ევროპელი დეპუტატი: ოპოზიციონერის დაკავებას, შესაძლოა, საქართველოს წინააღმდეგ სანქციები მოჰყვეს
თუკი საქართველოს ხელისუფლება დააკავებს ოპოზიციის ლიდერს, ამას საერთაშორისო რეაგირება და შესაძლოა სანქციებიც მოჰყვეს, – აცხადებს ლიეტუვის პარლამენტის საგარეო ურთიერთობათა კომიტეტის თავმჯდომარე ჟიგიმანტას პავილიონისი.
“შეუძლებელია წარმართო მოლაპარაკებები, როდესაც ოპოზიციის ლიდერი გყავს დაპატიმრებული… დემოკრატიულ სამყაროში ვინც არ ითვალისწინებს პრინციპებს და აპატიმრებს ლიდერებს, მოგვიწევს სანქციების დაწესება. ვიმედოვნებ, მთავრობა პასუხისმგებლობით მოიქცევა. ახლა გაქვთ შანსი, ევროკავშირის წევრი გახდეთ”, – განაცხადა დეპუტატმა.
ლიეტუველი კანონმდებელი საქართველოში 18 თებერვალს ჩამოვიდა, მას შემდეგ, რაც ქვეყანაში არსებული პოლიტიკური კრიზისი უკიდურესად გამძაფრდა ოპოზიციის ლიდერის, ნიკა მელიას შესაძლო დაკავების გამო.
პოლიტიკური კრიზისი საქართველოში დაიწყო 31 ოქტომბრის საპარლამენტო არჩევნების შემდეგ. ოპოზიცია არ აღიარებს ამ არჩევნების შედეგებს და მათ გაყალბებულად მიიჩნევს. პარლამენტში გასულმა ოპოზიციამ უარი თქვა საპარლამენტო მანდატებზე. ოპოზიცია რიგგარეშე არჩევნებს ითხოვს, რაზეც ხელისუფლება არ თანხმდება.
ვითარება განსაკუთრებით გამწვავდა 17 თებერვალს, მას შემდეგ, რაც სასამართლომ მთავარი ოპოზიციური პარტიის “ნაციონალური მოძრაობის” თავმჯდომარის, ნიკა მელიას წინასწარი პატიმრობის გადაწყვეტილება მიიღო. მელიას ე.წ. გავრილოვის ღამის დროს დესტაბილიზაციის მოწყობაში ადანაშაულებენ.
სასამართლოს გადაწყვეტილებიდან მეორე დილით, 18 თებერვალს, როდესაც მელია სამართალდამცავებს უნდა დაეკავებინათ, თანამდებობიდან გადადგა ქვეყნის პრემიერი გიორგი გახარია. გადადგომის მიზეზად გახარიამ მმართველ გუნდთან “ქართულ ოცნებასთან” უთანხმოება დაასახელა – გუნდი ოპოზიციის ლიდერის დაკავებას ითხოვდა, გახარიას კი მიაჩნდა, რომ მელიას დაკავება ქვეყანაში პოლიტიკურ კრიზისს კიდევ უფრო მეტად გაამწვავებდა.
ამ ეტაპზე მელია ჯერჯერობით დაკავებული არ არის. გახარიას გადადგომის შემდეგ შს სამინისტრომ გაავრცელა განცხადება, რომ ოპოზიციონერის დაკავება გადავადდა ახალი პრემიერის და მთავრობის არჩევამდე.
პავილიონისმა ტვიტერზე დაწერა, რომ 18 თებერვალს საქართველოში მისი ჩამოსვლის მიზანი სწორედ დაპირისპირებული პოლიტიკური მხარეების პოზიციების დაახლოება იყო:
„თუ საქართველოს მართლაც სურს ევროკავშირსა და ნატოში გაწევრიანება, ერთმანეთის ციხეში გაშვებით იქ ნამდვილად ვერ მოხვდებიან. მათ ლიეტუვის მაგალითი უნდა გადაიღონ, როცა სტრატეგიულ ამოცანებში პოზიცია და ოპოზიცია ერთად მოქმედებენ“, – აღნიშმა მან.
Flying out 2my beloved Georgia🇬🇪🇬🇪🇬🇪 2meet w/friends from all political spectrum on the mission of unity on key strategic goals – Georgian membership in EU & NATO fully supported by all Lithuanian political parties 🇱🇹🇱🇹🇱🇹 https://t.co/BPuYpSzH9b pic.twitter.com/lIZUlJl5Yd
— ŽygimantasPavilionis (@ZygisPavilionis) February 19, 2021
თუმცა, სამდღიანი ვიზიტის შემდეგ ევროპელმა დეპუტატმა, არათუ საქართველოს ხელისუფლების და ოპოზიციის პოზიციების დაახლოება შეძლო, არამედ აღნიშნა, რომ საქართველო კიდევ უფრო მძიმე პოლიტიკურ კრიზისში შეიძლება აღმოჩნდეს, რადგან ხელისუფლება არ არის მზად დიალოგისთვის.
პავილიონისის თქმით, თუ ხელისუფლება უარს არ იტყვის ოპოზიციის ლიდერის დაკავებაზე, „ისინი ამის საფასურს გადაიხდიან“.
„თქვენ ვერასდროს შეხვალთ ევროკავშირსა და ნატოში, თუ გექნებათ ერთპარტიული დემოკრატია. ეს საერთოდ არც არის დემოკრატია“, – ასე მიმართა საქართველოს ხელისუფლებას.
წასვლის წინ პავილიონისმა აშშ-ის სახელმწიფო მდივანს, ენტონი ბლინკენს მიმართა და მოუწოდა, ყურადღება გაამახვილოს საქართველოს ხელისუფლების აგრესიულ, ავტოკრატიულ ტონსა და შესაძლო ქმედებებზე ნიკა მელიას მიმართ.
მან მიმართვა ტვიტერის საკუთარ გვერდზე გამოაქვეყნა:
“ქართული ოცნების გარდა, ყველა პოლიტიკურმა პარტიამ საჯაროდ გამოხატა დიალოგის მზაობა. ბატონო ბლინკენ, დემოკრატიული ქვეყნების ტრანსატლანტიკური ოჯახი უნდა კონცენტრირდეს ოპოზიციის ლიდერის, ნიკა მელიას მიმართ აგრესიულ, ავტოკრატიულ ტონსა და შესაძლო ქმედებებზე“.
პავილიონისთან შეხვედრის შემდეგ კომპრომისზე წავიდა ოპოზიცია, რომელმაც 25 თებერვალს დაგეგმილი აქცია გადადო. ოპოზიციის ლიდერთა თქმით, ამ გადაწყვეტილებით ისინი მმართველ გუნდს აძლევენ შანსს, რომ დაუბრუნდნენ ოპოზიციასთან მოლაპარაკებების რეჟიმს.
_____________________________________________
● რას ნიშნავს გახარიას გადადგომა და ღარიბაშვილის დაბრუნება? გია ნოდიას თვალსაზრისი
● ღარიბაშვილის მეორედ მოსვლა. რას ფიქრობენ ექსპერტები და ანალიტიკოსები მის გაპრემიერებაზე?
● ოპოზიცია ახალ არჩევნების ითხოვს. ხელისუფლება მელიას მოუწოდებს, დაემორჩილოს კანონს
_____________________________________________
მანამდე ნიკა მელიას საქმეზე განცხადება გააკეთა ამერიკის სახელმწიფო დეპარტამენტმა. მათ საქართველოს ხელისუფლებას მოუწოდეს, უზრუნველყოს პოლიტიკური მიკერძოებისგან თავისუფალი საპროკურორო და მართლმსაჯულების სისტემები.
