ევროდეპუტატი ანა ფოტიგა სააკაშვილთან ციხეში არ შეუშვეს

საქართველოში ჩამოსული პოლონელი ევროდეპუტატი ანა ფოტიგა და ლიეტუვის პარლამენტის ორი წევრი მიხეილ სააკაშვილის მოსანახულებლად გლდანის მე-18 ციხეში არ შეუშვეს. დეპუტატების გზავნილს, წერილის სახით, მიხეილ სააკაშვილს საქართველოს პარლამენტის დეპუტატი, სალომე სამადაშვილი გადასცემს.

ევროპარლამენტარებმა სააკაშვილის მონახულებაზე იუსტიციის სამინისტროსგან არც თანხმობა მიიღეს და არც უარი, 18:00 საათზე კი ციხეში შესვლის დრო ამოიწურა.

სალომე სამადაშვილი ამბობს, რომ წერილს, რომელსაც ის მიხეილ სააკაშვილს გადასცემს, ხელს გავლენიანი ევროპელი პოლიტიკოსები აწერენ. ასევე, წერილში არის მოწოდება საქართველოს მთავრობისთვისაც, რომ უზრუნველყოს მიხეილ სააკაშვილის ჯანმრთელობა. დეპუტატები მოუწოდებენ მიხეილ სააკაშვილისა და ელენე ხოშტარიას, განიხილონ შიმშილობის შეწყვეტის შესაძლებლობა.

“მე პირადად, მიმაჩნია, რომ ეს არის პირდაპირ ხელისუფლების მცდელობა, რომ ფაქტობრივად, ასე ვთქვათ, იზოლაციაში ამყოფოს საქართველოს მესამე პრეზიდენტი, რომლისთვისაც ცხადია ევროპელ პოლიტიკოსებთან პირადად შეხვედრა საპატიმროში იქნებოდა ძალიან მნიშვნელოვანი“, – ამბობს სალომე სამადაშვილი.

მისივე განმარტებით, ხელისუფლებას აქვს გამონაკლისის დაშვების შესაძლებლობა, რასაც საკუთარი საჭიროების შემთხვევაში გამოიყენებდა, თუმცა საქართველოს მთავრობას არაერთხელ უთქვამს უარი საქართველოში ჩამოსული გავლენიანი პოლიტიკოსებისთვის მოენახულებინათ პოლიტიკური პატიმრები.

სამადაშვილის თქმით, ეს იყო პირდაპირი ნათქვამი ხელისუფლების მხრიდან, რომ საქართველოს მესამე პრეზიდენტის საქმეს ევროპარლამენტარებს არავინ ეკითხება.

● სააკაშვილის საქმე: რა წერია სტრასბურგის სასამართლოს გადაწყვეტილებაში
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები
●  სააკაშვილი შიმშილობს. რა ელის და რა ვიცით მის ჯანმრთელობის მდგომარეობაზე

გავლენიანი ევროპარლამენტარი ანა ფოტიგა საქართველოში გუშინ ღამით ჩამოფრინდა. ფოტიგას თქმით, მისი ვიზიტის ერთ-ერთი მიზანი, საქართველოს მესამე პრეზიდენტის მიხეილ სააკაშვილის მონახულებაა.

ევროპარლამენტარი დღეს პარლამენტში მოშიმშილე “დროას” ლიდერს, ელენე ხოშტარიას შეხვდა. როგორც ხოშტარიამ შეხვედრის დასრულების შემდეგ ჟურნალისტებთან აღნიშნა, ძალიან მნიშვნელოვანია, რომ ევროპარლამენტარი საქართველოშია და თუ ფოტიგას სააკაშვილთან შესხვედრის შესაძლებლობას არ მისეცემენ, ეს მომრიგი დიდი სკანდალი იქნება.  

“მნიშვნლოვანია, რომ ფოტიგაც და ჩვენი პარტნიორებიც ხედავენ, რომ მოქალაქეები, აქტივისტები და პოლიტიკოსები ვიბრძვით და არ ვეგუებით. არ არსებობს ქვეყანა, რომელიც ჩვენს ნაცვლად ააშენებს დემოკრატიას საქართველოში…

ჩვენი პარტნიორები საუბრობენ, რომ სააკაშვილის სიცოცხლის და ჯანდაცვის უფლება უნდა იყოს დაცული. სააკაშვილმა გადმოდგა ნაბიჯი და ახლა ჯერი ქართულ ოცნებაზეა. მშვიდობიანი აქციები გაგრძელდება, ჩემი შიმშილობა გაგრძელდება, მანამ სანამ არ მივაღწევთ კონსტიტუციური სიცოცხლის უფლების დაკმაყოფილებას მესამე პრეზიდენტისა”, – განაცხადა ელენე ხოშტარიამ. 

● “პუტინის ჯალათები ხართ” – პენიტენციური სააკაშვილის მორიგ კადრებს ავრცელებს
● პენიტენციური ავრცელებს კადრებს, სადაც ჩანს, რომ სააკაშვილი გლდანში ძალის გამოყენებით გადაიყვანეს

10 ნოემბერს სტრასბურგის სასამართლომ გამოაქვეყნა გადაწყვეტილება იმ “დროებითი ზომების შესახებ”, რომელიც მიხეილ სააკაშვილის შიმშილობას, მის ჯანმრთელობასა და უსაფრთხოებას ეხება.

სტრასბურგში მოქმედმა სასამართლომ საქმეს პრიორიტეტი მიანიჭა და “დროებითი ზომები” მიიღო. “დროებითი ზომების” შინაარსიდან გამომდინარე, სტრასბურგის სასამართლოს ეს გადაწყვეტილება ნიშნავს იმას, ევროპის ადამიანის უფლებათა სასამართლომ სააკაშვილის სიცოცხლის და ჯანმრთელობის მიმართ გამოუსწორებელი ზიანის დადგომის საფრთხე დაინახა.

მიხეილ სააკაშვილი უკვე 40 დღეზე მეტია შიმშილობს, მას შემდეგ, რაც ის პირველ ოქტომბერს დააკავეს.

8 ნოემბერს “ჯანმრთელობის გაუარესების პრევენციის” მიზნით, იგი რუსთავის ციხიდან გლდანის ციხის საავადმყოფოში გადაიყვანეს მისი ნების საწინააღმდეგოდ. თავად სააკაშვილი, მისი ოჯახი, მკურნალი ექიმები და ასევე სახალხო დამცველის აპარატი ციხის საავადმყოფოში მისი გადაყვანის წინააღმდეგნი იყვნენ იმ მოტივით, რომ ციხის საავადმყოფოში არ იყო სააკაშვილის მკურნალობისთვის საჭირო სამედიცინო აღჭურვილობა და ასევე არ იყო უსაფრთხო.

სახალხო დამცველმა გლდანის ციხეში არსებული სამკურნალო დაწესებულება რამდენჯერმე შეისწავლა. ომბუდსმენი ანგარიშებში წერდა, რომ კლინიკაში პაციენტის მკურნალობისთვის შეუსაბამო პირობებია.

სააკაშვილის სამოქალაქო კლინიკაში გადაყვანის მოთხოვნით, პოლიტიკური პარტია “დროას” ლიდერმა ელენე ხოშტარიამ პარლამენტში შიმშილობაც დაიწყო.

გლდანში სააკაშვილი მალულად გადაიყვანეს. ამ პროცესების პარალელურად, 8 ნოემბრიდან ოპოზიციამ მიხეილ სააკაშვილის გათავისუფლებისა და რიგგარეშე არჩევნების დანიშვნის მოთხოვნით, ფართომასშტაბიანი, უწყვეტი საპროტესტო აქციები დაიწყო.