ევროპარლამენტარი გლუკსმანი: ვაპირებთ მობილიზებას ევროპარლამენტში, რათა სააკაშვილი ევროპაში გადაიყვანონ

ევროპარლამენტარი რაფაელ გლუკსმანი

ფრანგი ევროპარლამენტარი რაფაელ გლუკსმანი ამბობს, რომ ევროპარლამენტი მომავალ კვირაში აპირებს მობილიზდეს იმისთვის, რომ საქართველოს ყოფილი პრეზიდენტი მიხეილ სააკაშვილი ევროპულ საავადმყოფოში გადაიყვანონ.

ამის შესახებ ევროპარლამენტარმა ფეისბუქ გვერდზე დაწერა. 

“ვაპირებთ მობილიზებას სტრასბურგის პარლამენტში მთელი მომავალი კვირის განმავლობაში, რათა მიშა ევროპულ საავადმყოფოში გადაიყვანონ. რათა ჩვენმა ქვეყნებმა არ დაუშვან ხვალ პრეზიდენტის სიჩუმეში სიკვდილი, ვის მოსმენაზეც გუშინ უარი ჯიუტად თქვეს”. – წერს გლუკსმანი

მისივე თქმით, სააკაშვილის სიცოცხლე ძაფზე კიდია და “ეს ძაფი ევროპაზე გადის”. რაფაელ გლუკსმანის აზრით, ევროპელ ლიდერებს შეუძლიათ გადაარჩინონ საქართველოს ყოფილი პრეზიდენტის სიცოცხლე და “ქართული ოცნება” ვერ გაუძლებს ევროპიდან ძლიერ, კოორდინირებულ წნეხს.

„დღეს ამერიკელი მეცნიერების ცნობით, ვინც მისი თმა და ფრჩხილები შეამოწმეს, მიშა მოწამლულია დარიშხანითა და ვერცხლისწყლით. დღეს მისი სიცოცხლე ძაფზე კიდია და ეს ძაფი ევროპაზე გადის. ჩვენს ლიდერებს აქვთ მისი გადარჩენის შესაძლებლობები. საქართველოს მთავრობა, რომელიც თუნდაც გარეგნულად ჩანს რომ ინარჩუნებს გაწონასწორებულ პოზიციას (პათეტიკურია) ბრიუსელსა და მოსკოვს შორის, ვერ გაუძლებს ძლიერ და კოორდინირებულ ევროპულ წნეხს.“ – აცხადებს გლუკსმანი.

მისი თქმით, ვინაიდან საქართველოს ამჟამინდელი პრეზიდენტი ქართველია და ოლიგარქს, რომელიც აკონტროლებს ქვეყანას ასევე ფრანგული პასპორტი აქვს, პარიზს შეუძლია ამ პროცესებზე გავლენა მოახდინოს:

„თუმცა არაფერი ან ძალიან ცოტა ხდება. ჩვენს ლიდერებს, რომლებმაც ყველაფერი გაიგეს, შეიტყვეს და შეიცვალნენ, რჩებიან ჩუმად და პასიურად. როგორც ადრე, როგორც ყოველთვის“ 

გლუკსმანი წერს, რომ დღეს სააკაშვილი ოლიგარქი ივანიშვილის პირადი მძევალია.

„გულს მირევს იმის ნახვა, რომ კაცი, რომელიც ერთ-ერთი პირველი იყო, ვისაც ჰქონდა გამბედაობა რომ კრემლის ოფისის წინააღმდეგ წასულიყო როცა დასავლელი კანცლერები ერთმანეთს თავის დაკვრასა და კომპრომისებში ეჯიბრებოდნენ, ციხეში სუსტდება“ – ამბობს გლუკსმანი.

● “ქართულად საუბრობენ, თორემ სულისკვეთებით არის ФСБ-ს ტექსტები” – რა გამოხმაურება მოჰყვა ღარიბაშვილის განცხადებებს
●”ხილული კავშირები რუსეთთან” – ანა ფოტიგამ ბრიუსელში კონფერენცია გამართა
● Le Figaro: მიხეილ სააკაშვილი დაპატიმრების შემდეგ მოწამლეს

დღეს ექსპრეზიდენტ მიხეილ სააკაშვილის პროცესი უნდა გამართულიყო, თუმცა მოსამართლემ სხდომა 14 დეკემბრამდე გადადო.

28 ნოემბერს თბილისის საქალაქო სასამართლოში სააკაშვილის წინააღმდეგ ახალი პროცესი დაიწყო (ე.წ. საზღვრის კვეთის საქმე – სააკაშვილის საქართველოში გასულ ოქტომბერს სახელმწიფო საზღვრის უკანონოდ გადაკვეთის შედეგად შემოვიდა). პროცესზე თავად სააკაშვილიც უნდა მიეყვანათ, თუმცა, ჯანმრთელობის გაუარესებული მდგომარეობის გამო, ექს-პრეზიდენტმა სხდომაზე დასწრება ვერ შეძლო. 

პრეზიდენტმა, სალომე ზურაბიშვილმა 24 ნოემბერს განაცხადა, რომ მიხეილ სააკაშვილის ჯანმრთელობის მდგომარეობა ქვეყნის რეპუტაციისთვის მნიშვნელოვანია და თუ ჯანმრთელობის მდგომარეობა “ამ დონეზეა დაზიანებული”, სასამართლომ უნდა მიიღოს ღირსეული გადაწყვეტილება.

ოჯახი მის საზღვარგარეთ სამკურნალოდ გადაყვანას უკვე დიდი ხანია ითხოვს.