თბილისის ქუჩებს უკრაინის ომში დაღუპული ქართველი და უკრაინელი მებრძოლების სახელები მიენიჭოს, – ასეთი განცხადება გააკეთა 6 დეკემბერს ბრიფინგზე საქართველოში უკრაინის ელჩის მოვალეობის შემსრულებელმა ანდრი კასიანოვმა.
კასიანოვმა ბრიფინგზე თქვა, რომ ამ ინიციატივით უკვე არაერთხელ მიმართეს თბილისის საკრებულოს, თუმცა პასუხი არ მიუღიათ:
“ჩვენ დღემდე არ მიგვიღია ოფიციალური პასუხი თბილისის საკრებულოს თავმჯდომარისგან განმეორებით ოფიციალურ მოწოდებაზე, რათა აღვნიშნოთ უკრაინისა და საქართველოს სუვერენიტეტისა და დამოუკიდებლობისთვის მებრძოლი გმირების მამაცობა. დღეს, 6 დეკემბერს, უკრაინის შეიარაღებული ძალების დღეს, უკრაინისა და საქართველოს გმირების ქუჩების გახსნა იქნებოდა კარგი შესაძლებლობა, რომ პატივი მიგვეგო ყველა იმ უკრაინელი და ქართველი ჯარისკაცისთვის, რომლებიც საკუთარი სიცოცხლის დაზოგვის გარეშე იცავდნენ ჩვენს ქვეყნებს საერთო მტრისგან – რუსეთის ფედერაციისგან“, – თქვა კასიანოვმა საელჩოში გამართულ ბრიფინგზე.
მან მადლობა გადაუხადა ქართველ მეომრებს, რომლებიც უკრაინაში იბრძვიან და თქვა, რომ ეს არის ბრძოლა არა მხოლოდ უკრაინის, არამედ საქართველოს დამოუკიდებლობისთვისაც.
ამავე ბრიფინგზე კასიანოვმა კიდევ ერთ უპასუხოდ დარჩენილ თხოვნასა და ინიციატივაზე ისაუბრა.
კასიანოვის თქმით, უკრაინის საელჩომ ერთი თვის წინ მიმართა საქართველოს მთავრობას – უკრაინაში გასაგზავნად გენერატორები და ტრანსფორმატორები სთხოვა, თუმცა პასუხი ამ დრომდე არ მიუღიათ.
„უკრაინას ამჟამად უკიდურესად სჭირდება დახმარება ელექტროენერგეტიკული სისტემის აღდგენაში – გენერატორებიდან და ტრანსფორმატორებიდან დაწყებული, რათა უზრუნველვყოთ განათება საავადმყოფოებისთვის, სახლებისთვის და სკოლებისთვის. კრემლის არაადამიანები და ჯალათები გულწრფელნი არიან თავიან განზრახვაში – მათ უნდათ გაანადგურონ უკრაინელები სიცივით. ერთი თვის წინ ჩვენ მივმართეთ საქართველოს მთავრობას შესაბამისი თხოვნით, თუმცა, სამწუხაროდ, დადებითი გადაწყვეტილება დღემდე არ მიგვიღია“, – განაცხადა კასიანოვმა.
გენერატორებსა და ტრანსფორმატორებს უკრაინაში მას შემდეგ აგროვებენ, რაც რუსული ავიაიერიშების შედეგად ქვეყნის ენერგომომარაგება თითქმის სრულ კოლაფსშია და ზამთრის დადგომასთან ერთად მილიონობით ადამიანი უშუქოდ და სითბოს გარეშე რჩება.
ჰუმანიტარული კატასტროფის ზღვარზე მყოფ უკრაინას გენერატორებს სხვადასხვა ქვეყნის მთავრობები გადასცემენ, გარდა ამისა გენერატორებისთვის აგროვებენ ფულს მთელი მსოფლიოს მასშტაბით რიგითი ადამიანები. “იმედის გენერატორები” ასე ჰქვია კამპანიას, რომელიც ევროპულ ქალაქებში წამოიწყეს – ადამიანები აგროვებენ ფულს, რომ უკრაინას გენერატორები უყიდონ.
მსგავსი სამოქალაქო ინიციატივა გაჩნდა საქართველოშიც, რომელსაც ჰქვია Поділися світлом გაუზიარე სინათლე. საქართველოს ხელისუფლება ამ პროცესში არ მონაწილეობს.
