ევროპარლამენტარი ანსის პუპოლსი ბორელს ქართველი ჩინოვნიკებისთვის სანქციების დაწესებისკენ მოუწოდებს
ევროპარლამენტარი ანსის პუპოლსი სანქციებზე
ევროპარლამენტარი ანსის პუპოლსი ევროკავშირის საგარეო საქმეთა და უსაფრთხოების პოლიტიკის საკითხებში უმაღლეს წარმომადგენელს, ჯოზეფ ბორელს მოუწოდებს სანქციები დაუწესოს იმ ქართველ ჩინოვნიკებს, რომლებიც არადემოკრატიულ ქმედებებსა და ადამიანის უფლებების დარღვევაზე არიან პასუხისმგებელნი.
მის მოწოდებას ასევე უერთდებიან ევროპარლამენტის ვიცე-პრეზიდენტი რობერტს ზილე და რუმინელი ევროპარლამენტარი ტრაიან ბასესკუ. პუპოლსმა საქართველოში ბოლო რამდენიმე თვის განმავლობაში არსებულ სიტუაციას კრიტიკული და დრამატული უწოდა, მისი თქმით, ქართული დემოკრატია საფრთხის ქვეშაა.
პუპოლსი ხაზს უსვამს, რომ ქართველმა ხალხმა დემოკრატიული ღირებულებებისა და ევროპული პრინციპების მიმართ მაღალი მისწრაფება გამოავლინა, ხოლო ევროკავშირმა არ უნდა დაუშვას, რომ “ქართველთა ძალისხმევა ავტორიტარიზმით განადგურდეს.”
ევროპარლამენტარის მოწოდებით სანქციები შემდეგ პირებს უნდა დაუწესდეთ:
- პოლიტიკოსსა და ოლიგარქს ბიძინა ივანიშვილს ქვეყნის ევროატლანტიკური ინტეგრაციის შელახვის, ქართველი ხალხის ნების საწინააღმდეგოდ მოქმედებისა და მისი კონსტიტუციის პრინციპების შელახვის გამო, სახელმწიფოს ხელში ჩაგდებაში მისი მთავარი აქტორის როლის გათვალისწინებით.
- პრემიერ-მინისტრს ირაკლი კობახიძეს პარტია “ქართული ოცნებიდან” პოლიტიკურ რეპრესიებში შეტანილი როლისთვის და “უცხოელი აგენტების” კანონის მიღების გამო.
- შინაგან საქმეთა მინისტრს ვახტანგ გომელაურს ოპოზიციის ლიდერებისა და მშვიდობიანი მომიტინგეების მიმართ მუქარისა და ძალადობის ორკესტრირებაში მონაწილეობისთვის.
- პარლამენტის თავმჯდომარე შალვა პაპუაშვილს, რომელმაც, თავის მხრივ, ხელი შეუწყო და ყურადღების მიღმა დატოვა დემოკრატიული უფლებების დამცველთა მიმართ სასტიკი მოპყრობა.
- თბილისის მერ კახა კალაძეს, რომელმაც თავის მხრივ, ხელი შეუწყო დემოკრატიული უფლებების დამცველთა მიმართ სისასტიკეს.
● პაველ ჰერჩინსკი: ქართველი ხალხი არ უნდა დაისაჯოს, უვიზო რეჟიმის გაუქმების ალბათობა დაბალია
● “საქართველოს ხელისუფლების რუსეთის ორბიტისაკენ სვლის შესაჩერებლად, გვჭირდება კონკრეტული ნაბიჯები” – კონგრესში MEGOBARI Act-ზე იმსჯელეს
დეპუტატები, ძალოვნები, ოცნების ჩინოვნიკები და მათი ოჯახის წევრები – სახელმწიფო დეპარტამენტმა სანქციების პაკეტი გამოაცხადა. სანქცია გულისხმობს სავიზო შეზღუდვებს და პირველ ეტაპზე მოიცავს დაახლოებით 30 ადამიანს.
სახელები და გვარები ამ დროისთვის ცნობილი არ არის. თეთრი სახლის პრესსპიკერის, მეთიუ მილერის თქმით, სანქციების შესახებ ამ პირებმა ჯერჯერობით არ იციან, მაგრამ ვისაც მოქმედი ვიზა აქვთ, შესაბამისი შეტყობინებები ამის შემდგომ მიუვათ.
აშშ-ის სახელმწიფო მდივანმა ენტონი ბლინკენი რუსულ კანონზე პასუხისმგებელი პირებისთვის ვიზების შეზღუდვის ახალი პოლიტიკა 24 მაისს დააანონსა. ასევე, ბლინკენი წერს, რომ აშშ ძირეულად გადახედავს საქართველოსთან ურთიერთობას.
“ქართული ოცნების” პოლიტიკური საბჭო აშშ-სგან რეჟიმისა და მათი ოჯახების წევრების მიმართ სანქციების პოლიტიკის გამოცხადებას ეხმაურება და აცხადებს, რომ ეს მოვლენა ნაცრისფერი ასოებით ჩაიწერება მსოფლიო პოლიტიკის ისტორიაში.
“ქართული ოცნების” განცხადების მიხედვით, ენტონი ბლინკენის განცხადება სხვა არაფერია, თუ არა საქართველოს დამოუკიდებლობისა და სუვერენიტეტის შეზღუდვის უხეში მცდელობა, რაც “ცინიკურია” საქართველოს დამოუკიდებლობის დღემდე ორი დღით ადრე.
