covid-19 წყალტუბოში - საქართველოში კორონავირუსის ახალი წითელი ზონა გაჩნდა

ბოლო 24 საათის განმავლობაში საქართველოში კორონავირუსით ინფიცირების  6 ახალი შემთხვევა გამოვლინდა.

29 აპრილის მონაცემებით, საქართველოში კორონავირუსით ინფიცირების 517 შემთხვევაა დადასტურებული. კარანტინის რეჟიმშია 5124 ადამიანი, ხოლო სტაციონარში მეთვალყურეობის ქვეშ – 549 პირი. კორონავირუსით ინფიცირებულთაგან 168 გამოჯანმრთელდა და 6  გარდაიცვალა. 

უცხოეთიდან საქართველოში სამკურნალოდ გადმოყვანილია  კორონავირუსით ინფიცირებული საქართველოს 3 მოქალაქე.

კორონავირუსით ინფიცირების პირველი შემთხვევა დადასტურდა წყალტუბოში. covid-19 62 წლის მამაკაცს დაუდგინდა, რომელიც წყალტუბოს მუნიციპალიტეტის მერიის დასუფთავების სამსახურის თანამშრომელია. მისი შვილი და მეუღლე კარანტინში გადაიყვანეს. ინფიცირებულ მამაკაცთან კონტაქტში მყოფი 10 ადამიანი კი თვითოზოლაციაში იმყოფება. 

• მთავრობის ანტიკრიზისული გეგმა – ვინ რა დახმარებას მიიღებს
• ვის და რა შემთხვევაში შეუძლია მანქანით გადაადგილება – გამონაკლისების სია
• საქართველო: რა ბედი ელის ტურიზმს?
• როგორ მოიხსნება შეზღუდვები – მთავრობის გეგმა

კორონავირუსი დაუდასტურდა ბოლნისის სასწრაფო სამედიცინო დახმარების 5 თანამშრომელსაც. 

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.