საქართველო ევროპის პოლიტიკური გაერთიანების დეკლარაციას შეუერთდა. რა წერია დოკუმენტში და რა თქვა პრემიერმა
ევროპის პოლიტიკური გაერთიანების დეკლარაცია
საქართველოს მთავრობის ადმინისტრაციის ინფორმაციით, საქართველო შეუერთდა ევროპის პოლიტიკური გაერთიანების სამიტის დეკლარაციას, რომელიც გაერთიანებულ სამეფოში, ბლენჰაიმის სასახლეში შეკრებილმა ლიდერებმა მიიღეს.
მათივე ცნობით, დოკუმენტი მოიცავს რამდენიმე ძირითად მიმართულებას, რომლებსაც განსაკუთრებული მნიშვნელობა ენიჭება ევროპის უსაფრთხოებისთვის, ასევე – ენერგეტიკული უსაფრთხოებისა და დაკავშირებადობის თვალსაზრისით.
მსოფლიოს 50-მდე ქვეყნის ლიდერმა ასევე მხარი დაუჭირა დოკუმენტს, რომელიც მიმართულია რუსეთის “ჩრდილოვანი ფლოტისა” და მისგან მომდინარე საფრთხეების წინააღმდეგ.
პრემიერმინისტრი ირაკლი კობახიძე, რომელიც სამიტს ესწრებოდა, ამბობს, რომ ევროკავშირის სტრუქტურების ლიდერებს საქართველო-ევროკავშირის ურთიერთობებზე გზავნილები გაუზიარეს. მისივე თქმით, უკრაინაში ომის დასრულება და რეგიონში მშვიდობის დამყარება საქართველოს მიმართ დამოკიდებულებაზე დადებითად აისახება.
რა წერია დოკუმენტში
მთავრობის ადმინისტრაციის ცნობით:
● საბოლოო დოკუმენტში ასევე აისახა საფრანგეთისა და მოლდოვის წინადადება უცხოური ჩარევისა და დეზინფორმაციით მანიპულაციის წინააღმდეგ ევროპული პოლიტიკური გაერთიანების ქსელის შექმნის შესახებ.
● დოკუმენტში ნათქვამია, რომ საგარეო ჩარევა და ინფორმაციით მანიპულირება სტრატეგიულ გამოწვევას უქმნის ევროპული პოლიტიკური გაერთიანების (EPC) წევრ ქვეყნებს, შესაბამისად, დემოკრატიული პროცესების მიმართ პირდაპირი საფრთხეების ფონზე და საზოგადოებების გამძლეობის გასაძლიერებლად საჭიროა უფრო ღრმა და სწრაფი, ოპერატიული კოორდინაცია ევროპულ სახელმწიფოებს შორის.
სამიტის დეკლარაციაში აისახა ქართული მხარის წინადადება შავი და კასპიის ზღვების რეგიონული კავშირების გაძლიერების შესახებ, რომლის ფარგლებში ევროპული პოლიტიკური გაერთიანების ჩრდილოეთ და ბალტიის ზღვების რეგიონებში მდებარე ქვეყნები უკრაინასთან, აზერბაიჯანთან, საქართველოსთან, რუმინეთთან, ბულგარეთსა და თურქეთთან ერთად ჩაატარებენ ტექნიკური დიალოგების სერიას შავი და კასპიის ზღვების რეგიონული ენერგეტიკული კავშირების მხარდასაჭერად.
● დიალოგების ძირითადი მიზანი იქნება ქვეყნების გამოცდილების, რესურსების, ცოდნისა და ექსპერტიზის პრაქტიკული გზით გაზიარება, რათა შავი და კასპიის ზღვების EPC-ს წევრებმა გადაჭრან რეგიონულ ენერგეტიკულ კავშირებთან დაკავშირებული გამოწვევები და გამოიყენონ თავიანთი ენერგეტიკული პოტენციალი სუფთა ენერგიის წარმოების კუთხით”
ირაკლი კობახიძე: “უკრაინაში ომის დამთავრება მყისიერად შეცვლის საქართველოს მიმართ დამოკიდებულებას”
ირაკლი კობახიძის თქმით, უკრაინაში ომის დასრულება და რეგიონში მშვიდობის დამყარება საქართველოს მიმართ დამოკიდებულებაზე დადებითად აისახება. იგი გამოთქვამს იმედს, რომ ომი უკრაინაში 1 წელში დასრულდება, რაც მისი თქმით, ევროპის პოლიტიკური გაერთიანების სამიტის მთავარი განხილვის საკითხი უნდა იყოს.
“პირველ რიგში, მნიშვნელოვანია, რომ უკრაინაში დასრულდეს ომი, ეს იყო ერთ-ერთი განსახილველი საკითხი. რა თქმა უნდა, რეგიონში მშვიდობის დამყარების საკითხი იყო განხილული ამ სამიტზე. ჩვენ დიდი იმედი გვაქვს, რომ მაქსიმუმ ერთ წელიწადში უკრაინაში ომი დასრულდება, შესაბამისად, დამშვიდდება რეგიონში ვითარება და ეს ყველაფერი დადებითად აისახება ზოგადად, პოლიტიკურ ვითარებაზე ჩვენს რეგიონში და ასევე საქართველოს მიმართ დამოკიდებულებაზე”, – განაცხადა კობახიძემ.
კობახიძე ასევე აღნიშნავს, რომ რეგიონში ვითარების დამშვიდებასთან ერთად, “მყისიერად” შეიცვლება დამოკიდებულება საქართველოს მიმართ:
“გვქონდა საუბარი საქართველო-ევროკავშირის ურთიერთობებზე, გაფართოების საკითხებზე, მიმდინარე დღის წესრიგზე. ჩვენ ვუზიარებდით ჩვენს გზავნილებს ყველა ლიდერს, იყვნენ მათ შორის უშუალოდ ევროკავშირის სტრუქტურების ლიდერები, ბატონი ბორელი იყო, ბატონი მიშელი და სხვები და მათთან გვქონდა საუბარი ამ თემებთან დაკავშირებით.
საერთო შთაბეჭდილება რაც მაქვს, არის ის, რომ როგორც კი ზოგადად, რეგიონში გლობალურად შეიცვლება, დამშვიდდება ვითარება, მყისიერად შეიცვლება დამოკიდებულება საქართველოს მიმართ. მანამდეც დაიწყება ეს პროცესი, თუმცა საბოლოო ჯამში, ბევრი რამ იქნება დამოკიდებული რეგიონში პოლიტიკური ვითარების დამშვიდებაზე.
