"ნაციონალურმა მოძრაობამ" ცათამბჯენების პროექტებთან დაკავშირებით პროკურატურაში საჩივარი შეიტანა
ცათამბჯენების პროექტები თბილისში
“ერთიანმა ნაციონალურმა მოძრაობამ” თბილისის საკრებულოს მიერ ცათამბჯენების სადავო სამშენებლო პროექტების მხარდაჭერასთან დაკავშირებით პროკურატურაში საჩივარი შეიტანა. მათი თქმით, საკრებულოს სხდომაზე, სადაც თბილისის განაშენიანების საკითხი უნდა გადაწყვეტილიყო, კენჭისყრა კანონდარღვევით ჩატარდა.
“საკრებულოს ბოლო სხდომაზე მოხდა შემდეგი – რამდენიმე მილიარდერის ინტერესების დასაცავად, ქართული ოცნების დეპუტატებმა კანონი დაარღვიეს და ხმა არა მხოლოდ საკუთარი, არამედ, სხვა დეპუტატების პულტებიდანაც მისცეს, რომლებიც იმ დროს დარბაზში საერთოდ არ იმყოფებოდნენ. ეს არის სამსახურებრივი სიყალბე […] ეს არ არის რეგლამენტის დარღვევა, ეს არის საქართველოს სისხლის სამართლის კოდექსის 341-ე მუხლის დარღვევა, რაც სამსახურებრივ სიყალბეს გულისხმობს”. – განმარტა “ნაციონალური მოძრაობის” თბილისის საკრებულოს წევრმა, გიორგი ონიანმა.
საკრებულოს ოპოზიციონერი წევრები საქართველოს პროკურატურაში შეტანილი განცხადებით ითხოვენ, რომ უწყებამ გამოძიება სწორედ სისხლის სამართლის კოდექსის 341-ე მუხლით დაიწყოს.
მათ განცხადებებს თბილისის საკრებულოს თავმჯდომარე, გიორგი ტყემალაძე გამოეხმაურა. ტყემალაძე ამბობს, რომ კენჭისყრების პროცედურასთან დაკავშირებით არანაირი დარღვევა არ ყოფილა.
● თბილისის შემოგარენში მიწის ნაკვეთებზე მოთხოვნა მნიშვნელოვნად გაიზარდა – ახალი კვლევა
● თბილისში უძრავი ქონება გაძვირდა – საქსტატის მონაცემები
● 2022 წელს სიღარიბის აბსოლუტურ ზღვარს ქვემოთ საქართველოს მოსახლეობის 15.6 პროცენტი იყო
25 აგვისტოს სხდომაზე თბილისის საკრებულომ მხარი დაუჭირა ცათამბჯენების სამშენებლო პროექტებს, რომლებიც სადავო საკითხი იყო. პროექტი ეხებოდა განაშენიანების გეგმებს ლაგუნა ვერესთან, ვაკეში, დიღომსა და ნაძალადევში.
თბილისის საკრებულოს მხარდაჭერა არ ნიშნავს, რომ აღნიშნულ პროექტებს მშენებლობის ნებართვა ავტომატურად ეძლევათ. ამ ნებართვისთვის საჭიროა მერიის დასტური. იმისათვის, რომ ინვესტორმა მერიისგან მშენებლობის ნებართვა მიიღოს, შესაძლოა პროექტში გარკვეული ცვლილებების შეტანაც მოხდეს.
ოპოზიციონერების კრიტიკის ერთ-ერთი მთავარი სამიზნე იყო ლაგუნა ვერეს მიმდებარედ დაგეგმილი 52-სართულიანი ცათამბჯენის პროექტი. 10 აგვისტოს ცნობილი გახდა, რომ ფონდმა ქართუმ ლაგუნა ვერეს ტერიტორია გაყიდა, რომელიც “ნაციონალური მოძრაობის” ყოფილი წევრის და ექსპრეზიდენტ მიხეილ სააკაშვილის ყოფილი პრესმდივნის, მარიკა ვერულაშვილის კომპანიამ იყიდა.
ამას გარდა, თბილისის საკრებულოში მხარი დაუჭირეს ბიზნესმენ ნოშრევან ნამორაძის პროექტს [რომლის მიხედვითაც ვაკეში 69-სართულიანი შენობის აშენება იგეგმება] და პარლამენტის დეპუტატების “ქართული ოცნებიდან” – გოჩა ენუქიძის და ნინო წილოსანის ოჯახთან დაკავშირებული კომპლექსის მშენებლობასაც.
