დაკავებები და სასამართლო - შეტევა ნავალნის მომხრეებზე რუსეთში
ნავალნის ფონდი შესაძლოა აიკრძალოს. რუსეთში სასამართლომ შეზღუდა ანტიკორუფციული ფონდის საქმიანობა, რომელიც რუსეთის ოპოზიციის ლიდერმა ალექსეი ნავალნიმ დააფუძნა. ეს პოლიტიკოსთან ასოცირებული ორგანიზაციების “ექსტრემისტულ” ორგანიზაციებად აღიარების საქმის განხილვის ფარგლებში მოხდა, რაც მათ კანონგარეშე გამოცხადებას ნიშნავს. ამავდროულად, ნავალნის მომხრეთა მასობრივი დაკავებები გრძელდება.
“ექსტრემიზმის” საქმე
მოსკოვის საქალაქო სასამართლომ ”წინასწარი დაცვის ზომები” მიიღო ანტიკორუფციული ფონდის და მოქალაქეთა უფლებების დაცვის ფონდის საქმეებზე. რუსული გამოცემა “ნოვაია გაზეტას” ცნობით, ეს “გარკვეული ქმედებების აკრძალვას” ნიშნავს.
სასამართლო დეტალებს არ ასაჯაროებს, საქმის განხილვის “დახურულ რეჟიმიდან” გამომდინარე. თუმცა, ადვოკატმა ივან პავლოვმა, რომელიც ნავალნის გუნდის ინტერესებს წარმოადგენდა, წინა დღეს განაცხადა, რომ პროკურატურამ სასამართლოს სთხოვა, აეკრძალა ფონდისთვის მედიაში ინფორმაციის გავრცელება, არჩევნებში მონაწილეობა, ბანკების გამოყენება და საზოგადოებრივი ღონისძიებების ორგანიზება.
- ნავალნი ციხეში ცუდად გახდა, ამტკიცებენ თანამებრძოლები. მასთან არავის უშვებენ
- რატომ აშინებს პუტინს ნავალნი?
- “თავისუფლება ნავალნის!” მრავალათასიანი აქციები ოპოზიციონერი პოლიტიკოსის მხარდასაჭერად მთელ რუსეთში. ფოტო, ვიდეო
ერთი დღით ადრე მოსკოვის პროკურატურამ ნავალნის შტაბის საქმიანობა ექსტრემიზმის სარჩელზე გადაწყვეტილების მიღებამდე შეაჩერა. ამავე დროს, ნავალნის შტაბის უფროსმა ლეონიდ ვოლკოვმა განაცხადა, რომ “ნავალნის შტაბი”, როგორც ორგანიზაცია, სამართლებრივად არ არსებობს.
16 აპრილს მოსკოვის პროკურატურამ სარჩელი შეიტანა მოსკოვის საქალაქო სასამართლოში ანტიკორუფციული ფონდისა და ნავალნის შტაბის ექსტრემისტულ ორგანიზაციებად გამოცხადების მოთხოვნით ”ექსტრემისტული საქმიანობის რეალურ განხორციელებასთან დაკავშირებით”.
ნავალნის თანამებრძოლმა ლეონიდ ვოლკოვმა და ივან ჟდანოვმა განაცხადეს, რომ ეს “გზას გაუხსნის ასობით სისხლის სამართლის საქმეს, ყველა თანამშრომელი დარტყმის ქვეშ აღმოჩნდება”.
მომხრეების დაკავებები
ნავალნის მხარდასაჭერი აქციების შემდეგ, რომლებიც მთელ რუსეთში 21 აპრილს გაიმართა, მათი მონაწილეების მასობრივი დაპატიმრებები დაიწყო.
27 აპრილს, დილით რუსეთის სხვადასხვა ქალაქში, ძალოვნებმა ოპოზიციონერებისა და ჟურნალისტების ჩხრეკა და დაკავება დაიწყეს. დაკავებულებს ბრალი ძირითადად არასანქცირებული აქციების ორგანიზებაში ედებოდათ. დააპატიმრეს ან დაკითხეს ტელეკომპანია “დოჟდის”, რადიო „ეხო მოსკის“, „მედუზას“ და „კომსომოლსკაია პრავდას“ კორესპონდენტები, რომლებიც აქციას აშუქებდნენ.
საერთო ჯამში, ორგანიზაცია ОВД-инфо-ს მონაცემებით, 21 აპრილს და მომდევნო დღეებში აქციების 2 ათასზე მეტი მონაწილე დააკავეს.
მოსაზრება: “უნდა მოვემზადოთ მძიმე სცენარებისათვის“
რუსი პოლიტოლოგი ანდრეი კოლესნიკოვი მიიჩნევს, რომ სასამართლოს შესაძლო გადაწყვეტილება ნავალნის ორგანიზაციების და მთლიანი ინფრასტრუქტურის ექსტრემისტულად აღიარების შესახებ ძალიან საშიში იქნება.
” ვფიქრობ, რომ ზეწოლა ხორციელდება მხოლოდ იმიტომ, რომ სხვაგვარად არ შეუძლიათ. … როდესაც ყველა ბედნიერი და გახარებული იყო იმით, რომ მოსკოვში აქციაზე ცოტა ხალხი დააკავეს, ეს ნაადრევი სიხარული აღმოჩნდა. ჩვენ ვხედავთ, რომ ახლა საყოველთაო დაპატიმრებები მიდის და ხელისუფლება აბსოლუტურად არ აპირებს უკან დახევას ამ რეპრესიული ხაზიდან და პოზიციების დათმობას და კომპრომისებს – არა, ეს არ მოხდება. ამიტომ, სინამდვილეში, უნდა მოვემზადოთ მძიმე სცენარებისათვის ”, – თქვა კოლესნიკოვმა” Настоящее время”- სთან ინტერვიუში.
