მაისში საქართველოში რუსეთიდან 303 მილიონი დოლარის ფულადი გზავნილი შემოვიდა
ფულადი გზავნილი საქართველოში
საქართველოს ეროვნული ბანკის ინფორმაციით, მაისში საქართველოში მხოლოდ რუსეთიდან 303 მილიონი დოლარის ფულადი გზავნილი შემოვიდა, რაც წინა წლის ანალოგიურ მაჩვენებელთან შედარებით 889%-ით მეტია.
სულ მაისის თვეში საქართველოში რეკორდული მოცულობის – 505.7 მილიონი დოლარის ფულადი გზავნილები შემოვიდა, რაც წინა წელთან შედარებით 169%-ით მეტია. ამ მასშტაბის ფულადი გზავნილები საქართველოს არცერთი წლის არცერთ თვეში არ მიუღია.
აღსანიშნავია, რომ რუსეთიდან შემოსული გზავნილები, ძირითადად, არა რუსეთში დასაქმებული ქართველების გზავნილებს, არამედ საქართველოში ემიგრირებული რუსების გზავნილებს წარმოადგენს.
მაისის მსგავსად, რეკორდული იყო გზავნილები აპრილშიც, როდესაც შემოსულმა თანხამ 308 მილიონი დოლარი შეადგინა. აპრილში რუსეთიდან გზავნილები 133 მილიონი იყო, ანუ მაისში ის გაორმაგდა და 313.9 მილიონს მიაღწია.
მეორე ადგილზეა იტალია 36.8 მილიონი დოლარით, მესამეზე კი აშშ – 27.8 მილიონით.
20 ქვეყანა, საიდანაც ყველაზე მეტი გზავნილი შემოვიდა:
1. რუსეთის ფედერაცია – 313.9 მილიონი, მატება წინა წელთან 889%
2. იტალია – 36.82 მილიონი, მატება წინა წელთან 15%
3. აშშ – 27.78 მილიონი, მატება წინა წელთან 15%
4. ყაზახეთი – 20.81 მილიონი, მატება წინა წელთან 587%
5. საბერძნეთი – 20.33 მილიონი, მატება წინა წელთან -1%
6. ისრაელი – 16.07 მილიონი, მატება წინა წელთან 9%
7. გერმანია – 13.31 მილიონი, მატება წინა წელთან 46%
8. თურქეთი – 8.13 მილიონი, მატება წინა წელთან 11%
9. ყირგიზეთი – 5.68 მილიონი, მატება წინა წელთან 372%
10. ესპანეთი – 4.96 მილიონი, მატება წინა წელთან 8%
11. აზერბაიჯანი – 4.63 მილიონი, მატება წინა წელთან -40%
12. საფრანგეთი – 3.72 მილიონი, მატება წინა წელთან 21%
13. პოლონეთი – 3.33 მილიონი, მატება წინა წელთან 31%
14. გაერთიანებული სამეფო – 2.85 მილიონი, მატება წინა წელთან 49%
15. კანადა – 1.92 მილიონი, მატება წინა წელთან -5%
16. ირლანდია – 1.91 მილიონი, მატება წინა წელთან 4%
17. ტაჯიკეთი – 1.86 მილიონი, მატება წინა წელთან 203%
18. სომხეთი – 1.53 მილიონი, მატება წინა წელთან 41%
19. კვიპროსი – 1.51 მილიონი, მატება წინა წელთან 13%
20. უზბეკეთი – 1.33 მილიონი, მატება წინა წელთან 192%
2022 წლის მაისში საქართველოდან საზღვარგარეთ 28.7 მლნ აშშ დოლარი გადაიგზავნა, რაც 2021 წლის მაისის (22.9 მლნ აშშ დოლარი) ანალოგიურ მაჩვენებელთან შედარებით 25.4%-ით მეტია.
მსოფლიო ბანკის ინფორმაციით, საქართველო ფულად გზავნილებზე დამოკიდებული ქვეყნების რეიტინგში 21-ე ადგილზეა.
ამავე რეიტინგში პირველ ადგილს ტონგა იკავებს, რომლის მთლიანი შიდა პროდუქტის (მშპ) 37.2 პროცენტი ფულად გზავნილებზე მოდის; 35.3 პროცენტით მეორე ადგილზე სომალია; მესამე ადგილს კი ყირგიზეთი იკავებს, მისი ეკონომიკის 31.3% ფულად გზავნილებზეა დამოკიდებული.
