კორონავირუსით ინფიცირების 1186 ახალი შემთხვევა. აქედან 469 თბილისში

საქართველოში ბოლო 24 საათში კორონავირუსით ინფიცირების 1186 ახალი შემთხვევა გამოვლინდა. გავრცელების ყველაზე მაღალი მაჩვენებელი თბილისშია, სადაც 469 ახალი შემთხვევა დაფიქსირდა.

ოფიციალური სტატისტიკა ამ დროისთვის შემდეგნაირად გამოიყურება: დადასტურებული შემთხვევების რაოდენობა – 18 663; გამოჯანმრთელებული პაციენტები – 8 338; გარდაცვლილი – 143; კარანტინის რეჟიმში – 6 407; სტაციონარში მეთვალყურეობის ქვეშ – 836; კოვიდ სასტუმროში მყოფი პირები – 1 420.

ინფექციური საავადმყოფოს ბოქსირებული განყოფილების ხელმძღვანელის მარინა ენდელაძის განცხადებით, კრიტიკული პაციენტების რაოდენობა ასზე ნაკლებია.

საქართველოს განათლების სამინისტროს გადაწყვეტილებით, 19 ოქტომბრიდან თბილისის, ქუთაისის, ზუგდიდისა და ფოთის უმაღლესი სასწავლებლები, საუნივერსიტეტო სივრცეებში მხოლოდ პრაქტიკულ-ლაბორატორიულ სამუშაოებს განაახლებენ. სასწავლო პროგრამების სხვა კომპონენტები ისევ დისტანციურად წარიმართება.