ბელარუსული ფლეშმობი: “რას იტყოდა შენს სიკვდილზე ლუკაშენკო”

ბელარუსის პრეზიდენტის ალექსანდრ ლუკაშენკოს სიტყვებმა კორანავირუსით დაავადებული პაციენტის შესახებ, რომელიც ქალაქ ვიტებსკში გარდაიცვალა, მრავალი ბელარუსი აღაშფოთა. ისინი დაფიქრდნენ: რას იტყოდა სახელმწიფოს მეთაური მათზე, თუ ისინი ასევე კორონავირუსის მსხვერპლი გახდებოდნენ?

Euroradio- ს ცნობით, ფეისბუქში ფლეშმობი დაიწყო: ბელარუსები საკუთარ თავს ლუკაშენკოს სტილში ეპიტაფიებს უწერდნენ. ისე, რომ გასაგები იყოს: არა სახელმწიფო, არამედ თავად არიან დამნაშავე იმაში, რომ კორონავირუსმა იმსხვერპლა.

რა თქვა ლუკაშენკომ? 

ერთ-ერთ რაიონში სამუშაო ვიზიტის დროს ჟურნალისტებმა ალექსანდრ ლუკაშენკოს ჰკითხეს ბელარუსში კორონავირუსის გავრცელებასთან დაკავშირებული მდგომარეობის შესახებ.

თავდაპირველად მან უკმაყოფილება გამოთქვა იმით, რომ მედიაში ოთხი დაღუპულის გამო ”ხმაური ატყდა”. შემდეგ კი ლუკაშენკომ მოულოდნელად COVID-19– ის ერთ–ერთ მსხვერპლზე ისაუბრა:

”გუშინ მე ვკითხე ოლქის ხელმძღვანელს უახლესი გარდაცვალების შესახებ. მან თქვა:

„როგორ შეიძლება ამ ადამიანს ეცოცხლა? 135 კილოგრამი წონით! გული თითქმის არ მუშაობს, ის სტკივა, ეს სტკივა, დაავადებების მთელი ბუკეტი. ვირუსი თავს ესხმის სუსტებს, რომლებსაც არ აქვთ იმუნიტეტი”.

რეაქცია სოციალურ ქსელებში

ისე გამოდის, რომ კორონავირუსისგან საკუთარ სიკვდილში თავად ადამიანია დამნაშავე, და საერთოდ, “როგორ უნდა იცხოვრო”, თუ 135 კილოგრამის იწონი?

ლუკაშენკოს განცხადებამ ადამიანები აღაშფოთა. ფეისბუქის მომხმარებლებმა წარმოიდგინეს, რას იტყოდა ლუკაშენკო მათი გარდაცვალების შემთხვევაში.

”აბა რა ეგონა? ეგზოტიკურ ქვეყნებში რომ მოგზაურობდა, მხოლოდ ღმერთმა იცის, იქ რა დაავადებები აიკიდა…”,  – ასე, მომხმარებელ ჟენია მანცევიჩის აზრით, გამოეხმაურებოდა პრეზიდენტი ლუკაშენკო მის გარდაცვალებას.

”აბა რა ეგონა? 56 კილო წონით, იმუნიტეტი არაფრად არ უვარგოდა, ის კი რაღაც ლექსებს ჯღაბნიდა… ჰო ეუბნებოდნენ ადამიანურ ენაზე: არ დაძაბო გონება, ტვინი გაგიშრება და ცუდი რაღაც დაგემართება”, – ასეთია პოეტი კრისტინა ბანდურინას ვერსია.

ჟურნალისტ ალეს პილეცკის ვერსია:

”ღმერთო, ამას ვის გლოვობთ! 36 წლის, არა სახლი, არა კარი, არა ქალი. თან მთელი ცხოვრება ჩუმ-ჩუმად  ცილს სწამებდა ხალხს… პლაცკარტით მთელი რუსეთი შემოუვლია, სამი დღე ვიღაც ჩუჩმეკებთან ერთად – ეს ნორმალურია? გასაგებია, რომ რამე შეეყრებოდა აუცილებლად… “

კორონავირუსით გარდაცვლილი ქალის შვილმა ლუკშენკოს პოლიციაში უჩივლა

იმავდროულად, ბელარუსის მოქალაქე ალექსანდრ მატვეევმა პოლიციას პრეზიდენტ ლუკაშენკოს პასუხისგებაში მიცემის მოთხოვნით მიმართა – კორონავირუსის პანდემიისგან მოსახლეობის დასაცავად მოვალეობის შეუსრულებლობის გამო.

ევრორადიოს ცნობით, მატვეევის დედა ვიტებსკის რაიონულ საავადმყოფოში 2 აპრილს გარდაიცვალა. განცხადებაში მამაკაცი წერს:

”მოვითხოვ სისხლის სამართლის საქმის აღძვრას ალექსანდრ ლუკაშენკოს წინააღმდეგ… რომელმაც, როგორც ბელარუსის რესპუბლიკის პრეზიდენტმა, არ მიიღო აუცილებელი ზომები მოსახლეობის დასაცავად განსაკუთრებით საშიში ვირუსის გავრცელებისგან, რის შედეგადაც 02.04.2020 გარდაიცვალა მატვეევა ლიდია დმიტრის ასული”.

თავად ალექსანდრე საფრანგეთში ცხოვრობს და კორონავირუსის პანდემიის გამო დედასთან ვერ ჩავიდა. 68 წლის ლიდია მატვეევა რამდენიმე კვირის განმავლობაში ნევროლოგიის განყოფილებაში იწვა.

მისი შვილის თქმით, ქალის დიაგნოზი სამჯერ შეიცვალა. კორონავირუსის არსებობა კი მხოლოდ მორგის მიერ გაცემულ ცნობაში დაფიქსირდა.

”საშინელება ის არის, რომ ხალხს ინფორმაციას არ აძლევენ, დაღუპულთა სახელები ოფიციალურად არ ქვეყნდება, ყველაფერი იმალება. ხალხმა უნდა იცოდეს რა ხდება ჩვენს ქვეყანაში. კარანტინი აუცილებელია, აუცილებელია ექიმების დაცვა,”- ამბობს ალექსანდრ მატვეევი.

6 აპრილის მონაცემებით, ბელარუსში კორონავირუსით 13 ადამიანი გარდაიცვალა. ქვეყანაში COVID-19 ინფექციის 700 შემთხვევაა გამოვლენილი.