ონლაინ კაზინო „ევოლუშენ ჯორჯიაში“ დასაქმებული 5 000-მდე ადამიანი გაიფიცა. მოკლედ, რა უნდა ვიცოდეთ
გაფიცვა „ევოლუშენ ჯორჯიაში“
პროფკავშირების ცნობით, საქართველოში ონლაინ კაზინო „ევოლუშენ ჯორჯიას“ თანამშრომლების ნაწილი გაიფიცა. ამ დროისთვის გაფიცვაში, რომელიც 12 ივლისს დაიწყო, 4621 ადამიანი მონაწილეობს, რაც კომპანიაში დასაქმებულთა ნახევარზე მეტია.
“ევოლუშენში” მასშტაბური გაფიცვა შედგა. დღეს საღამოს 19:00 საათზე, მექანიზაციის #2-ში სოლიდარობის აქცია გაიმართება” – წერს მაუწყებელი.
გაფიცულთა მთავარი მოთხოვნა ღირსეული სამუშაო პირობებია, პირველ რიგში კი მათ ანაზღაურების ზრდა სურთ.
„ევოლუშენში“ დასაქმებულებმა კომპანიას 44 მოთხოვნა წაუყენეს. გაფიცვამდე მიმდინარეობდა მედიაციის პროცესიც, რომელიც 2024 წლის 4 ივნისს დაიწყო და 24 ივნისს შეთანხმების გარეშე დასრულდა. ამის მიზეზად პროფკავშირის საორგანიზაციო კომიტეტის ერთ-ერთი წევრი, ნიკოლოზ კატარაპიაშვილი, მენეჯმენტის მხრიდან მათ მიმართ არასერიოზულ დამოკიდებულებას ასახელებს.
კომპანია „ევოლუშენ საქართველოს“, რომელიც 2018 წელს დაფუძნდა, დღევანდელი მონაცემებით, 7000-მდე თანამშრომელი ჰყავს, რომელთა საშუალო ასაკი 25 წელია.
კომპანიაში უმეტესწილად სტუდენტები ან ისეთი ადამიანები არიან დასაქმებულნი, რომლებსაც ძირითადი სამსახურის გარდა, სურთ დამატებითი შემოსავალი ჰქონდეთ.
ისინი კვირაში სამი დღე მუშაობენ და თავად ირჩევენ სამუშაო გრაფიკს. კომპანია ონლაინკაზინოებს ემსახურება, რაც გულისხმობს კაზინოებისთვის ლაივთამაშების წაყვანის მომსახურებას სპეციალურად მოწყობილი სტუდიებიდან.
კომპანია ექვს შენობაშია განთავსებული, ოთხ მათგანში კი მოწყობილია ის სტუდიები, საიდანაც ონლაინკაზინოების თამაშების ტრანსლირება ხდება.
რას მოითხოვენ გაფიცულები
გაფიცვის მონაწილეები მოითხოვენ:
● მეტ დროს შესვენებისთვის;
● სამუშაო სივრცეში სანიტარული და ჰიგიენური პირობების გაუმჯობესებას;
● უსაფრთხო და კომფორტულ სამუშაო გარემოს;
● სამუშაო სივრცეში ჯანსაღი კვების უზრუნველყოფასა და საკვებ ვაუჩერებს;
● სადაზღვევო პაკეტის გაუმჯობესებას;
● დისკრიმინაციისა და ღირსების შემლახველი დამოკიდებულებებისგან თავისუფალ გარემოს.
● თამაშს დაემატოს წარმდგენებისა და ბანქოს მჩეხავებისთვის „თიფის“ დატოვების ფუნქცია;
● სამუშაო სივრცეში მიიყვანონ ექიმი და გახსნან სამედიცინო პუნქტი;
● მისცენ შესვენებით სარგებლობის უფლება სამი მაგიდის შემდეგ;
● გაუმჯობესდეს სტუდიებში ტემპერატურის კონტროლი;
● გაიზარდოს ნივთების შესანახი კარადების რაოდენობა და ყველა დასაქმებულს ჰქონდეს პერსონალური კარადა;
● აღიჭურვოს მონიტორები დამცავი ფარებით;
● დამსაქმებელმა უზრუნველყოს უნიფორმების და მაკიაჟის ხარჯი;
● დაემატოს კვების ობიექტი, საჭმლის შესანახი მაცივრები, გამოსაცვლელი და მოსასვენებელი სივრცეები;
● სათამაშო მაგიდაზე დაუშვან ხელსახოცები;
● გაორმაგდეს სამუშაო საათების ანაზღაურება რელიგიური და ეთნიკური კუთვნილების შესაბამის დღესასწაულებზე მუშაობის შემთხვევაში;
● საჩივრის წარდგენის სისტემა გამარტივდეს და სხვა.
ღირსების შემლახველ დამოკიდებულებაზე საუბარი მას შემდეგ გააქტიურდა, რაც სოციალურ ქსელში გავრცელდა ე.წ. სქრინები “ევოლუშენ ჯორჯიას” მენეჯმენტის საერთო ჩატიდან, სადაც ისინი თანამშრომლებს შეურაცხმყოფელ კონტექსტში მოიხსენიებენ და დასცინიან. ინფორმაცია ამის შესახებ თავდაპირველად „მაუწყებელმა“ გაავრცელა.
მოგვიანებით გაირკვა, რომ აღნიშნული სქრინები რამდენიმე წლის წინანდელია. თუმცა კომპანიის თანამშრომლები მედიასთან აცხადებენ, რომ მსგავსი დამოკიდებულება მენეჯმენტის მხრიდან კვლავ გრძელდება. მათი თქმით, ამ ადამიანთა ნაწილი დღემდე მუშაობს კომპანიაში.
„ევოლუშენ საქართველო“ ოფიციალური განცხადებით გაემიჯნა მენეჯერების შიდა მიმოწერის შინაარსს. განცხადებაში ეწერა, რომ ასეთი ქმედებები მათთვის კატეგორიულად მიუღებელია და „დაწყებულია შესაბამისი მოქმედებები, რათა გამოკვლეულ იქნას პრობლემის სათავე” და მიიღონ უმკაცრესი ზომები.
“გავრცელებული ინფორმაცია, რომელიც რამდენიმე თანამშრომლის მიმოწერას ეხება, ჩვენთვის კატეგორიულად მიუღებელია. დაწყებულია შესაბამისი ქმედებები, რათა გამოკვლეულ იქნას პრობლემის სათავე და მივიღოთ უმკაცრესი ზომები. არ დავიშურებთ ძალისხმევას, რათა დავრწმუნდეთ, რომ ყველა თანამშრომელი იცავს და პატივს სცემს ჩვენს საერთო ღირებულებებს.
ყველაფერს ვაკეთებთ პატივისცემასა და ნდობაზე დაფუძნებული გარემოს უზრუნველსაყოფად, თუმცა 8000-მდე ადამიანისგან შემდგარ გუნდში, სამწუხაროდ, ყოველთვის იქნება გამოწვევები თანამშრომლების გაკონტროლებასა და მიუღებელი ქმედებების დროულად გამოვლენასთან დაკავშირებით”, — ვკითხულობთ განცხადებაში, რომელიც კომპანიის ფეისბუქგვერდზე 3 ივლისს გამოქვეყნდა.
სიბინძურე, “მუშაობა წაქცევამდე” და სხვა პრობლემები
ძირითადად სწორედ სტუდიებში დასაქმებული თანამშრომლების ნაწილი, მათ შორის თამაშის წარმდგენები თუ ბანქოს მჩეხავები, უყენებენ კომპანიას მოთხოვნებს და ამტკიცებენ, რომ დასაქმებულებს რთულ პირობებში უწევთ მუშაობა. ამბობენ, რომ სტუდიებში აქვთ ვენტილაციისა და ტემპერატურის კონტროლის პრობლემა, ხოლო შენობების საპირფარეშოებში ანტისანიტარიაა.
„ხალიჩებში ჩამჯდარია მტვერი. გვყავს რწყილები, ტკიპები, სხვადასხვა სახის მწერი. დაკბენილები არიან თანამშრომლები. ზოგი ძალიან ალერგიულია და საავადმყოფოშიც გადაუყვანიათ მაგის გამო. მეც დამეწყო ალერგია. ორი წლის წინ არაფერი მჭირდა, მაგრამ ახლა მაწუხებს. მოთამაშეები მწერენ, რა გჭირსო… ძალიან შემაწუხებელია“, — ასე აღწერს თავის სამუშაო პირობებს “ნეტგაზეთთან” ინტერვიუში “ევოლუშენ ჯორჯიას” თანამშრომელი ეკა კაბოსნიძე.
თანამშრომლები სოციალურ ქსელებში ავრცელებენ ფოტოებს, რომელთა მინაწერის თანახმადაც, მათ სამუშაო ადგილებზე მწერები კბენენ. ხოლო სკამები, რომლებზეც სხედან, ხერხემლის პრობლემებს უქმნით. მათივე მტკიცებით, სამუშაო ადგილზე შეუძლოდ გახდომა ნიშნავს, რომ ბონუსს ვეღარ მიიღებ. ამიტომ ცდილობენ, ცუდად ყოფნა არ შეიმჩნიონ.
“მიუხედავად იმისა, რომ კომპანიას აქვს ძალიან, ძალიან დიდი რესურსი, ხელფასის მომატება არ უნდათ. გვითხრეს, ადამიანს ხელფასს თუ მოუმატებ, ეს კმაყოფილება 6 თვეს გასტანს, მერე თავიდან მოგინდებათო. თანამშრომლების უმეტესობა არიან მარტოხელა დედები; ადამიანები, რომლებსაც აქვთ დიდი სესხები; ბევრია სტუდენტი, რომელიც ცხოვრობს ქირით. ამ ხელფასით არსებობაც გვიჭირს”, — ამბობს ეკა კაბოსნიძე.
კიდევ ერთი თანამშრომელი, მახარე პატაშური ამბობს, რომ კომპანიაში დაახლოებით ორი წელია მუშაობს. მისი თქმით, ონლაინ კაზინოს სხვა ფილიალებში ანაზღაურება ბევრად მაღალია მაშინ, როცა თანამშრომლები ყველა ქვეყანაში მსგავსი დატვირთვით მუშაობენ.
“კანადაში 18 დოლარია საათში იმ პოზიციაზე, რაზეც მე ვმუშაობ. 800 დოლარი- კიდევ ბონუსად. მე მაქვს 4.5 ლარი საათში. ამბობენ, რომ ის კანადაა, იქ ცხოვრება ძვირიაო. თუმცა ჩვენ ხომ ქვეყნებს არ ვადარებთ?! ჩვენ ვადარებთ შრომას. იმას, რასაც ვაკეთებ და რის შესაბამისადაც მეკუთვნის ანაზღაურება. 10-ჯერ უფრო მეტი რომ აქვთ იმავე პოზიციაზე სხვა ქვეყნებში ხელფასი და მე ვითხოვ, რომ 2-ჯერ მეტი მქონეს, ალბათ, ეს არ უნდა იყოს პრობლემა.” – ამბობს პატაშური “ნეტგაზეთთან”.
მახარე პატაშური ასევე ამტკიცებს, რომ კომპანიას არ უნდა, მუშაობა გააჩეროს იმისთვის, რომ სათანადოდ დაასუფთაოს გარემო, რაც იწევს ანტისანიტარიას.
რას ამბობენ “ევოლუშენ ჯორჯიაში”
კომპანია განმარტავს, რომ ქცევისა და თამაშის წესები საერთაშორისოდ დამტკიცებული სტანდარტია, რასაც მხოლოდ საქართველოში ვერ გადახედავენ, სამედიცინო საჭიროებებს კი მათ მიერ შეთავაზებული “ძალიან კარგი პირობით“ დაზღვევა უზრუნველყოფს.
„ევოლუშენი’ იმყოფებოდა სამედიაციო პროცესში. ჩვენ სრულად მივყევით კანონის მიერ დადგენილ პროცესს, რომლის განმავლობაშიც, სამწუხაროდ, ვერ შევთანხმდით. თითოეული დაფიქსირებული მოთხოვნის შესახებ კომპანიის პოზიცია ეცნობა სამედიაციო პროცესის მხარეებს, მათ შორის ევროკავშირის წევრებს. ამ ეტაპზე დეტალების განხილვისგან თავს შევიკავებთ.” – აცხადებენ კომპანიაში.
სახალხო დამცველის რეაქცია
გაფიცვამდე ორი დღით ადრე, მიმდინარე მოვლენებს სახალხო დამცველი გამოეხმაურა. ომბუდსმენის აპარატმა მოუწოდა “ევოლუშენ ჯორჯიას”, გამოიყენოს ყველა შესაძლებლობა შეთანხმების მისაღწევად და თავი შეიკავოს დასაქმებულთა ღირსების შემლახავი ქმედებებისგან.
“ჯანსაღი და უსაფრთხო სამუშაო გარემო და შრომის ღირსეული ანაზღაურება შრომითი უფლების განუყოფელი ნაწილია და მასზე მნიშვნელოვნად არის დამოკიდებული ადამიანის ღირსეული ცხოვრება. გასათვალისწინებელია, რომ ევროპის სოციალური ქარტია, რომლის ხელშემკვრელ მხარეს საქართველოც წარმოადგენს, აღიარებს ყველა მუშაკის უფლებას, ჰქონდეს უსაფრთხო, სამართლიანი შრომის პირობები და შრომის სათანადო სამართლიანი ანაზღაურება, რაც უზრუნველყოფს მათი და მათი ოჯახების ცხოვრების ღირსეულ დონეს.
როგორც სახალხო დამცველის პრაქტიკა მოწმობს, სამწუხაროდ, დასაქმებულების მიერ შრომითი პირობების გაუმჯობესების მოთხოვნა ან სამუშაოსთან დაკავშირებული კრიტიკის გამოთქმა ზოგადად დამსაქმებლების მხრიდან მიუღებელ პოზიციად ფასდება და ხშირად საფუძვლად ედება დამსაქმებლის მიერ განსხვავებული მოსაზრების გამო მშრომელების შევიწროებას, სამსახურიდან გათავისუფლებას ან შრომითი უფლებების სხვაგვარ დარღვევას.” — ვკითხულობთ სახალხო დამცველის აპარატის მიერ გავრცელებულ განცხადებაში.
მათივე ცნობით, საქმის მოკვლევა უკვე დაწყებული აქვს შრომის ინსპექციას.
nproject
