ევროკავშირმა შეაჩერა 30 მლნ ევროს დახმარება საქართველოსთვის. ჰერჩინსკის თქმით, იქნება სხვა ზომებიც

ევროკავშირმა გაყინა დახმარება

საქართველოში ევროკავშირის ელჩის პაველ ჰერჩინსკის განცხადებით, ევროკავშირმა გაყინა 30 მილიონი ევროს დახმარება, რომლის გადმორიცხვა ევროპული სამშვიდობო ფონდიდან (EPF) იგეგმებოდა საქართველოს თავდაცვის ძალებისთვის.

პაველ ჰერჩინსკი ამბობს, რომ სიტუაციის შემდგომი გაუარესების შემთხვევაში განიხილება სხვა ზომების მიღებაც:

“ამ დროისთვის ფული, რომლის გადარიცხვასაც ვგეგმავდით საქართველოს თავდაცვის სამინისტროსთვის და რომელიც 30 მილიონ ევროს შეადგენს, გაყინულია. ეს არის მხოლოდ პირველი ნაბიჯი, იქნება სხვა ნაბიჯებიც”.

ელჩის განცხადებით, ევროკავშირის პირდაპირი მხარდაჭერა საქართველოს მთავრობის მიმართ, შემცირდება და ფოკუსირებული იქნება სამოქალაქო საზოგადოებასა და მედიაზე.

“როგორც იცით, საქართველოს მთავრობის მიმართ ჩვენი მხარდაჭერა 10-ჯერ მეტია სამოქალაქო საზოგადოების მხარდაჭერასთან შედარებით, ჩვენ მრავალი წლის განმავლობაში ვაფინანსებთ საქართველოს მთავრობას. ჩვენი, ევროკავშირის მხარდაჭერის თითქმის ნახევარი არის საქართველოს მთავრობისთვის პირდაპირი საბიუჯეტო მხარდაჭერა. მიღებულია გადაწყვეტილება ამ პირდაპირი მხარდაჭერის თანდათან შემცირების შესახებ, მისი მიმართულების შეცვლის და სამოქალაქო და მედია ორგანიზაციებისთვის მხარდაჭერის გაზრდა, რომლებიც, როგორც ვიცით, დიდი ზეწოლის ქვეშ არიან საქართველოში ამ დროისთვის „გამჭვირვალობის“ შესახებ კანონის გამო“, – აღნიშნა ელჩმა.

• რა შემთხვევაში დამარცხდება “ქართული ოცნება” არჩევნებში? ვახუშტი მენაბდის მოსაზრება
• 36 სახელმწიფო მოუწოდებს მთავრობას, გააუქმოს ე.წ. რუსული კანონი
• როგორ აპირებს საქართველოს მთავრობა ევროკომისიის რეკომენდაციების შესრულებას. კონკრეტული გეგმა

პაველ ჰერჩინსკის თქმით, საქართველოს ევროკავშირში გაწევრიანების პროცესი ამჟამად გაჩერებულია. ეს ევროკავშირის ლიდერებმა ევროპული საბჭოს ბოლო სხდომაზე, 27 ივნისს, გადაწყვიტეს:

“ევროკავშირის ლიდერებისთვის გაურკვეველია საქართველოს ამჟამინდელი ხელისუფლების განზრახვა. „უცხოური გავლენის გამჭვირვალობის შესახებ“ კანონი აშკარად უკუსვლაა 9 ნაბიჯისგან. ასევე, ანტიდასავლური, ანტიევროპული რიტორიკა სრულად შეუთავსებელია ევროკავშირში გაწევრიანების გაცხადებულ მიზანთან. სამწუხაროდ, ამ დროისთვის, საქართველოს ევროკავშირში გაწევრიანება შეჩერებულია. ეს ნამდვილად სამწუხარო და გულსატკენია“, –  უთხრა პაველ ჰერჩინსკიმ ჟურნალისტებს თბილისში, სადაც მიმდინარეობს ორდღიანი საერთაშორისო კონფერენცია სახელწოდებით „ევროკავშირის გაფართოება – გეოპოლიტიკური საჭიროება და შემდგომი ნაბიჯები ევროკავშირის კანდიდატი ქვეყნებისთვის“.

პაველ ჰერჩინსკიმ წუხილი გამოთქვა იმის გამო, რომ ევროკავშირში გაწევრების გზაზე საქართველო მნიშვნელოვნად ჩამორჩა სხვა კანდიდატ ქვეყნებს.

„გულწრფელად ვიმედოვნებ, რომ არჩევნების შემდეგ, ოქტომბრის შემდეგ, ახალჩამოყალიბებული მთავრობა, ვინც არ უნდა მოახდინოს ამ მთავრობის ფორმირება, დაიწყებს ხელახალ სერიოზულ მუშაობას ევროკავშირში გაწევრიანებისკენ“, – აღნიშნა ელჩმა.

• საქართველოს ორმაგი თამაში – ევროინტეგრაცია და ჩინური ინვესტიციები

მან ასევე თქვა, რომ ევროკავშირი თვეების განმავლობაში ძალიან მკაფიო სიგნალებს უგზავნიდა საქართველოს ხელისუფლებას, რომ „უცხოური გავლენის გამჭვირვალობის შესახებ“ კანონის მიღება მოხდებოდა, ამას შედეგები მოჰყვებოდა:

“კანონი მიღებულია, ახლა, სამწუხაროდ, შედეგების დრო დადგა“, – აღნიშნა პაველ ჰერჩინსკიმ.

შეგახსენებთ, რუსული კანონის და საქართველოს ხელისუფლების კურსის გამო, საქართველოსთან პარტნიორობის გადახედვას აპირებს ამერიკის შეერთებული შტატებიც. უკვე ცნობილია, რომ ამერიკის შეერთებულმა შტატებმა განისაზღვრელი ვადით გადადო ამერიკა-საქართველოს ერთობლივი სამხედრო სწავლება “ღირსეული პარტნიორი”, რომელიც საქართველოში 2016 წლიდან ტარდებოდა. წელს სამხედრო წვრთნა 25 ივლისი-6 აგვისტოს პერიოდში იყო დაგეგმილი.

აშშ-ის ეროვნული უშიშროების საბჭოს ევროპის მიმართულების უფროსი დირექტორის, მაიკლ კარპენტერის თქმით, აშშ-ში საქართველოსთან არსებული ყველა პროგრამა გადახედვის პროცესშია.

ევროკავშირმა გაყინა დახმარება